2 Kin
Waeuwa uawa
Buka 2 Kin ipa Israel apanawa umanau waeuwaleide. 1 Kin ita 2 Kin ipa warere Dawid wandie boleno aupawe dewa ambi segalena umanawa wade. Ita buka 1 Kin bedewe Dawid boleno aupe Solomon warerelena umanawa dianede.
Ita Solomon boleno aupawe, Israel apanawa empuempuntone bola nata seganton. Ita bola Iuda ipa Owa Bobopa tampe ita Israel ipa Galili owa tampe.
Tane walama sawo Iuda apanawa warereu ita Israelwa warereu Iawe God aiawa ruawantoia walamawe wanwan euda obasa winedie. Tane walama isiwa warere God adiananasaie mo antoie god da wadaposimoia bedewe kadi isiu segantoie. Walama sawo apana Israel bedewe waimoie God sumanaiwa eio baiwa, me peroweta waubamon. Me peroweta debama wanaubena buka 2 Kin bedewe ipa peroweta Elaisa. Me dewa dewamona ipa ewaewa apana da God os sauwa mampe dewasapia rua. Me apana diamona ipa mo leuntopue sumanaibu God os bedewe itupue wadaposisapu.
Tane Elaisa boleno aupawe, warere uaraia dewau kadiidalen. Sa baiwa mo emalawoa apanawa God waubamono wimone me apanawa Israelwa taumone otamone anton. Tane dewa ema Israelwa mampo bauta segalen, ita ema aupe Iuda apanawa mampo segalen. God mai menasapona me apanawa leuntopue bolawo antopu, mo sape waimoio ena 70 dialen.
Gagalo uwau sonabamoia
Gonaa nata winei, Israel ita Iuda
Peroweta Elaisa dudunawa (2.1-18; 4.8-11, 14-17, 42-44; 5.1-3, 9-19)
Tawo Asaria warereu Samaria tawowa apanawa otamone taumone ita Israel gonaawa nanausane diasaiena (17.5-10, 24-29)
Iuda warereu dudunau
Warere Esekia apana oniamodia mukawa bedewe dewa ema ualen ita alene warere Iosia mampe wisen (18.1-8; 21.1-6, 10-16, 18-24; 22.1-2, 11-13, 16-20; 23.1-4)
2
Iawe God Elaia wadene uboo odene aleide
Walama kerauda os bedewe Iawe God Elaia wadepiposidepio wiriwiritoto asiasi odepie uboo alepi, Elaia ita Elaisa bola debama Gilgalwae nomone antoie. Elaia me diene wanase, “E mape wanempa, Iawe God dianena ne bola debama Betel bedewe anteapa.”
Tane Elaisa sipoasane wanase, “Ulaipa Iawe God wanwankasalala ebowe ita do e eboawo ne sauantedina e mai eepa, dia.” Sa baiwa mo iane Betelwa anton.
Ita Betel bedewe peroweta sape waimoie ita mo wimone Elaisa diane waienase, “E ateiten ba, dia, ande Iawe God e debamaa manawo wadepie alepia baiwaleide?”
Elaisa sipoamone wanase, “Oa, ne atenten tane e mai gagalowa wana.”
Tane Elaia me mampe wanase, “Elaisa, e mape wanempa. Iawe God ne dianena bola debama Ieriko bedewe anteapa.”
Tane Elaisa sipoasane wanase, “Ulaipa Iawe God wanwankasalala ebowe ita do e eboawo ne sauantedina e mai eepa, dia.” Sa baiwa mo iane bola Ierikowa anton.
Peroweta Ieriko bedewe wanwanlala wimone Elaisa waitarasane waienase, “E ateiten ba, dia, ande Iawe God e debamaa manawo wadepie alepia baiwaleide?”
Elaisa sipoamone wanase, “Oa, ne atenten tane e mai gagalowa wana.”
Ita Elaia me mampe wanase, “Elaisa, e mape wanempa. Iawe God ne dianena esa Ioadanwa iape anteapa.”
Tane Elaisa sipoasane wanase, “Ulaipa Iawe God wanwankasalala ebowe ita do e eboawo ne sauantedina e mai eepa, dia.” Ita mo nata awodea antoiena.
Ita peroweta uduudu bedeuwo 50 mo do antoiena. Elaia ita Elaisa Ioadan esawa tampe nomone eneiena, ita peroweta sa uduudu 50 nomone eseanama enane emontoie. Ita Elaia garawa onapea wadenaubene nukulene mampe esa epen. Ita esa meba rialene on ita sen deneuwe antono me Elaisa nata nomone dogo makowa asiasi nawane anton.
Mo antone waiwa dauwo wimone Elaia Elaisa diene wanase, “Dima e baia dewasapa meneedia dianea ita aupe Iawe God ne wadaposinepio odape anteapa.”
Ita Elaisa sipoasane wanase, “Ne menanede e mukaa osowesae* Israel apanawa dewau ema epe: Mo mambu bolepio aupe me puraiwawa obampa odantopue otepu. Tane oto tautuwa puraiwa osowesapie otepi. Epe rua, Elaisa Elaia iririsadia me mukawa debama wanepio aupawa wadepie peroweta uau apanawa segalepi. debamasae neawo e aupaa wadape peroweta uwau apanawa segantapa.”
10 Tane Elaia leusane wanase, “E dewa debama iririwaiten. Ne ewaneano Iawe God wadaposinepio odape antepino, tauma e dima iririwa waana wadaa. Naita dia, sa ide, dia.”
11 Ita mo gagalontoie antoio tauwadea oas turaka teineia osowe ia idie bumedia do seganton. Ita oas sa Elaia ita Elaisa sawanauwointa nomone anton, ita Iawe God Elaia wiriwiritoto bedewainta wadenposideno uboo odene alen. 12 Elaisa dewa ema ewene mukalene wanase, “Ne mamana! Ne mamana! Ne Israelwa turakau oas mampe teiteinala apanawa do ewamodina!” Sape me Elaia mai osowe ewapona. Me nuaparewa eueuwa dewasane garawa onapea sioleno kepawa nata seganton.
13 Tane Iawe God Elaia wadenposideno uboo odene aleidio garawa onapea dogo osowe noseno Elaisa waden. Eueuwa ema Elaisa Elaia aupawa wadena eueuwa. Me Elaia mukawa ita ginasawa osowelepi (ewana 1 Kin 19.19). Ita me alene esa Ioadan waiwe enen. 14 Ita me Elaia garawa onapea noseno wadena mampe esa epene mukalene wanase, “Iawe Elaia Godiwa naepe?” Me epe wane esa epeno einpue awopawa ituno nawene alen.
15 Tane peroweta Ieriko bedewe wanwanlala eseanama enane dima segalena ewane waienase, “Elaia mukawa tauma Elaisa osowelen!” Ita mo antone me donsane danawe dogo osowe dunentoiena. 16 Mo waienase, “No apana mukamukaua uduudu 50 mape wainitana. E wawo no ane e debamaa banusata. Dauwa Iawe God Aleupa me awanene alene wadi da osowe itun, ba bola da nua bedewe itun.”
Tane Elaisa diamone wanase, “Dia, e mai aitana.” 17 Tane mo me kainokaino iririsaio malalene wanase, “Sa ide aitana.” Apana sa uduudu 50 Elaia banusapua baiwa antone laio walama natadea dialen ita me mai donsapona, dia. 18 Tane Elaisa bola Ieriko bedewe wandie, ita mo wimoieno me diamone wanase, “Ne dialena, mai aitana.”

*2:9: Israel apanawa dewau ema epe: Mo mambu bolepio aupe me puraiwawa obampa odantopue otepu. Tane oto tautuwa puraiwa osowesapie otepi. Epe rua, Elaisa Elaia iririsadia me mukawa debama wanepio aupawa wadepie peroweta uau apanawa segalepi.

2:13: Eueuwa ema Elaisa Elaia aupawa wadena eueuwa. Me Elaia mukawa ita ginasawa osowelepi (ewana 1 Kin 19.19).