2
Nuaeu ipa ipasiawaia
1 Ne neba wane wanaase, “Ne neba nuaeunteapa dewawa dewasape ita ipawa atenteapa.” Tane donsane atentena ema do ipa ipasiawaia. 2 Oi ipa oo dewawa ita nuaeu mai dima da euda dewasaipona. 3 Ne insaisana euda mampe rubusane wain nane ita do dewa rebareba dewamona mampe nuaeunten. Ita atenteapa dewa dainea ipa eubu apana tawo ema osowe walama kampaida bedewe inawaa waimompe dewamompa.
4 Ne nola debamau dewamone du wadamona ita wain iraiwa dewamona. 5 Ne nana iraiwa dewasane ia naumbu nanalala aimono inintoiena. 6 Ita doba dewamona esa iompe ia aimona butamompa baiwa. 7 Ne nolana dewalala mona ita iwoa uaraia gimaramona ita nolana dewalala iwoa dunawo waimoie gamontoieno nolana dewalala uara seganton. Ita do kau ita sipsipna uwa uaraia waimoi, mai apana da epe rua Ierusalem bedewe wainipe, dia. 8 Silwa, gold ita warere nitubu uwataubu bola dauwo wineia mainawolen. Ita do sasa wawala apanawa mona ita iwoa mainawo waimoie. Ita do manamanaina uaraia eubuida do wainitee. Dima uduudu apana menamodio baiwantoia uduudu ne mainawolentuwan. 9 Ne puraiwa mampe mauraidanten mai apana da ne ruana bauta Ierusalem bedewe wainipe, dia. Tane dewa ema uduudu bedewe aten insaisawa euwa ne bedenawo winakasalen.
10 Nitu uduudu ewamodina dewamopina os menanedio ita dewamodine,
nitu sa uduudu dewamodina nuaeuneapona baiwa ita rua nuaeuneiena.
Ne nolana sa nuaeuneiena,
sa ipa ne nolana sa dewamodina malesawa wadana.
11 Tane ne nola sa pokawau dewamona insaisawantedine,
atentena nola sa ipa ipasiawaia diapana,
lanunu tanone wadasusana rua.
Ita nolana sa mai ipawa da euda tawo emauwo donsape wadapa, dia.
Aten insaisawa euda ipasiawaia
12 Ne aten insaisawa euda,
ita oo insaisawa ita do insakadisa insaisau wadedine.
Apana mida ne aupana wadepie warerelepia,
me mai nitu da sanaa dewasapi, dia.
13 Tane ne ewane atenten aten insaisawa wadee manawosaa ipa euda,
tane insakadisa wadee manawosaa sa ipa dewa kadiwa.
Sapa ewaewa ipa euda mai dubawa rua.
14 Insadewasa apanawa sala ewedidewae aleide,
tane insakadisala me ipa dubawa bedewainta aleide.
Tane ne ewane atenten, mo nata ando ompa osowe deawaa donsapu.
15 Ita ne neba wane wanaase,
“Dima ne ompa osowe donsapa deawaida insakadisa apanawa donsapi.
Tauma dima euda ne aten insaisawa euda bedewe donsane wadana?
Ema do ipa ipasiawaia.”
16 Mai mida da ando insadewasala ba insakadisala insamopie umanau wapi, dia.
Apana insadewasala ita insakadisala bo deawa bontopu.
17 Nitu uduudu tawo ema osowe wainite dewasaitana sa ipa sai wadeite osombo ituitana. Sa baiwa ina tawo ema osowe wainitana ne dabuasadina. Ema uduudu ipa ipasiawaia lanunu tanone wadasusana rua.
Badowa nolaitona ipa ipasiawaia
18 Ne nolana uduudu dewamodina epe bonteapo aupanawo apana da wadepi, sa baiwa ne nola tawo ema osowe etedabuantedina. 19 Tane mida atenlen apana sa ne aupanawo nitu sa uduudu nolawantene pokanena bopawa wadepia me ipa insadewasa apanawa ba, dia? Tane dewa ema uduudu ipa ipasiawaia. 20 Sa baiwa ne nolana pokawaa tawo ema osowe dewamodina insaisawantedine nuana pareidalen. 21 Naita apana insaisa euda, aten ita nitu dewawa atemba apanawa nolalempe nitu uduudu ipawa segantopuo, tane emopio aupe apana da mai nolalepona di bopawa otamopi. Ema do ipa ipasiawaia mai dodomana. 22 Nitu dainea euda apana tawo ema osowe nolawa pokamodia bedewe donsapue wadapu? 23 Mo walama uduudu nolau bedewe poka ita nuapare wadeie mamposai do tadino mai itudewantoipe insaisau bubuasaipona, dia. Ema do ipa ipasiawaia.
24 Sa baiwa eulena ipa apana nana ita esa nampa ita do nuaeulempe tauma nolawa dewasampa.✡Luk 12.19; 1 Korint 15.32 Ne ewane atenten ema ipa God sauwa euda. 25 Naita God diaewo mai mida nana naipe ita do nuaeuleipona, dia. 26 Tane God insaisa euda, aten ita nuaeu mo mida me nuawa eusaia wanamode. Tane mo mida kadi dewalala saibu wanamodia mo ipa nola pokamompo ipawa itumpa. Ita nolau ipawa sa ipa mo mida God nuawa eusaia baibu. Ema do ipa ipasiawaia lanunu tanone wadasusana rua.