3
Moses pirisi do waimoie ita me anoopa Sapora naisen.
Iawe God Moses mampe gagaloleide
1 Moses nemonapa Dietero puewa sipsip ita gote oniamodie. Me ipa bola Midia pirisiwa. Walama dea me pue banlamone sala makowa bedewe wadi Sainai*Wadi Sainai ebowa da waia Oreb. bedewe wisen, wadi sa ipa kakaiwaida Iawe God baiwa. 2 Sape Iawe God enseliwa me mampe segalen, me ewaewawa ia idie bumedia epawa rua ia kerauda inileidia bedewe idia ewedie. Moses pisiwane ia sa idia ewedie, tane ia sa bumedia mai ia sa kerauda ipatuwapona, dia.✡Aposel 7.30-34 3 Me epe ewedie insenase, “Dima baiwa ia sa kerauda inileidia mai ipatuwapona? Ne mampeido anteaape ewapo.”
4 Iawe God Moses ia idia mampeido iedio ewene ita ia sa kerauda idi bumedia bedewe sawano apalene wanase, “Moses, Moses.”
Ita Moses me sipoasane wanase, “Oa, ne ema.”
5 Sape Iawe God wanase, “E mai riaite ia sa kerauda mampeido winea. E bauta waawo sendoro otawiaita, ipawa dogo ema e osowe eneiana ipa kakaiwaida. 6 Ne ipa e nosinosia Godiu - Abraam, Aisak ita Iakob Godiu.” Ita Moses aia ema etene me ewaewa saidalene namba rupusan.
7 Ita Iawe God wane wanase, “Ne aitamana Isibtiwa ne apanana mampo kadiwa dewasaio ewane ita do ne apanana keu etana mo ne sauna menamode mo atowomoie oniamoia mampo inamopa. Mo poka eteia ne atenten. 8 Sa baiwa ne Isibt apanawa mampoe mo inamopaa baiwa iane winen. Ita mo banlamopo Isibt epue antopu bola euda bedewe. Bola sa ipa debama eudida maura bolawa. Tane bola sa bedewe Kanaan, Itai, Amori, Perisi, Iwa ita Sebusi apanawa sape waimoi. 9 Ulaipa, ne apanana poka eteie sidantoia kewa ne mainawo wiseno etana. Ita do Isibt apanawa poka debama mo wanamoia ewana. 10 Sa baiwa ne tauma waaubaedina Isibt warerewa mampe aite ne apanana Israelwa banlamowo Isibt epue nomopu.”
11 Tane Moses God mampe wane wanase, “Ne apana diapanaida. Ambi anteape warere mampe e apanaa banlamopo Isibt epue nomopuaubepu?”
12 Ita God me sipoasane wanase, “Ne ipa e do. E Israel apanawa banlamowo Isibt epue nomopuaubepua, e ando wadi emawo ne wadaposineana. Ema epe segalepio ewee ateita, ne e waaubaena.”
13 Tane Moses wanase, “Ne anteape Israel apanawa diamope wapase, ‘No nosinosimba Godiu waaubaneno e manlawo winen.’ Ita mo wapuase, ‘Me ebowa ambi?’ Ita ne ambi wape diamopa?”
14 Tane God Moses diene wanase, “Ne ipa ne!✡Gagalo 1.4,8 †Ibru aiawe Ne ipa ne aia sa etaetawa Iawe God. Ita e Israel apanawa diamoe waase,
‘Me ebowa ipa “Ne ipa ne waaubanen e manlawo.” 15 Tane do God Moses mampe wane wanase, “E aite Israel apanawa ema epe diamoa,
‘Iawe God, e nosinosila Godiu, sa ipa Abraam, Aisak, ita Iakob Godiu, me ne waaubanen e manlawo. Ne ebona, Ne ipa ne ebona winakasalala; ando ita ando apana muntompa ne ebona epe wampa.’ ”
Ema aupe Moses leulene wisene bolawe wandie ita ene Isibtiwa alen. Me aleidie tatawa Aron into donsane nata antoiena Isibtiwa. Mo sape wimone dewa uduudu segalena umanawa Israel apanawa debamau diamoieno eteiena. Ema aupe Moses tatawa Aron nata antone Isibt warerewa diane waienase, “Iawe God no waaubaneno e manawo winetana e dieeto Israel apanawa emowo nomopue antopu sala makowa bedewe pue pulontopu me mampe.”
Tane Isibt warerewa wanase, “Ne mai mo emopo antopu, dia. Mo ideita mape nolantompe waimompa.”
Sa baiwa Iawe God matangela pokawaau dewamodie Isibt apanawa mampo. Tane Isibt warerewa mo mai eiamopono antopona, dia. Me Isibitiwa esau dewasano osinalen, do pueu bobontoiena ita etepu benebeneleidie, tane Isibt warerewa mo mai emopona, dia.