Isikel
Waeuwa uawa
Israel apanawa God adiananasane ene god lagawaau wadaposimoie, mo kainokaino kadiwa me emawe dewasaio baiwa me matangelamon. Sa ipa mo emalawoau apanawa waaubamono wimone onantone nanaumone ita diburau apanawa otamone antoiena mo bolauwo.
Isikel me ipa pirisi Liwai damba bedewea, me God sumanaiwaleidie ita me aiawa ruawaleidie wandie. Me Iuda tawowa bedewe wandio Babilon apanawa wimone onau enane me ita Iuda apanawa isiwa do diburau apanawa otamone Babilon bedewe anton.
Me sape wandio God me sonabeno peroweta segalen. Ita Israel apanawa Babilon bedewe waimoia ita do Iuda apanawa Ierusalem bedewe wankasantona mampo gagaloleidie. Iawe God gagalowa Isikel waneno apana nuaitumodie naita mo kainokaino Iawe God adiananasampa, me emalawoa apanawa waubamopio wimopue mo onau enapue ita mo bolau debama Ierusalem do kadiidamopu. Mo God aiawa mai ruawantoipono baiwa tawo Babilon apanawa wimone Ierusalem kadiidasaiena. God bauta wana rua.
Isikel God gagalowa Israel apanawa diamodia mo insaisau leusape kadiwa epe dodomanantope God emawe wanwanbu eulepono me mo bolau sanaasapono eulepona.
2
Isikel ipa peroweta God sonaben
Sorodia wimone Isikel ita Iuda apanawa otamone antone Babilon bedewe teamoieno waimoie, Isikel auen rua bedewe uba wadenaubeno me God sapawa debamaia kiboraleidia ewedie.
1 Ne Iawe God sapawa debamaia kiboraleidia ewane tawo osowe dunenten. Ne dunentene etedino apana da gagalolene wanase, “E apanaida,*Apanaida, sa ipa tawo ema osowe apana waimoia umawa wade. enawiewo ne manawo gagalonteapa.” 2 Me gagaloleidio bedewe God aleupa ne nopenene wadaposineno enana. Ita enane me mida gagaloleidia asisusadine. 3 Me wane wanase, “E apanaida, ne e waubaedina Israel apanawa mo mida mapo nosinosiu ne adianananene aiana mai ruantopona rua dewantoie waimoia mampo aita. 4 Ne dima wadina mo mai eteipe ruawantoipona ita wiwiranantoipona, sa baiwa ne e waubaedina aite dima ne Warere Iawe God mo baibu wadina diamoa. 5 Apana sa aia etadabuala, naita e aiaa etapue dabuantopu ba ruantopua sa ide, tane mo atentopu peroweta mo bedeuwo wisene gagalolen.”