14
Apana Moses ita Aron mampo momoduntoi
Ita Israel apanawa uduudu ke debamaia waio aiau moinawa oden, ita mo tadino ke wakasanton. Mo uduudu Moses ita Aron mampo momoduntone waienase, “No enepono Isibtiwa wainipe bontepona ba enepono mape sala makowa bedewe bontepona. Dima baiwa Iawe God banlaneno bola emawo odeitana ita apana ewanepue epanepubolepi? Ita ema aupe mo no manamanainamba ita obainimba otamopue mampomopu diburala ruau. Sa baiwa eulena no leuntate Isibtiwa ana.” Ita mo muba gagalontone waienase, “No uwamba apanawa sonabeta me banlanepio leuntate Isibtiwa ana.”
Tane Moses ita Aron mo epe momoduntoio etamone Israel apanawa uduudu danauwo aisintone dunentone nambu dogo osowe ien. Ita Nun otopa Iosua ita Iepunes otopa Keileb, mo nata iwu apanawa do iwuntoie bola ewamoie laia nuau pareidaleno garau wadapuiamoiena. Ita mo Israel apanawa uduudu diamone waienase, “No antene bola sa uduudu ewatatuwan ita bola sa ipa eudida. Naita Iawe God no mainimbo nuawa eulempa me no banlanepie wimpie bola ema nenepio bedewe wanta. Bola sa ipa maurala ita irai inidewantoie winei do pue uara waimoi. Tane e mai Iawe God adiananasana, dia. Ibru 3.16 Ita no bola sa apanawaida nanaumote aimota rua, sa baiwa e mai apana sa sauitana. Iawe God ipa no do, mo mai saubu apanawa da adiwo eneipona saumopi, dia. Sa baiwa e mai mo sauitana, dia.”
10 Ita apana uduudu waiena mo seu otepe Iosua ita Keileb epaboiamopona. Tane Iawe God sapawa debamaia Israel apanawa uduudu ape kakaiwa danawe eneio mampo segalen.
Iawe God Moses diena apana banlamopie leulepie sala makowa bedewe alepi.
Iawe God wadia me apanawa matangelamopi
26 Tane Iawe God Moses ita Aron diamone wanase, 27 “Apana ema kadiu walama dainea ne mainawo momoduntoia epu? Ne Israel apanawa mainawo momoduntoie wakadisaneio etamona. 28 E ema epe wane diamona,
‘Ulaipa, e dima walano ne asinawo etana rua dewasapa. 29 E uduudu mida ne mainawo momoduitena enala 20 ita odene su alena ona baiwa wisialeiena sala makowa bedewe boitana. Ibru 3.17 30 E uduudu bola saualena bedewe ne itulepono wampona mai wilena rua, dia. Tane Iepunes otopa Keileb ita Nun otopa Iosua mo os bola sawo odapu.
31 E momodulala walanase, No emalawoamba apanawa wimopue obainimba kerakera otamopue antopu, tane ne, Iawe God mo wadamope wimpe bola sauala kanaan bedewe e mai odaoda menaleiponawo teamopa. 32 Tane e sala makowa bedewe boitana. 33 Ita ena 40 bedewe obanla gamo onionia apanawa ruau sala makowa bedewe waimompo ideita e uduudu boitanatuwapi. Ipawa e mai ne aiana etape ruawaitapona baiwa e sedala nuaparentopue poka etapu. Aposel 7.36
34 E bola ewaitusaile leilano walama 40 dialena rua ne e matangelalepo ena 40 dialepi, ita walama sa deadea matangelawa ena deadea matangelalepa. E ne dewanealano onala apanawa segantena baiwa ne e dewalepo pokaida etana.’ 35 Ne, Iawe God, wadina ipawaida dewasape apana ema ne onana eneie adianananeia bomopa. Mo mape sala makowa bedewe bontopuo aupau winepi.”

14:9: Ibru 3.16

14:29: Ibru 3.17

14:33: Aposel 7.36