4 Tane mo wadi Oa enee Edom tawowa panape antopona ene Owa Bumawa intawa asiasi antoie into etedabuantoiena. 5 Mo God ita Moses mampo momoduntone waienase, “E dima baiwa no Isibtiwa wainitano banlaneano mape sala makowa bedewe winena bontata baiwantitana? Mape nana ita esa dia, no nana deawa os nate dabuaidanten.”

6 Sa baiwa Iawe God mota onawau mo mampo waubaleno ita Israel apanawa uara adamono bontoiena.✡1 Korint 10.9 7 Israel apanawa Moses mampe wimone waienase, “No kadiwaida dewasatana God mampe ita e manawo. E Iawe God mampe rauparitawo mota no mainimbo diantopu.” Sa baiwa Moses Iawe God mampe rauparilen.

8 Iawe God Moses diene wanase, “E mota onawaa aleupa dewasae ia osowe seua. Ita mida mota adena mota sa aleupa ewepie inalepi.” 9 Sa baiwa Moses irama mampe mota aleupa dewasane ia osowe itun.✡2 Kin 18.4; Ion 3.14 Ita apana mida mota adedia me mota sa aleupa ewedie inaleide.

10 Tane Israel apanawa antoie bola Obot bedewe saradountone waimoie. 11 Ita mo bola Obot ene antone Ie-abarim bedewe wimone saradountoiena. Bola sa sala makowa bedewe Moab tawowa moawa do omo wisediawo winede. 12 Ita mo sape waimoie ene antone doba Sered bedewe saradountone waimoie. 13 Tane mo sape waimoie ene antone doba Anon waiwa dauwo saradountone waimoie Amori apanawa tawou moawa osowe sala makowa bedewe. Tane doba Anon sa ipa Amori ita Moab apanawa ita Amori apanawa tawou endipundede.

21 Tane Israel apanawa gagalou benemalala waaubamoieno Amori apanawa warereu ebowa Sion mampe antone wane waienase,

22 “No menanedia e bolala bedewainta antata, tane antonte e iraila bedewe mai odata, dia. No e esala mai da utate nata, dia. Tane no warere intawa alena asiasi antonte e bolaa etaiata.”

23 Tane warere Sion mai menasapona Israel apanawa me bolawa bedewainta antopu, dia. Me sorodiawa uduudu diamono auweieno ita Israel apanawa sala makowa bedewe dommopua baiwa anton. Ita mo antone bola debama Iaias bedewe wimone Israel apanawa do onanton. 24 Tane Israel apanawa mukantone isima mampe warere Sion onawa enane nanausane aneiena. Ita warere tawo Anon esawa noseidiawo ita alene Iabok esawa makawa wadane mamposaiena. Tane Iabok sa ipa Amon apanawa bolau makawa enenpunden. Ita Amoniwa bolau makawa badowa bodeiena, sa baiwa Israel apanawa mai wimope odapona, dia.

25 Ita Israelwa Amori apanawa bolau uduudu ita do bola debama ebowa Esibon ita bolawa kerakera do wadane mamposane bedewe waimoie.

31 Israelwa epe dewantone Amori apanawa bolau wadane mamposaiena. 32 Ita Moses iwu apanawa waaubamono bola debama Iase ita do bolawa kerakera bedewainta antone ewaitusaiena. Ita mo Israelwa do antone bola Amori apanawa sape waimoia tanamoiena. 33 Ita ema aupe mo leuntone Basan bolawa intawa asiasi odane antoiena. Ita Basan warerewa Ogi me sorodiawa uduudu do Edirei bedewe ona baiwa nomon. 34 Ita Iawe God Moses diene wanase, “E mai me sawaitaa, ne me ita me apanawa uduudu ita me bolawa uduudu e witaawosadina kadimoa. E Amori apanawa warereu ebowa Sion bolawa debama Esibon bedewe wandio mampe ambi dewasaana ruaida me mampe dewasaa.” 35 Sa baiwa mo antone Ogi ita obampa mona ita do me sorodiawa onau enane aimoiena, mai da inawaa wampona, dia. Ita me bolawa mo wadane mamposaiena.