1 Tesalonika
Teik pasi Pol hani teka kahikahi Jises Krais ti Tesalonika
Kakain ti haxewai teik pepa ie
Pol tel aposel tai teik pas ie hani teka kahikahi Krais ti Tesalonika lokon ti i toto tehu taon Korin. I sohot sai 20 ahang muhin ti Jises moih aliawa ape Haeu waxi i hani tesol tonan. Tesalonika tehu taon lalap peixux ti texux xux Masedonia. Kilan ti teka seilon ien laha kumahe Ju. Ti Pol Tesalonika, i kakaxi meng solian ti Jises Krais ape teka laha soh ti Jises (Apo 17:1-10). Teka masiwi ti teka Ju laha namiloi halialu Pol ma tesol tuaun ape laha usi xaxaweni lato nake laha watakai teka Ju lotui Jises Krais. Imuh Pol talo Timoti puas hani kapi teka kahikahi Krais ti Tesalonika. Ti i aliama i kaxi meng tenen i hamuamua Pol sale puasalato. Ti he teik pepa ie Pol kak kemulik hani Haeu nake teka Tesalonika tu xox ti Jises Krais kalak lato tunahi kawatan tenen tenen ma tin lato to nanameni i Pol hetekie wawahen. Tin i nexi hani lato sale xahatai seilon ti matemate ma hakui lato ti haxoxo tatalei namilolato ti Krais.
1
1 Kakai Pol, Sailas ma Timoti hani teka kahikahi Jises Krais ti tehu taon Tesalonika, teteka amuto se seilon ti Haeu ma Jises Krais tel Masiwi.
Amite kamei Haeu aile kola haniamuto lalape soliaian ma hatona hasoliai tiamuto.
Pol kak kemulik hani Haeu ti xoxoi namili teka Tesalonika
2 Tapai na amite lotu huali amuto, lawe amite kak kemulik hani Haeu ti amuto hatesol. 3 Na amite lotu hani Haeu tel Tamakako, lawe i hanamena amite sale soliai puasamuto nake amuto soh hawane ti Krais. Amite namiloi hetekie sale puasamuto ti hualiai seilon liai nake amuto waheni hawane laha ma xoxoi tutuhamuto nake amuto monomon hawane atengiai Jises Krais tel Masiwi ti kako.
4 Teka akikimite ti Krais, amite tioi ka Haeu waheni hawane amuto ma i kilamiwen amuto tetan. 5 Amite tioi nake ti amite kaxi ahuti hani amuto meng solian ti Jises, kumahe tuahe kakaiamite. Amite kaxi hehetekie kui pohe Holi Spirit ti i pupuas wasolakako ape amuto soh hawane. Tin amuto tioi ka ti amite toto kapimuto, lawe amite huali hasolia amuto. 6 Amuto puas usi hahawane amite ma Jises tel Masiwi. Kalak laha axi amuto kawatan tenen tenen, amuto hong usi tatale kakai Haeu hetekie amuam ti Holi Spirit hahani amuto. 7 Aile ape amuto sohot seilon tetenen ala teka kahikahi Jises ti xux Masedonia ma Akaia puas usi.
8 Kumahe mewenae teka seilon ti Masedonia ma Akaia hongoen amuto kaxi ahuhuti meng solian ti Jises Krais. Seilon ti tesol tesol laha hongoen xoxoi namilomuto ti Haeu, aile ape amite kum kaxi aheke. 9 Teka seilon ien laha to kakak ka amuto hong soh kakaiamite ape amuto waxi auni amite. Tin laha kakaxi ti amuto tale tehitomuto hani lotuiai waliko tenen tenen ape amuto hana tupuamuto ailei puase Haeu wanen tel pate pohen. 10 Laha kakak hetekie sale monomon ti amuto atengiai tel Nati Haeu ti tesol tonan, tel ti Haeu hamoiha aliakewen. I Jises Krais tetel awaiai seilon ti kawatan ti lengei Haeu nake ti lialui woukaha.