1 Ya weki neke pa꞉ta꞉ dupa alome. Mo Koda꞉na꞉ a꞉ta꞉ma꞉ homa꞉la꞉ ekita꞉ mo nika꞉ Ketiso Yesu ame̱le̱ ta꞉ma꞉ni pitolo hata꞉ minoloma꞉me. Koto a꞉ta꞉ma꞉ homa꞉la꞉eki nakana꞉ma꞉ minele ekina꞉ta꞉ honkopu hao hapeke. 2 I̱ma꞉ wanda꞉hali eleke elekena꞉ leke popelekena꞉ waloeke opi mana꞉ pi manuta꞉ kota꞉ nakana꞉ma꞉ meaata꞉ mo hone epeke tupa꞉ u paleke hata꞉ mandane da wanda꞉hali ana꞉na꞉ wala꞉peke ya꞉la꞉ wanda꞉halita꞉ nakana꞉ma꞉ moka꞉la hale hale pea꞉peke.

3 Ketiso Yesuna꞉ epeke a꞉nda꞉ peaasa꞉ hali hata꞉ mo ipika꞉ wanda꞉halina꞉ ka꞉nda꞉ma꞉ homa꞉la꞉ ekina꞉ ka꞉nda꞉ mandaneeki nakana꞉ma꞉ mea꞉peke. 4 Ami hali homekema꞉ ami hali hata꞉ta꞉ ipika꞉ you halina꞉ kakena꞉ homu haluekema꞉ pa mo da wanda꞉halina꞉ pu haleme haumanu tonka꞉na꞉ apa꞉tao na pilieke. 5 Kutupa make mo telepo tiekemanu lo hala꞉ halima꞉ta꞉ mo telepona꞉ pi ula꞉ ekimanu na tolu haya꞉ka꞉na꞉ta꞉ kota꞉ tombo watao yenki mia꞉peke na ya꞉la꞉me. 6 E handeteke hala꞉ halima꞉ ipika꞉ e tieke wopu poko hala꞉ ekina꞉ta꞉ mo ena꞉ ne tanu ekita꞉ ipika꞉ amba꞉la milieke. 7 I̱ma꞉ alo pita꞉ hone wopu wia꞉peke. Koto pi hone uelena꞉ta꞉ Tekehalima꞉ neke tamba꞉ milieke.

8 Nakana꞉ma꞉ mo hande homa paa tiaeyeke yeke Deipidina꞉ tapake hali Yesu Ketiso hone u hapeke. I̱ma꞉ mo Pi Seliapo waloa꞉ka꞉na꞉ta꞉ kota꞉ koto pi kone walo halome. 9 I̱ma꞉ do Pi Seliapo walo halo ekina꞉ ka꞉nda꞉ tieke mu halome. Kutaa make I̱ta꞉ pi yamba꞉la꞉la꞉ hoke hali leke seni puma꞉ tonkao uleke halome. I̱ta꞉ koto pa꞉leke halopate pa Koda꞉na꞉ pita꞉ kutupe seni puma꞉ na tonkao ula꞉me. 10 I̱ma꞉ mo Koda꞉ma꞉ ma̱leke lila꞉ wanda꞉hali tamba꞉ muluekema꞉ do ka꞉nda꞉ paeyaota꞉ na kiake mea tu halome. Mo wanda꞉halita꞉ Ketiso Yesu pa꞉ta꞉ yama꞉ a꞉pa꞉la꞉ na paelo pa꞉la꞉ pa̱a̱ tiekema꞉ wina꞉ la꞉la꞉ da꞉taasa꞉eki mina꞉yeke I̱ma꞉ do ka꞉nda꞉ tu moneao halome.

11 Dota꞉ ota꞉ pi alo pie.

14 Do ekita꞉ naka꞉ wanda꞉hali hone u tiaaso hata꞉ la halo hapeke. Kutu pika꞉na꞉ta꞉ kota꞉ Koda꞉na꞉ leke popelekena꞉ iki kinki pitolo hata꞉ta꞉ dupa lapeke. Ikana꞉ma꞉ mo pi teke manuna꞉ tekena꞉ta꞉ pi yokaalu alu pu ape ape na lapa꞉peke lapeke. Kutu piki hauma꞉ta꞉ ma꞉nda꞉ na tamba꞉ mulu pa꞉la꞉pate mo opilimi wanda꞉hali pa꞉ta꞉ta꞉ paa hoeyaasa꞉eki homeke wilieke.

15 Nakana꞉ma꞉ ota꞉ epeke e poka꞉la꞉ hali haluekema꞉ta꞉ neke yala꞉ peaama꞉na꞉ naka꞉ titina꞉ honeta꞉ Koda꞉ma꞉ I̱ pa꞉ta꞉ ta꞉na꞉ma꞉ homena꞉e hone witolo hata꞉ e poko hapeke. Koda꞉na꞉ ota꞉ pi tikitiki wala꞉la꞉ hali hata꞉ta꞉ koto hau pu hapeke. 16 Mo wanda꞉hali Koda꞉ mina꞉pa꞉lao papate haena꞉ la꞉la꞉ epe na piki Koda꞉ mataake pimanu la kiteme pi manuta꞉ hoki wala kiao pua꞉peke. 17 Koto Koda꞉ mataake pi la kita꞉la꞉ pita꞉ mo mindiki na꞉paasa꞉ bolekema꞉ handa꞉la꞉me. Kutu piki pita꞉ yaapo hali Haimeniasi pita꞉ Pailita꞉si yaapoma꞉ walepeme. 18 Koto hali yaapoma꞉ta꞉ mo ota꞉ haumanu mina꞉pa꞉laepeme. Kutu polo hata꞉ mo nika꞉ homa paa tialo poloma꞉ ekina꞉ ipilikana꞉ma꞉ alota꞉ Nikita꞉ amba꞉ homa tiao haloma꞉me alepeme. Koto alepe ekima꞉ta꞉ mo mandane pi mina꞉la꞉ wanda꞉halina꞉ hone tulaaseme ekita꞉ hoeyaasepeme.

19 Koda꞉ma꞉ nokopeeke taka꞉lake pinkita꞉ da̱o̱la꞉pa pa꞉la꞉me. Koto pinkina꞉ pi yaapo wape pea ula꞉ ekita꞉ dupa. Tekehalima꞉ ipika꞉ wanda꞉halita꞉ ipika꞉ amba꞉ hando ulume laa wape pea ula꞉me. Kutupa pi ma꞉nda꞉ make dupa. Ma꞉nda꞉ hali epima꞉ I̱ta꞉ mo Tekehalina꞉eki halome lea꞉ka꞉na꞉ta꞉ kota꞉ mo hokeeki paeyao ota꞉ mina꞉pa꞉lao hoki walaa pua꞉peke ya꞉la꞉me pi yaapo wape pa꞉la꞉me.

20 Mo hamoko da tieke pa꞉ta꞉ta꞉ paata꞉ piki make noka꞉ wiki kawaso ta꞉ta꞉ ta꞉ta꞉ pikieki wopu ula꞉me. Mo kawaso manuta꞉ silipama꞉ make koloma꞉ make wa꞉peleme. Kutupa mandane ekita꞉ tima꞉ make kenkema꞉ make wa꞉peleme. Do kawaso mandaneeki manuta꞉ hau tieke pitolo mea꞉pekeeki wina꞉ laata꞉ mandane ekita꞉ pa nate paeyao pa mu hapekeeki wina꞉ la꞉la꞉me. 21 Hali ma꞉nda꞉ epima꞉ mo hoke hau paeyaona꞉ ha̱i̱ a꞉nda꞉ ipiki pa꞉ta꞉ na ta̱le̱na꞉ lea꞉ka꞉na꞉ta꞉ kota꞉ ipikita꞉ ipika꞉ Tekehalima꞉ ta꞉ta꞉ piki hau tieke ma꞉nda꞉ peaena꞉ mea haena꞉ lelieke. Pa ekipeke. Mo somema꞉ ipika꞉ Tekehalima꞉ hala꞉la꞉ epeke emanu pokaaluekema꞉ tikitiki yao ula꞉ ale manuma꞉ handa hala꞉me.

22 Nakana꞉ma꞉ mo wekihali hata꞉ mo wekiwandikima꞉ ika꞉ lokena꞉ hoke hone u alualu pita꞉la꞉ haumanu wendia꞉peke. Nakana꞉ma꞉ mo iki tamba꞉ mina꞉ ika꞉ yako piki pukima꞉ ika꞉ Tekehali o laa wi lo haleme wanda꞉hali ame̱le̱ hata꞉ mo tikitiki piki hau make hone tulaasa꞉eki make pukima꞉ homa꞉la꞉eki make a꞉nda꞉ peliaasa꞉eki make muluekema꞉ hone ha paleke pua꞉peke. 23 Mo teke na wiki o teke na handeke pi yokaalu alu pita꞉la꞉eki manuta꞉ hoki wala pua꞉peke. Pa ekipeke. Koto hau manuma꞉ta꞉ ape ape mea la꞉tialiekeyeke loa꞉me. 24 Mo Tekehalina꞉ e pokaasa꞉ halima꞉ta꞉ta꞉ ape ape na lelieke. Kotoeki na pikita꞉ ipikana꞉ma꞉ wanda꞉hali paeyao pa꞉ta꞉ a꞉ta꞉ma꞉ homolo epeke disa hali hata꞉ ika꞉ pu hoeyaaseme haumanu pa꞉ta꞉ ka꞉nda꞉ma꞉ a̱i̱ na homake yu wia hapeke ya꞉la꞉me. 25 Ipikana꞉ma꞉ mo pi tunkuleleme wanda꞉hali tikitiki yaasota꞉ kimelema꞉ hauma꞉ta꞉ yopu pu halieke. Koto hau a꞉nda꞉ pu haya꞉ka꞉na꞉ta꞉ kota꞉ ikita꞉ Koda꞉ma꞉ iki pa꞉ta꞉ waleke wiaya꞉ka꞉na꞉ta꞉ ika꞉ pukimanu topo pea mo ota꞉ pina꞉ hone ti laemeka꞉na꞉ta꞉ 26 kota꞉ ika꞉ honemanu paa epeke tupa꞉ mea lopao wilimikie. Kutu pimikina꞉ta꞉ kota꞉ ikana꞉ma꞉ Sadanina꞉ hone pa꞉la꞉eki peaena꞉ miniki hala꞉ bisale pa꞉ta꞉ pambelemeeki hola꞉pa yopua halimikie.