1 Mo yeni peao haemeke you haliwekina꞉ you halima꞉ Sidipeni pa꞉ta꞉ lota꞉ pitolo alota꞉ Koto aleme pita꞉ ota꞉ pi alemepe laa leekeme.

2 Sidipenima꞉ ipika꞉ pi hombo peaaso alota꞉ Ya kame apa꞉manuo. I̱ma꞉ alo pi opua꞉pe. Nika꞉ tapake kini pa꞉la꞉ hali Eipoloha꞉ma꞉ta꞉ Hatani nane a̱i̱ na halo peeke pita꞉ mo Mesopoteimia nane pa haena꞉ta꞉ mo hande manda hata꞉ pa̱a̱ peao hala꞉ Koda꞉ta꞉ ipiki pa꞉ta꞉ peneme yao a꞉pa hayekeme. 3 Kutupa Koda꞉ma꞉ ipiki pa꞉ta꞉ alota꞉ Naka꞉ tapake naka꞉ wanda꞉hali make naka꞉ kenke make mina꞉pa꞉laota꞉ I̱ma꞉ walo polo kenke pa꞉ta꞉ pua꞉peke leekeme. 4 Koto leeke pi opuaata꞉ Eipoloha꞉ma꞉ mo Koledia wanda꞉halina꞉ kenke mina꞉pa꞉laota꞉ hande Hatani nane halo peekeme. Eipoloha꞉ma꞉ ipika꞉ ateke homao haena꞉ta꞉ Koda꞉ma꞉ ipiki pa꞉ta꞉ ame do iki haleme kenke pa꞉ta꞉ da yoka epena꞉ leekeme.

5 Koto pita꞉ta꞉ Koda꞉ma꞉ Eipoloha꞉ma꞉ ota꞉ ipika꞉ kenke wina꞉yeke kenke hosiki alesiki kone ma꞉nda꞉ na haleekepate Koda꞉ma꞉ pi la꞉ witolo Eipoloha꞉ma꞉ pa꞉ta꞉ make ipika꞉ hoki nane hatiki polo peleme wanda꞉hali pa꞉ta꞉ make ota꞉ kulueke laa leekeme. Koda꞉ma꞉ do pi la꞉ wieke natena꞉ta꞉ Eipoloha꞉ma꞉ma꞉ta꞉ weki ma꞉nda꞉ make na mendiki hayeke dina꞉ leekeme. 6 Koda꞉ma꞉ ipiki pa꞉ta꞉ pi dupa leekeme. Naka꞉ hoki nane halo peleme wanda꞉halita꞉ kenke ma꞉nda꞉ nane halo pelimikie. Koto kenke nane pua hata꞉ta꞉ pa hameke e pokaaso tanda mua꞉tiki pulu hata꞉ta꞉ bapi 400 bapimanu hao halimikie.

7 Kutu pulu pelemepateta꞉ mo e pa hameke pokaape lolo peleme wanda꞉hali pa꞉ta꞉ I̱ma꞉ panisi peaalueke laa kutupa wetepena꞉ naka꞉ tapake wanda꞉halima꞉ta꞉ koto kenke nane mina꞉pa꞉lao do hale pa꞉ta꞉ a꞉pa I̱ pa꞉ta꞉ panda꞉puniao yeni pilimikie laa leekeme. 8 Koto hoki naneta꞉ Koda꞉ma꞉ Eipoloha꞉ma꞉ pa꞉ta꞉ pi la꞉ wiekeeki tombo witolo hata꞉ ipiki pa꞉ta꞉ sekemesaisi hau waleekeme. Kutupa haena꞉ta꞉ Eipoloha꞉ma꞉ma꞉ta꞉ Aisa꞉ke mendia haena꞉ pula꞉ homeke paeyeketa꞉ Aisa꞉ke pa꞉ta꞉ sekemesaisi hau peayekeme. Kutupa Aisa꞉kema꞉ta꞉ Dieikope pa꞉ta꞉ sekemesaisi hau piekeme. Kutupa Dieikopema꞉ta꞉ mo hande tapake tapake kini pieke 12 haliweki pa꞉ta꞉ sekemesaisi hau peayekeme.

9 Mo hande tapake tapake kini pieke haliwekima꞉ta꞉ Diosepe pa꞉ta꞉ honditi pitolo hata꞉ ipikita꞉ Idiepi nane hata꞉ pa hameke e pokaasa꞉ hali halo pena꞉yeke mani muluekema꞉ ma꞉nda꞉ma꞉ hambena꞉ lemekeme. Kutu pimikipate Koda꞉ ipiki yaapo hata꞉ta꞉ 10 ipika꞉ ka꞉nda꞉ pa꞉la꞉ ekimanu paeyao minolo haena꞉ kone Koda꞉ma꞉ ana꞉na꞉ handeteke hayekeme. Diosepeta꞉ mo Idiepi you hali Petou pa꞉ta꞉ pua hayeke dina꞉ta꞉ Koda꞉ma꞉ ipikita꞉ kipa baake hone wiki hali make hone lenkena꞉ pea wiki hali make haena꞉ leekeme. Kutu pieke ekima꞉ Petouma꞉ Diosepeta꞉ Idiepi nane kapomani you hali pitina꞉ laata꞉ ipika꞉ da kenkemanu paeyao make handeteke haena꞉ leekeme. 11 Koto hoki naneta꞉ mo Idiepi Keinani kenke yaapo paeyao pa꞉ta꞉ tea꞉ ki tieke epeeke handaata꞉ wanda꞉hali wopuma꞉ ka꞉nda꞉ma꞉ homa yapemekeme. Nika꞉ apa꞉mei amedama꞉ta꞉ nemanu ma꞉nda꞉ na handa꞉ wimikime. 12 Koto ekina꞉ Dieikopema꞉ta꞉ Idiepi nane nemanu ula꞉me lemekeeki opuaata꞉ ipika꞉ eiyeketiti hande nika꞉ apa꞉mei ameda kone titi panake pa꞉ta꞉ koto pa꞉ta꞉ tapaeyekeme.

13 Pa hoto yaapo peao paa tapaeyeke pita꞉ta꞉ Diosepema꞉ta꞉ ipika꞉ hameketiti pa꞉ta꞉ ipiki peneme yao la haleekeme. Kutu pieketa꞉ Petouma꞉ Diosepe ipika꞉ tapake wanda꞉halie lemeke ekita꞉ opua hone wiekeme. 14 Koto ekina꞉ Diosepema꞉ta꞉ ipika꞉ ateke Dieikope pa꞉ta꞉ pi la꞉ moneaaso alota꞉ Neke make neke ame̱le̱ tapake wanda꞉hali paeyao make Idiepi nane ipupe laa leekeme. Mo wanda꞉hali paeyaota꞉ 75 wanda꞉hali haemekeme. 15 Kutupa Dieikope Idiepi nane pua haota꞉ ipiki make nika꞉ apa꞉mei ameda make koto pa꞉ta꞉ hao homemekeme. 16 Ika꞉ toko manuta꞉ Sekeme kenke pa꞉ta꞉ mea pua hoimikime. Koto hali lapa꞉ pu haemeke kenketa꞉ amba꞉ Eipoloha꞉ma꞉ma꞉ Heimona꞉ tapake pa꞉ta꞉ manima꞉ hambeeke kenkee.

17 Hande Eipoloha꞉ma꞉ pa꞉ta꞉ Koda꞉ma꞉ pi la꞉ wiekeeki ota꞉ yao peaalo pieke nate mo Idiepi nane nika꞉ tapake wanda꞉halita꞉ tapake tieke kone haemekeme. 18 Koto pita꞉ma꞉ta꞉ you hali ma꞉nda꞉ tiao Idiepi wanda꞉hali handeteke hayekepate Diosepe hayekeeki ipikana꞉ma꞉ na handeekeme. 19 Nika꞉ tapake wanda꞉hali pa꞉ta꞉ ipikana꞉ma꞉ makeatiki pea puki tandama꞉ homaatiki piekeme. Panake hamba꞉ mea mendimiki wekisunu da pa꞉ta꞉ na mondu wia pitina꞉ leke pa hama꞉ nane homena꞉yeke mondu batiki pina꞉ leekeme. 20 Koto pita꞉ta꞉ Mosesita꞉ epeke weki seliaposikita꞉ inkikima꞉ mendiekepate pa da tukiki nane mea mondu wia pitina꞉ sumba꞉ tepo yapeekeme. 21 Kutupa wetepena꞉ hama꞉ nane mea pua nuna꞉ pala꞉mba꞉ hao wieke alena꞉ Petouna꞉ wanekema꞉ mea puna daeyaota꞉ ipika꞉ weki kone haena꞉ leekeme. 22 Mosesima꞉ta꞉ mo Idiepi haliwekima꞉ epeke honemanu wia pu haemekeeki paeyao sukulu peata꞉ pi pi lo haemeke ekimanu make pea꞉peke ekimanu make ipikana꞉ma꞉ handa꞉ wia pitolo hata꞉ hali tieke hayekeme.

23 Mosesita꞉ ipika꞉ bapi 40 paeyeketa꞉ ipika꞉ Isulai tapake wanda꞉hali handolo peekeme. 24 Idiepi hali homekema꞉ Isulai hali ma꞉nda꞉ liekeeki Mosesima꞉ handaata꞉ mo hali tamba꞉ minolo hata꞉ mo Idiepi hali ota꞉ liekeme. 25 Mosesi ipika꞉ honema꞉ta꞉ Koda꞉ma꞉ I̱ ma꞉la꞉ ekita꞉ iki mea tapaano pa꞉la꞉me laata꞉ wanda꞉halima꞉ koto hone witelememe hone wiekepate mo Isulai wanda꞉halima꞉ koto hone na wimikime. 26 Da ma꞉nda꞉ kelepeeketa꞉ Isulai hali yaapo a꞉nda꞉ pitolo haepekeeki Mosesima꞉ handaata꞉ pua sa꞉sa꞉ pitolo alota꞉ Hali yaapo opua꞉pe laa Ipilikita꞉ hama̱la̱꞉e. Ekipeke ipilika꞉ kone a꞉nda꞉ pitelepepe laa leekeme. 27 Koto leekepate mo hali ma꞉nda꞉ yumbieke halima꞉ Mosesi pendulu baaso alota꞉ Neketa꞉ nika꞉ you hali hata꞉ pi yokaalu peaalo pa꞉la꞉ halita꞉ epima꞉ neke mea haena꞉ lea꞉pe. 28 Hande nakana꞉ma꞉ ambaneke mo Idiepi hali litolo pi tupa꞉ I̱ make luekema꞉ alepe laa leekeme. 29 Mosesima꞉ koto leeke pi opuaata꞉ Idiepi nane mina꞉pa꞉lao pindipa pua mo Midiani nane halo peekeme. Koto pa꞉ta꞉ hata꞉ta꞉ weki yaapo mondu wiekeme.

30 Bapi 40 yapeeketa꞉ Mosesita꞉ mo Sainai pote teke pa꞉ta꞉ hapu hayeke alena꞉ haena꞉ta꞉ ti to hayeke alena꞉ mo ti uleke pa꞉ta꞉ hata꞉ enisolo ma꞉nda꞉ta꞉ Mosesi pa꞉ta꞉ peneme yao waleekeme. 31 Mosesima꞉ leke opo handake witolo hata꞉ mo ti teke pa꞉ta꞉ wotu handuluekema꞉ peekepate Tekehalima꞉ leeke pi make opiekeme dupa. 32 I̱ta꞉ naka꞉ apa꞉mei amedana꞉ Koda꞉ halome laata꞉ Eipoloha꞉ma꞉ Aisa꞉ke Dieikope amedana꞉ Koda꞉ halome la leekeme. Mosesima꞉ pututuma꞉ homolo hata꞉ na handa꞉liaeyekeme. 33 Mo hande Tekehalima꞉ ipiki pa꞉ta꞉ alota꞉ Neke hale kenketa꞉ yakopiki kenkee. Naka꞉ anke dake holo wie. 34 Ya Idiepi nane haleme wanda꞉halita꞉ tanda tieke mu haleme ekita꞉ I̱ma꞉ handolome. Ika꞉ e̱ alo hata꞉ kememe kememe pu halemeeki manuta꞉ I̱ma꞉ opuaata꞉ iki tamba꞉ muluekema꞉ hola꞉pa꞉niaalo a꞉pa pua꞉me. Neke do pa꞉ta꞉ leke epoe la alota꞉ Neketa꞉ mo Idiepi nane tapaalueke laa leekeme.

35 Hande Isulai wanda꞉halima꞉ta꞉ Mosesi kiaemekeme. Neketa꞉ nika꞉ you hali hata꞉ pi yokaalu peaalo pa꞉la꞉ hali halena꞉ neketa꞉ epima꞉ mea haena꞉ lea꞉pe laa lota꞉ pimikime. Koto hali koneta꞉ you hali hata꞉ tamba꞉ mina꞉la꞉ hali haena꞉ Koda꞉ma꞉ mea tapaeyekeme. Mo enisoloma꞉ handeteke haena꞉ Koda꞉ma꞉ tapaeyekeme. Hande ti to hayeke ale pa꞉ta꞉ hata꞉ Mosesi pa꞉ta꞉ peneme yao waleeke ekima꞉ tapaaso piekeme. 36 Mosesima꞉ mo wanda꞉hali Idiepi nane mina꞉pa꞉lao hatuku puaata꞉ mo Idiepi nane make mo Wepiki Dawala Ikali pa꞉ta꞉ make mo hapu hayeke ale pa꞉ta꞉manu make ipikana꞉ma꞉ bapi 40manu mo wanda꞉hali hatuku pominolo hata꞉ na hando haemeke hau tieke tieke pia꞉tiki piekeme. 37 Ipikana꞉ma꞉ mo Isulai wanda꞉hali pa꞉ta꞉ hali ma꞉nda꞉na꞉ dupa leekeme. Koda꞉ma꞉ I̱ tapaeya꞉ tupa꞉ iki pa꞉ta꞉ potopede hali ma꞉nda꞉ make tapaalieke. Koto someta꞉ ika꞉ tapake hali kone tapaalieke laa leekeme. 38 Ipiki make mo Isulai wanda꞉hali ame̱le̱ mo hapu hayeke alena꞉ momba꞉la haemekeme. Ipikita꞉ nika꞉ apa꞉mei ameda ame̱le̱ koto pa꞉ta꞉ hayeke halie. Mo Sainai Pote pa꞉ta꞉ hande ipiki pa꞉ta꞉ pi leeke enisolo yaapo hayeke halie. Koda꞉ma꞉ ipika꞉ da꞉ta꞉la꞉ pi niki pa꞉ta꞉ la kina꞉yeke Koda꞉ma꞉ ipiki pa꞉ta꞉ la haleekeme.

39 Kutu piekepate nika꞉ apa꞉mei amedama꞉ Mosesima꞉ leeke pi opua꞉peke ekita꞉ kiaemekeme. Idiepi nane paa la꞉ka꞉la polumeke hone witolo hata꞉ Mosesi pa nane pendilaemekeme. 40 Ikana꞉ma꞉ Etoni pa꞉ta꞉ alota꞉ Nakana꞉ma꞉ niki hatuku polo peleme koda꞉manu wepiae. Mo hande Idiepi nane hamono niki hatuku epea꞉ hali Mosesita꞉ hane pa꞉la꞉pe niki na handoloma꞉me lemekeme. 41 Koto lemeke pita꞉ta꞉ mo wanda꞉halima꞉ kao sikima꞉ handeke ale wepia wiaata꞉ koto ale pa꞉ta꞉ ma꞉na꞉ lia halaata꞉ ikana꞉ma꞉ kone ika꞉ kikima꞉ wepieke ale ta꞉na꞉ma꞉ homolo hata꞉ ne pambaemekeme. 42 Kutu pimikipate Koda꞉ma꞉ta꞉ iki hoki la꞉ka꞉laata꞉ oli ya nane hala꞉ hombulanka꞉manu pa꞉ta꞉ mo wanda꞉halima꞉ panda꞉puniao pa yeni pina꞉ leekeme. Hande buka pa꞉ta꞉ potopede haliwekima꞉ wape pa꞉la꞉eki dupa

44 Nika꞉ apa꞉mei amedama꞉ta꞉ mo hapu hayeke alena꞉ haemeke pita꞉ta꞉ mo hande tukiki pa꞉ta꞉ Koda꞉ hayeke palai data꞉ iki pa꞉ta꞉ hayekeme. Koto data꞉ Koda꞉ma꞉ Mosesi pa꞉ta꞉ pi la halolo hata꞉ pikisa make waleeke tupa꞉ Mosesima꞉ a꞉eyaena꞉ leekeme. 45 Kutupa hao hao pea wetepena꞉ta꞉ nika꞉ apa꞉mei amedama꞉ta꞉ mo hande palai data꞉ ika꞉ apa꞉ ameda pa꞉ta꞉ meata꞉ ika꞉ kone mea tia pua꞉tiki pimikime. Diosua make mandakena꞉ puaata꞉ hande Koda꞉ma꞉ tolu lieke tapake wanda꞉halimanu ika꞉ kenke pa꞉ta꞉la minolo hata꞉ mea tia pemekeme. Kutupa koto kenke pa꞉ta꞉ mo palai da a꞉eya pa ha pelia haena꞉ kone Deipidi make opolo a꞉pa hayekeme. 46 Koda꞉ma꞉ mo Deipidina꞉ hayeke haumanu handaata꞉ ipiki pa꞉ta꞉ ta꞉na꞉ma꞉ homeekeme. Koto ekina꞉ Deipidima꞉ ipika꞉ apa꞉mei hali Dieikopena꞉ tapake ika꞉ Koda꞉na꞉ da a꞉eyaluekema꞉ Koda꞉ pa꞉ta꞉ I̱ma꞉ a꞉eyaano lae laa honke leekeme. 47 Koto leekepate Solomonoma꞉ Koda꞉na꞉ da a꞉eyaeyekeme.

48 Kutu piekepate ota꞉ oli manda hala꞉ Koda꞉ta꞉ haliwekima꞉ kikima꞉ a꞉eyaaseme da pa꞉ta꞉manu na hao hala꞉me. Koto mo hande potopede halima꞉ la꞉la꞉ tupa꞉

51 Iki make hoi pea hao haleme haliwekio. Ika꞉ puki manuta꞉ pi na opita꞉la꞉ wanda꞉halina꞉ pukima꞉ handelememe. Koda꞉na꞉ pi ale opua꞉peke ekita꞉ katake pokeeke hali leke hao halememe. Hande ika꞉ apa꞉mei amedama꞉ mo Holi Sipitidi kiayeke tupa꞉ ikana꞉ma꞉ make kiatiki pitelememe. 52 Ika꞉ apa꞉mei amedama꞉ta꞉ potopede hali homeke pa꞉ta꞉ kone tanda na halemekepe. Hande Koda꞉ ipika꞉ tikitiki yao hala꞉ e pokaasa꞉ Hali epolo piekeeki la haleeke haliwekita꞉ Koda꞉ma꞉ tapaeyeke haliweki kone ika꞉ apa꞉mei amedama꞉ limikime. Ame make ikana꞉ma꞉ koto Hali a꞉nda꞉ lomba limime. 53 Koda꞉na꞉ Lo Pi manuta꞉ enisolo manuma꞉ lopa꞉niao kiekepate ikita꞉ kieke meleme haliweki halemepate ikana꞉ma꞉ koto pi manuta꞉ na opiki pa halememe laa leekeme.

54 Koto leekeeki opua mo haliwekima꞉ ipiki pa꞉ta꞉ soka꞉la꞉ma꞉ wotu homolo hata꞉ kake noka꞉pa haemekepate 55 Sidipeni Holi Sipitidima꞉ tumba hake halima꞉ oli ya pa꞉ta꞉ handa꞉liao Koda꞉na꞉ pa̱a̱ pita꞉la꞉eki make Yesuta꞉ Koda꞉na꞉ popeke nane kikina꞉ tiao haya꞉eki make handolo hata꞉ alota꞉ 56 Handa꞉pe. I̱ma꞉ta꞉ oli ya akolopa꞉ lumba꞉lu bao kutupa Wanda꞉halina꞉ Eiyeke Koda꞉na꞉ popeke nane kikina꞉ oli hala꞉eki handolome leekeme. 57 Koto leekepate mo haliwekima꞉ ta꞉e ta꞉e lo laa ika꞉ katake a꞉mba kutupa mandake dina꞉ a̱i̱ya pua mo hali yola꞉ mea pua 58 da mina꞉pa꞉lao pua toopima꞉ limikime. Kutupa mo wekitisi haliwekina꞉ dau manuta꞉ wekihali ma꞉nda꞉ bikita꞉ Solo koto halina꞉ anke teke pa꞉ta꞉ holo pambaata꞉ 59 kutupa toopima꞉ litolo haena꞉ Sidipenima꞉ yeni pitolo alota꞉ Tekehali Yesuo. Yaka temoko nakana꞉ma꞉ handa꞉ mie leekeme. 60 Kutupa pa tumiki yotuao pita꞉ anekema꞉ e̱ alo hata꞉ alota꞉ Tekehalio. Do haliwekima꞉ hoke hau piteleme ekita꞉ pa na wina꞉ leke nakana꞉ma꞉ paeyaapeke leekeme. Kotoeki lo paeyaota꞉ homeekeme.