1 Kutupa mo Debi Lisita da yaapo nane opolo epepekeme. Ketiso hali homeke Timodi koto pa꞉ta꞉ hayekeme. Ipika꞉ inkikita꞉ Diu wanda꞉ma꞉ kone pi miniki hayeke wanda꞉na꞉ eiyeke hayekepate ipika꞉ ateketa꞉ Kitiki hali hayekeme. 2 Mo Lisita Aikoniomo da yaapona꞉ Ketiso wanda꞉halima꞉ Timodi ipika꞉ pi lao haemekeme. 3 Poloma꞉ ipika꞉ honema꞉ta꞉ Timodi yaapo poluekema꞉ mo some meaata꞉ sekemesaisi hau peaeyekeme. Mo da nina꞉ haemeke Diu haliwekima꞉ Timodina꞉ ateketa꞉ Kitiki halie laa handemeke handa peaeyekeme. 4 Mo daoni pa꞉ta꞉manu pomu lopolo hata꞉ hande Diutuseleme aposolo haliwekima꞉ make handeteke haemeke tondiki haliwekima꞉ make lemeke pi manuta꞉ mo Ketiso wanda꞉halima꞉ hone wina꞉yeke la hala꞉tiki pimikime. 5 Koto ekina꞉ mo hande siosi tapake manuma꞉ hande pi mina꞉la꞉ ekina꞉ honkopu honkopu hao nate paeyao daeyaemekeme.

6 Kutupa mo Pitikia Ka꞉leisia nane yaapo lombei pupa pemekepate mo Holi Sipitidima꞉ mo Eisia nane pi na walena꞉ leekeme. 7 Kutupa Maisia nane teke pa꞉ta꞉ opolo epemekepate Bidinia nane poluekema꞉ pu handemekepate Yesu ipika꞉ Sipitidima꞉ sa꞉sa꞉ piekeme. 8 Kutupa Maisia da nane nepoko nanema꞉ paka꞉lao puaata꞉ lombei pupa puata꞉ Dotoa꞉si da nane hola꞉pa꞉niaemekeme. 9 Timba upama꞉ piki nono pea Poloma꞉ hali ma꞉nda꞉ handeekeme. Ma꞉sedonia hali homekema꞉ ipiki pa꞉ta꞉ honke alo hata꞉ alota꞉ Ma꞉sedonia nane niki tamba꞉ mulu a꞉pa꞉peke laa leeke some homeke handeekeme. 10 Kutupa hande upama꞉ piki nono pikieki handaata꞉ Koda꞉ma꞉ hande Pi Seliapo koto wanda꞉hali pa꞉ta꞉ walomono lea꞉me hone witolo hata꞉ mo Ma꞉sedonia nane poluekema꞉ kuta kone pota꞉ weimikime.

11 Dotoa꞉si da mina꞉pa꞉laota꞉ palai kawasona꞉ pita꞉ mo Sa꞉moteisi da nane tikitikina꞉ opolo puaata꞉ nate ma꞉nda꞉na꞉ Nia꞉polisi da nane opolo poma꞉me. 12 Koto pa꞉ta꞉ hao mina꞉pa꞉laota꞉ mo Ma꞉sedonia nane teke da Pilipai da nane opolo poma꞉me. Koto da pa꞉ta꞉ make Loma꞉ haliweki wopu haemekeme. Koto daoni pa꞉ta꞉ nate mandaneeki haota꞉ 13 kutupa Hoto Pila꞉ Nate nina꞉ mo daonina꞉ pota꞉ kake tieke pa꞉ta꞉ tunkulupa pua ikali tea꞉ nane poma꞉me. Nika꞉ honema꞉ta꞉ koto alena꞉ta꞉ yeni pu hala꞉ alena꞉ hone wiaata꞉ kutupa pitiniao koto pa꞉ta꞉ a꞉pa mombelemeke wanda꞉weki pa꞉ta꞉ pi pi loma꞉me. 14 Wanda꞉ homeketa꞉ Lidiama꞉ mo Daetaeda daoni nane wanda꞉ a꞉pa wepiki alemanu hambo hatiki pina꞉ laata꞉ Koda꞉ pa꞉ta꞉ panda꞉puniao yeni pu haota꞉ nika꞉ pi opia꞉me. Poloma꞉ waleeke pi opina꞉yeke Tekehalima꞉ mo wanda꞉na꞉ puki la꞉ka꞉laeyekeme. 15 Kutupa ipika꞉ tapake ame̱le̱ bapitaisi pea hata꞉ niki pa꞉ta꞉ honke alo hata꞉ alota꞉ Ikana꞉ma꞉ta꞉ I̱ta꞉ pi na tunkuliki Tekehali pa꞉ta꞉ epeke halome hone wimika꞉na꞉ta꞉ kota꞉ ya da pa꞉ta꞉ a꞉pa hao hapa꞉peke lea꞉me. Kutupa honke wopu leeke handa poma꞉me.

16 Hoto ma꞉nda꞉na꞉ hande yeni pu haeme alena꞉ poma꞉pate pota꞉na꞉ ti̱o̱ wandiki ma꞉nda꞉ manda꞉hande puma꞉me. Mo wandikima꞉ta꞉ wetepena꞉ pulu pa꞉la꞉ ekimanu la halolo haena꞉ ipika꞉ teke haliwekima꞉ mani wopu mu haemekeme. 17 Kutupa Polo nika꞉ hoke nanema꞉ teli mea ipulu hata꞉ wi la꞉tiki pea alota꞉ Do haliwekita꞉ ota꞉ oli manda hala꞉ Koda꞉ tieke ipika꞉ e pokaaseme haliweki hata꞉ mo hande deto hala꞉ pota꞉ iki walelememe lea꞉me. 18 Kutupa nate paeyao kutu pia꞉tiki pu haya꞉pate Poloma꞉ ipika꞉ pukima꞉ ka꞉nda꞉ma꞉ homolo hata꞉ la꞉ka꞉la mo temoko pa꞉ta꞉ alota꞉ Yesu Ketisona꞉ bikina꞉ neke pa꞉ta꞉ aloma꞉ mo wandiki mina꞉pa꞉lao opolu bao yopuma lea꞉me. Kutupa koto kone opolu baeya꞉me.

19 Kutu pia꞉pate mo wandiki ipika꞉ teke haliwekima꞉ta꞉ Nika꞉ hone pia꞉ ekina꞉ mani mia꞉tiki puma꞉ ekita꞉ ameta꞉ paeya꞉me laa hone wiaata꞉ Polo Sailasi yaapo da꞉ka꞉pa꞉ minaata꞉ makedi pa꞉ta꞉ yola꞉ mea pua you haliweki pa꞉ta꞉ pitaemekeme. 20 Kutupa mo pi yokaalu peao haemeke haliweki pa꞉ta꞉ hatuku pua alota꞉ Do Diu haliwekima꞉ta꞉ nika꞉ da teke hoeyaasepeme lemekeme. 21 Nikita꞉ Loma꞉ haliwekita꞉ ipilika꞉ walelepe hau manuta꞉ opua pea꞉peke na ya꞉la꞉me lemekeme. 22 Kutupa mo hande momba꞉la pitimiki wanda꞉halima꞉ tonka꞉na꞉ ipiliki pa꞉ta꞉ mineke pankemekeme. Kutupa mo pi yokaalu peao haemeke haliwekima꞉ ika꞉ dau leisi mea bao dopita manuma꞉ yombua baena꞉yeke pi lemekeme. 23 Kutupa mo hali yaapota꞉ wopu yombua baota꞉ dipula da pa꞉ta꞉ mea lopao mo dipula handeteke hayeke hali pa꞉ta꞉ alota꞉ Wopu handeteke hapeke laa pi la halemekeme. 24 Koto pi opuaata꞉ mo hali ipikana꞉ma꞉ oni dipula da ota꞉ tukiki pa꞉ta꞉ mea lopao ipilika꞉ anke meata꞉ tina꞉ talao katolao pitaeyekeme.

25 Kutu piekepate buta꞉hokina꞉ Polo Sailasi yaapoma꞉ Koda꞉ pa꞉ta꞉ yeni pea꞉tiki pea emeli la꞉tiki pipikime. Kutupa mo dipula da pa꞉ta꞉ pitimiki haliwekima꞉ opitolo haena꞉ 26 koto kone yu momeni tieke wotu piekeme. Koto ekina꞉ mo dipula da pinkimanu la꞉ma꞉ la꞉ma꞉ pieketa꞉ koto kone mo hande da pota꞉manu paeyao lomba wieketa꞉ hali paeyaona꞉ seni pumanu pa kone ka꞉la꞉pe pa lopeekeme. 27 Mo dipula handeteke hayeke halima꞉ tiaota꞉ mo dipula da pota꞉manu lomba pa pa pu wiekeeki handolota꞉ dipula haliweki amba꞉ pindipa yopua pimika꞉ta꞉ma꞉ hone witolo hata꞉ ipika꞉ kepete hokulu yola꞉ mea ipika꞉ kone aoluekema꞉ handaeyekepate 28 Poloma꞉ anekehapu wi alo hata꞉ alota꞉ Naka꞉ kone na lia꞉pe. Niki paeyaota꞉ do pambo piluma꞉taa leekeme.

29 Kutupa lamepa mea epo laa mo halima꞉ dipula da tukiki pa꞉ta꞉ ipikana꞉ma꞉ anke hao honda꞉ pambaata꞉ pututuma꞉ homolo hata꞉ paala꞉ pieke handaata꞉ Polo Sailasi yaapo pa꞉ta꞉ lopa꞉niao hali yaapo hama꞉ nane hatuku pua alota꞉ 30 Hali yaapoo. Deto hala꞉eki muluekema꞉ta꞉ eki peonope leekeme. 31 Ipilikana꞉ma꞉ alota꞉ Tekehali Yesu pa꞉ta꞉ hone tulaapeke. Kutu pika꞉na꞉ta꞉ deto hala꞉eki milipikie. Neke make naka꞉ weki wanda꞉ma꞉ make milimikie lepekeme. 32 Kutupa ipiki pa꞉ta꞉ make ipika꞉ da pa꞉ta꞉ pitimiki wanda꞉hali pa꞉ta꞉ make mo hande Tekehalina꞉ pi alemanu walepekeme. 33 Kutupa koto pita꞉ kone ipikana꞉ma꞉ ipilika꞉ hatuku mea pua ipilika꞉ yumbieke alena꞉ ikalima꞉ tandepeekeme. Kutupa koto kone ipika꞉ weki wanda꞉ ame̱le̱ apa꞉tao bapitaisi pimikime. 34 Kutupa ipika꞉ da pa꞉ta꞉ mo hali yaapo hatuku a꞉pa ipilika꞉ ne haleekeme. Kutupa ipika꞉ weki wanda꞉ ame̱le̱ hata꞉ Koda꞉na꞉ pi mimiki ekina꞉ ta꞉na꞉ma꞉ wotu homemekeme.

35 Da kelepeeketa꞉ mo hande pi yokaalu peao haemeke haliwekima꞉ ika꞉ polisi haliweki pa꞉ta꞉ alota꞉ Dipula handeteke hayeke hali pa꞉ta꞉ do pi lolo pupe laata꞉ Mo hali yaapota꞉ pa pena꞉ tapae laa lolo pupe lemekeme.

36 Koto leeke ekina꞉ mo dipula handeteke hayeke halima꞉ koto pita꞉ Polo pa꞉ta꞉ alota꞉ Mo pi yokaalu peao haleme haliwekima꞉ I̱ pa꞉ta꞉ pi dupa la꞉neala꞉me. Koto hali yaapota꞉ pa pena꞉ tapae la꞉neala꞉me leekeme. Koto la꞉la꞉ ekina꞉ ipilikita꞉ do dipula da pao yopu pupe laa leekeme. 37 Koto leekepate Poloma꞉ mo polisi haliweki pa꞉ta꞉ alota꞉ Dikana꞉ma꞉ta꞉ hau ma꞉nda꞉ na pupa꞉pate wanda꞉hali handa꞉ potopoto la haena꞉ kone diki yumbua baememe. Dikita꞉ Loma꞉ Kapomanina꞉ pamodi wia halopa꞉ hali yaapo pa꞉ta꞉ kone pimikime. Kotoeki peata꞉ dikita꞉ dipula da pa꞉ta꞉ pa mea lopaememe. Kutupa ameta꞉ a꞉mbaaso hata꞉ diki pa tapaaluekema꞉ lemepe. Ota꞉ dia꞉me. Mo hande pi yokaalu peao haleme haliweki ikana꞉ma꞉ kone do pa꞉ta꞉ a꞉paata꞉ diki mea a꞉pa tapaena꞉ loa꞉me leekeme.

38 Mo polisi haliwekima꞉ Poloma꞉ leeke pita꞉ mo pi yokaalu peao haemeke haliweki pa꞉ta꞉ lolo pemekeme. Kutupa mo haliwekima꞉ta꞉ Polo Sailasi yaapoma꞉ Loma꞉ Kapomanina꞉ pamodi wia halepe hali yaapo halepeme leekeeki opuaata꞉ paala꞉ma꞉ homemekeme. 39 Koto ekina꞉ Polo Sailasi yaapo pa꞉ta꞉ pua alota꞉ Ipiliki pa꞉ta꞉ puma꞉eki a꞉ta꞉e laa lemekeme. Koto laata꞉ ikana꞉ma꞉ mo hali yaapo dipula da mina꞉pa꞉lao hatuku mea pua ipiliki pa꞉ta꞉ alota꞉ Do daoni mina꞉pa꞉lao pupe laa honke lemekeme. 40 Polo Sailasi yaapoma꞉ mo dipula da mina꞉pa꞉laota꞉ Lidiana꞉ da pa꞉ta꞉ pepekeme. Ipilikana꞉ma꞉ta꞉ Ketiso wanda꞉hali ame̱le̱ koto pa꞉ta꞉ momba꞉la hata꞉ta꞉ iki pa꞉ta꞉ sa꞉tiaasa꞉ pimanu laata꞉ mo da mina꞉pa꞉lao pepekeme.