1 Kutupa nate yunki hata꞉ paeyeketa꞉ mo yeni peao haemeke you haliwekina꞉ you hali A꞉na꞉naisi make mandane handeteke haemeke tondiki haliweki make pi lalo pieke hali homeke Tetalusi make opolo epemekeme. Kutupa ika꞉ samani pimiki pi Polo pa꞉ta꞉ mo kapomani you hali pa꞉ta꞉ laaka꞉na꞉ 2 kutupa Polo a꞉pa haena꞉ mo Tetalusima꞉ ipiki pa꞉ta꞉ ba꞉sa꞉ pitolo alota꞉

Epeke you hali Pilikisio. Neketa꞉ niki handeteke hata꞉ hone wopu wiki hali hale ekina꞉ nikita꞉ amba꞉ kone a꞉nda꞉ pelia hao haloma꞉me. Kutupa haloma꞉pate nakana꞉ma꞉ make nika꞉ kenke pa꞉ta꞉ haloma꞉ wanda꞉hali epeaaluekema꞉ tikitiki hau peaasa꞉ ekimanu amba꞉ peaaleme. 3 Koto pele ekina꞉ nikana꞉ma꞉ do kenke paeyao pa꞉ta꞉ hata꞉ hoto paeyao neke pa꞉ta꞉ ta꞉na꞉ma꞉ homolo hata꞉ keiyae pi lo haloma꞉me. 4 Koto pele ekina꞉ naka꞉ nate paeyaapa꞉na꞉ I̱ma꞉ neke pa꞉ta꞉ pi hokulu na leke nika꞉ lolo poloma꞉ pi sikita꞉ nakana꞉ma꞉ niki pa꞉ta꞉ epeke hone witolo hata꞉ opuelena꞉yeke neke honke alo loa꞉me. 5 Do hande halima꞉ta꞉ wanda꞉hali hao hoeyaena꞉ dupi dupi laa sutiao hala꞉ hali hala꞉ ekita꞉ handoma꞉me. Ipikana꞉ma꞉ do kenke paeyao pa꞉ta꞉ Diu haliweki ame̱le̱ a꞉nda꞉ semba꞉lalo pa꞉la꞉ pi la꞉tiki pomu hala꞉me. Ipikita꞉ mo Na꞉sa꞉tini tapake wanda꞉halina꞉ you hali ma꞉nda꞉ hala꞉me. 6 Ipikana꞉ma꞉ hande tembolo da hoeyaaluekema꞉ taapeekepate da꞉ka꞉pa꞉ minuma꞉me.

[Nika꞉ Lo Pi manuma꞉ ala꞉ tupa꞉ nikana꞉ma꞉ mo hali pa꞉ta꞉ puluekema꞉ puma꞉pate 7 mo a꞉nda꞉ tumiki hali Laisiasima꞉ honda꞉ pambolo a꞉paata꞉ nika꞉ kiki yola꞉ mepi bao honkopu hao do hali pa꞉ta꞉la꞉ mea hatuku pea꞉me. 8 Koto hau pea Laisiasima꞉ta꞉ do hali pa꞉ta꞉ samani pimi haliwekita꞉ neke pa꞉ta꞉ a꞉pa haena꞉ dupea꞉peke laa lea꞉me.]

Nakana꞉ma꞉ do hali pa꞉ta꞉ lota꞉ pika꞉na꞉ta꞉ nikana꞉ma꞉ do hali pa꞉ta꞉ samani puma꞉ pita꞉ ipika꞉ kake pa꞉ta꞉ lelie pi nakana꞉ma꞉ kone opilipikie laa leekeme. 9 Mo Diu haliwekima꞉ make Polo samani pitolo hata꞉ alota꞉ Koto hande lea꞉ ekimanu paeyaota꞉ ota꞉ lea꞉eki nikana꞉ma꞉ make handoloma꞉me laa lemekeme.

10 Poloma꞉ pi lena꞉yeke mo kapomani you halima꞉ ipika꞉ you mea a꞉meiyaeyekeme. Kutu pieketa꞉ Poloma꞉ handata꞉ pi alo alota꞉ Nakana꞉ma꞉ bapi elekeeleke do kenke pa꞉ta꞉ haleme wanda꞉halina꞉ pi yokaalu peao hala꞉ ekita꞉ I̱ma꞉ hone ulume. Koto ekina꞉ I̱ma꞉ make ya pu halo ekimanu neke pa꞉ta꞉ loluekema꞉ ta꞉na꞉ma꞉ homolome. 11 Amba꞉ta꞉ da ka꞉la꞉pa꞉la꞉eki 12 tupa꞉ koto natena꞉ kone oli Diutuseleme da pa꞉ta꞉ I̱ma꞉ Koda꞉ pa꞉ta꞉ panda꞉puniao yeni puluekema꞉ poa꞉ ekita꞉ naka꞉ kone weiya handa꞉ wia꞉peke ya꞉la꞉me. 12 Mo Diu haliwekima꞉ta꞉ mo tembolo da tukiki pa꞉ta꞉ I̱ma꞉ hali ma꞉nda꞉ ame̱le̱ ape alo hano ma꞉nda꞉ma꞉ I̱ na a꞉pa handea꞉me. Mo pi hotu haleme da pa꞉ta꞉manu make mo daoni tukiki pa꞉ta꞉ make aleta꞉ ma꞉nda꞉ pa꞉ta꞉ make I̱ma꞉ wanda꞉hali sutia tia pitolo hano hali ma꞉nda꞉ma꞉ I̱ na a꞉pa handea꞉me. 13 Koto pa꞉la꞉pate do I̱ a꞉pa samani peleme pimanu make I̱ma꞉ ota꞉ polo ekimanu do haliwekima꞉ neke pa꞉ta꞉ la kia꞉pa꞉peke na ya꞉la꞉me. 14 Koto pa꞉la꞉pate I̱ma꞉ neke pa꞉ta꞉ do lolo polo pita꞉ ota꞉ pi lolueke. Mo haliwekima꞉ ika꞉ honema꞉ta꞉ yayapiki hau aleme Hau kone I̱ma꞉ telia꞉ mea pulume. Kutu puluekema꞉ yaka apa꞉mei amedana꞉ Koda꞉ pa꞉ta꞉ panda꞉puniao yeni pu halome. Kutupa make mo Mosesima꞉ wape pea ula꞉ Lo Pimanu paeyao make mo potopede haliwekima꞉ wape pea ula꞉ buka manuna꞉ pi paeyao make I̱ma꞉ opu halome. 15 Koda꞉ma꞉ pulu pa꞉la꞉ ekina꞉ I̱ma꞉ ipiki pa꞉ta꞉ hone tulao hata꞉ handeteke hao halo tupa꞉ do haliwekima꞉ make Koda꞉ pa꞉ta꞉ koto tupa꞉ halememe. Dupae. Koda꞉ma꞉ta꞉ wanda꞉hali paeyaota꞉ epeke wanda꞉hali make hoke wanda꞉hali make homa lapa꞉ pa꞉ta꞉ ula꞉ wanda꞉hali paeyao ipikana꞉ma꞉ mea tiaalieke. 16 Kutu pulu pa꞉la꞉ ekina꞉ I̱ma꞉ta꞉ nate paeyao Koda꞉na꞉ leke minekena꞉ hata꞉ make wanda꞉halina꞉ leke minekena꞉ hata꞉ make yaka pu halo hau pa꞉ta꞉ hokeeki ma꞉nda꞉ taapa꞉paapa꞉na꞉ hone wotu wia hao halome.

17 Diutuseleme da nane mandane bapi manuna꞉ I̱ na poa꞉ ekina꞉ numaneke a꞉nda꞉ poa꞉pita꞉ta꞉ yaka wanda꞉hali pa꞉ta꞉ mani mea pua halaota꞉ Koda꞉ pa꞉ta꞉ haluekema꞉ ma꞉na꞉ make lia haloa꞉me. 18 Mo tembolo da tukiki pa꞉ta꞉ koto hau pitolo hata꞉ta꞉ mo hali wamo pitolo pu hala꞉ hau pu paeyao hano kone mo haliwekima꞉ I̱ a꞉pa handememe. Koto pa꞉ta꞉ta꞉ haliweki wopu I̱ ame̱le̱ mandake pa꞉ta꞉ na a꞉pa haememe. Haliwekima꞉ poiya꞉ poiya꞉ na a꞉pa lememe. 19 Koto pa꞉la꞉pate mo Eisia potopinisi nane hao epeleme Diu haliweki mandane ekimanu koto pa꞉ta꞉ haememe. Koto haliweki ikana꞉ma꞉ kone I̱ pa꞉ta꞉ pi ma꞉nda꞉ loluekema꞉ hone wimika꞉na꞉ta꞉ kota꞉ neke pa꞉ta꞉ a꞉pa ika꞉ samani piteleme pi lemeka꞉na꞉ta꞉ epelieke. 20 Do haleme haliwekima꞉ make I̱ma꞉ta꞉ ika꞉ ka̱le̱sete haliweki pa꞉ta꞉ hata꞉ yaka pi loa꞉ pita꞉ta꞉ I̱ma꞉ pu hoeyao hau ma꞉nda꞉ handa꞉ wimi ekita꞉ lemeka꞉na꞉ta꞉ epelieke. 21 Koto haliweki pa꞉ta꞉ tiao hata꞉ta꞉ pi homeke homeke wi laa dupa loa꞉me. Koda꞉ma꞉ta꞉ lapa꞉ pa꞉ta꞉ ula꞉ wanda꞉hali mea tiaalo pa꞉la꞉ ekita꞉ I̱ma꞉ kutu pulu pa꞉la꞉ ekina꞉ hone tulao halo ekina꞉ta꞉ ame ikana꞉ma꞉ I̱ pi yokaaluna꞉ mea hasememe laa leekeme.

22 Koto leeketa꞉ Pilikisima꞉ta꞉ mo Hau pita꞉la꞉eki dupae laa ma꞉nda꞉ma꞉ ipiki pa꞉ta꞉ la haleeke handaata꞉ ipikana꞉ma꞉ alota꞉ Pi ana꞉ma. Paape laa leekeme. Mo haliweki pa꞉ta꞉ alota꞉ Mo a꞉nda꞉ tumiki hali Laisiasi opolo epea꞉ka꞉na꞉ta꞉ I̱ma꞉ ika꞉ pi tikitiki yao lalueke leekeme. 23 Koto laata꞉ mo Polo handeteke hayeke ami opisa pa꞉ta꞉ alota꞉ Polo handeteke hata꞉ta꞉ ota꞉ dipula pila꞉ hali tupa꞉ na handeteke hake ipika꞉ yankeke titima꞉ ota꞉ mea꞉peke alemanu mea epemeka꞉na꞉ta꞉ sa꞉sa꞉ na pea꞉peke laa leekeme.

24 Hoto mandane ekimanu haota꞉ Pilikisi ipika꞉ wanda꞉ Datusila yaapo epepekeme. Datusilata꞉ Diu tapake wanda꞉e. Pilikisima꞉ta꞉ Polo a꞉pa ipiki pa꞉ta꞉ pi lena꞉yeke epoe laa la꞉moneaeyekeme. Poloma꞉ta꞉ Yesu Ketiso pa꞉ta꞉ hone tulaasa꞉ pi teke la halolo hata꞉ta꞉ 25 tikitiki hau pita꞉la꞉eki hone tulaasa꞉ pi teke la halolo kone ana꞉na꞉ handeteke hala꞉eki pa꞉ta꞉ make Koda꞉ma꞉ wanda꞉hali paeyao pa꞉ta꞉ pi yokaalu pulu pa꞉la꞉eki pa꞉ta꞉ make kutupiki pi leekepate Pilikisima꞉ paala꞉ma꞉ homolo hata꞉ alota꞉ Ameta꞉ pue laa Nate ma꞉nda꞉na꞉ waleke wia꞉ka꞉na꞉ta꞉ epoelena꞉ paa wi loluekema꞉ ameta꞉ pue leekeme. 26 Pilikisima꞉ hone ma꞉nda꞉ make dupa wiekeme. Poloma꞉ mani ma꞉nda꞉ kina꞉e hone wiekeme. Koto pa꞉la꞉ ekina꞉ Polo epena꞉ wi la꞉tiki pea Polo yaapo pi la꞉tiki pipikime.

27 Kutupa hao bapi yaapo yapeeketa꞉ Pilikisima꞉ kapomani you hali haya꞉ ekita꞉ pa Posiasi Pesitasima꞉ miekeme. Kutu pieketa꞉ Pilikisima꞉ta꞉ mo Diu haliweki ta꞉na꞉ma꞉ homaaluekema꞉ Polota꞉ dipula pa pita꞉ pelia haena꞉ laa peekeme.