1 Amba꞉ titina꞉ do kenke honiki honiki paeyaona꞉ haemeke wanda꞉hali paeyaoma꞉ta꞉ da pi homeke la make homeke pi kone lemekeme. 2 Ikita꞉ mo nate opa꞉la꞉ nanema꞉ pomu lopaata꞉ oni homeke hau honda꞉ lia wieke Ba꞉biloni kenkena꞉ a꞉paata꞉ koto pate pitimikime. 3 Kutupa ika꞉ ika꞉ kone alota꞉ A꞉e. Ameta꞉ mo ma꞉na꞉ kenkema꞉ la꞉ka꞉la toopima꞉ handeke hankola꞉papeke alemanu wepumana꞉e lemekeme. Kutu pimikita꞉ mo wepimiki toopimanu make mo toopimanu tuna tuna pea miniki halo pieke koloda make wimikime. 4 Koto ekina꞉ ikana꞉ma꞉ alota꞉ Nika꞉ biki mina꞉liaena꞉ yeke make niki mo kenke honiki honiki pa꞉ta꞉ na putupa꞉ alualu pulu poloma꞉ tupa꞉ maketa꞉ daoni ma꞉nda꞉ a꞉etolo hata꞉ mo haliao hokulupeke da tieke ma꞉nda꞉ oli ya pa꞉ta꞉ lia a꞉emana꞉e lemekeme.

5 Kutu pimiki handaa Tekehalita꞉ mo hande haliwekima꞉ a꞉emeke daoni make mo ya pa꞉ta꞉ peeke hokulupeke da tieke make handuluekema꞉ holopeekeme. 6 Kutupa a꞉pa ipikana꞉ma꞉ alota꞉ Ameta꞉ do wanda꞉halita꞉ homeke wanda꞉hali halemeke yalo homeke pi kone alememe laata꞉ Dota꞉ ika꞉ pua꞉tiki polo peleme ekina꞉ kini piteleme ekie. Kutupa ikana꞉ma꞉ta꞉ teke pa꞉ta꞉ ika꞉ hone pa꞉la꞉ anemone hau paeyao pa pilimikie. 7 Koto ekina꞉ niki pua ika꞉ ika꞉ kone hone na u alualu pulu peleme tupa꞉ ika꞉ pi topo topo pealo bape leekeme. 8 Koto ekina꞉ Tekehalima꞉ mo wanda꞉hali paeyao kenke honiki honiki paeyao pa꞉ta꞉ putupa putupa pieketa꞉ mo daonita꞉ pao na a꞉emekeme. 9 Mo Tekehalima꞉ mo wanda꞉hali paeyaona꞉ pi koto pate topo topo peao kenke honiki honiki paeyao pa꞉ta꞉ putupa yeke handaa mo daonina꞉ bikita꞉ Beibolo lemekeme.

10 Semema꞉ monduma꞉ monduma꞉ pieke wekiwandikina꞉ wekiwandikina꞉ bikimanu doe. Mo hande ikali tieke tieke yopua bapi yaapo yapeeke hoki naneta꞉ Seme ipiki bapi 100 mieketa꞉ weki Apa꞉kesade mondu wiekeme. 11 Kotoeki hoki naneta꞉ bapi 500 pa haota꞉ mandane wekiwandiki mondu wiekeme.

12 Mo Apa꞉kesadeta꞉ bapi 35 mieketa꞉ weki Sila mondu wiekeme. 13 Kotoeki hoki naneta꞉ bapi 403 pa haota꞉ mandane wekiwandiki mondu wiekeme.

14 Mo Silata꞉ bapi 30 mieketa꞉ weki Ebe mondu wiekeme. 15 Kotoeki hoki naneta꞉ bapi 403 pa haota꞉ mandane wekiwandiki mondu wiekeme.

16 Mo Ebeta꞉ bapi 34 mieketa꞉ weki Peleke mondu wiekeme. 17 Kotoeki hoki naneta꞉ bapi 430 pa haota꞉ mandane wekiwandiki mondu wiekeme.

18 Mo Peleketa꞉ bapi 30 mieketa꞉ weki Teu mondu wiekeme. 19 Kotoeki hoki naneta꞉ bapi 209 pa haota꞉ mandane wekiwandiki mondu wiekeme.

20 Mo Teu bapi 32 mieketa꞉ weki Setuku mondu wiekeme. 21 Kotoeki hoki naneta꞉ bapi 207 pa haota꞉ mandane wekiwandiki mondu wiekeme.

22 Mo Setuku bapi 30 mieketa꞉ weki Neiho mondu wiekeme. 23 Kotoeki hoki naneta꞉ bapi 200 pa haota꞉ mandane wekiwandiki mondu wiekeme.

24 Mo Neihota꞉ bapi 29 mieketa꞉ weki Dita mondu wiekeme. 25 Kotoeki hoki naneta꞉ bapi 119 pa haota꞉ mandane wekiwandiki mondu wiekeme.

26 Mo Ditata꞉ bapi 70 mieketa꞉ Eipola꞉ma꞉ make Neiho make Hatani ika꞉ ateke hayekeme.

27 Dota꞉ mo Eipola꞉ma꞉ make Neiho make Hatani ika꞉ ateke Ditama꞉ kini pea monduma꞉ monduma꞉ pieke wekiwandikina꞉ wekiwandikie. Hatanita꞉ Lodana꞉ ateke yeekeme. 28 Hatanita꞉ ipika꞉ apa꞉ pa haena꞉ kone ipikita꞉ mo Ba꞉biloni kenke pa꞉ta꞉ hala꞉ ipika꞉ daoni teke A꞉e pa꞉ta꞉ homeekeme. 29 Eipola꞉ma꞉ma꞉ta꞉ Sa꞉tai miekeme. Kutupa Neihota꞉ Hatanina꞉ waneke Milika miekeme. Hatani Isikana꞉ ateke yekeme. 30 Sa꞉taita꞉ wekiwandiki mendia꞉peke na yekeme.

31 Ditama꞉ta꞉ mo Ba꞉biloni kenke pa꞉ta꞉ hayeke daoni A꞉e mina꞉pa꞉lao ipika꞉ weki Eipola꞉ma꞉ make Hatanina꞉ eiyeke Loda make Eipola꞉ma꞉na꞉ weteke Sa꞉tai make hatuku mo Keinani kenke pa꞉ta꞉ polueke alo pemekepate ikita꞉ pa mo Hatani kenke pa꞉ta꞉ pua pitimikime. 32 Kutupa koto pa꞉ta꞉ haena꞉ta꞉ Ditata꞉ 205 bapi mieketa꞉ homeekeme.