1 Mo Loma꞉ Kapomani titina꞉ You hali Sisa Taibitiasi ipika꞉ bapi 15 peao handeteke hayeke da yu paeyaota꞉ pa handeteke hayekeme. Koto pita꞉ma꞉ta꞉ ipikana꞉ma꞉ mea haena꞉ leeke Kapomani you haliweki manuma꞉ ika꞉ handeteke hatia epena꞉ leeke kenke manuta꞉ dupa handeteke haemekeme. Pontiasi Pailedita꞉ Diudia kenke handeteke hayekeme. Hetodita꞉ Ka꞉lili kenke handeteke hayekeme. Kutupa Hetodina꞉ hameke Pilipita꞉ Idulia make Data꞉kenaidisi koto kenke yaapo handeteke hayekeme. Laisaniasita꞉ Abilini kenke handeteke hayekeme. 2 Koto pita꞉ma꞉ kone A꞉nasi Kaiya꞉pasi yaapota꞉ Koda꞉na꞉ yeni peao haepeke you hali haena꞉ta꞉ mo hapu hayeke alena꞉ hayeke hali Sekataiyana꞉ eiyeke Dioni pa꞉ta꞉ta꞉ Koda꞉na꞉ pi epeekeme. 3 Kutu pieke handaata꞉ Dionima꞉ mo Diodani ikali tea꞉na꞉ wieke yu paeyao pa꞉ta꞉ Koda꞉na꞉ pi latiki pomuolo hata꞉ alota꞉ Wanda꞉halio. Iki paeyaoma꞉ ika꞉ amba꞉ pimi haumanu make ika꞉ honemanu make la꞉ka꞉la꞉ minaata꞉ bapitaisi peano lapa꞉peke. Koto haumanu ota꞉ pimika꞉na꞉ta꞉ kota꞉ Koda꞉ma꞉ ika꞉ pimi haumanu paeyaosiki paeyaaso hata꞉ paa na niminaalieke leekeme.

4 Koto Dionima꞉ pieke ekita꞉ amba꞉ titina꞉ Koda꞉na꞉ pi la halo hayeke hali ma꞉nda꞉ bikita꞉ Aisaya ipikana꞉ma꞉ bukana꞉ wape pea ula꞉ ekita꞉ dupa la꞉la꞉me.

7 Koto dina꞉ta꞉ wanda꞉hali wotuma꞉ Dionima꞉ iki bapitaisi peaena꞉yeke paeyao epemekeme. Kutu pimiki handaa Dionima꞉ koto wanda꞉hali pa꞉ta꞉ alota꞉ Ikita꞉ ketomanue. Ikita꞉ Koda꞉ma꞉ teke pa꞉ta꞉ epena꞉ lolo pa꞉la꞉ mineke panka꞉la꞉ ekita꞉ wonduluekema꞉ hamena꞉ laa ma꞉nda꞉ epita꞉ pindipa pelimiki pita꞉ epima꞉ kinki pa꞉la꞉pe. 8 Ika꞉ pimi hoke haumanu paeyao amba꞉ hoki waleme ekina꞉ wanda꞉halima꞉ handena꞉ mo epeke kiliki a꞉ela꞉ tima꞉ pa꞉la꞉eki pina꞉ epeke haumanu pea꞉pa꞉peke. Koto ekina꞉ta꞉ ikana꞉ma꞉ Nika꞉ meita꞉ Eipoloha꞉ma꞉e laa kutupiki pimanu na lapa꞉peke laata꞉ Dionima꞉ iki pa꞉ta꞉ alota꞉ Opua꞉pe. Koda꞉ma꞉ do toopimanu meaata꞉ Eipoloha꞉ma꞉na꞉ mondu semba꞉lala꞉ wanda꞉hali ana꞉na꞉ wepia haena꞉ lapeke ya꞉la꞉me alome. 9 Hande hapula꞉ ti manuna꞉ teke pa꞉ta꞉ pokuluekema꞉ manda꞉ meaowa꞉me leekeme. Epeke kiliki na a꞉eya꞉la꞉ timanu paeyao siki poko lopaota꞉ ti talo hala꞉ pa꞉ta꞉ paeyao siki mu yankilieke leekeme.

10 Do pimanu opua mo wanda꞉halima꞉ Dioni pa꞉ta꞉ lota꞉ pitolo hata꞉ alota꞉ Kota꞉ nikana꞉ma꞉ta꞉ eki hau peomonope lemekeme. 11 Dionima꞉ ika꞉ pi hombo peaaso hata꞉ alota꞉ Hali ma꞉nda꞉ma꞉ ipika꞉ dau yaapo wia꞉ka꞉na꞉ta꞉ kota꞉ ma꞉nda꞉ta꞉ mo dau dia꞉ya꞉la꞉ natehali ma꞉nda꞉ pa꞉ta꞉ hala꞉peke. Kutupa make ne napekeeki wia꞉ka꞉na꞉ta꞉ kota꞉ ne dia꞉ya꞉la꞉ wanda꞉halimanu pa꞉ta꞉ telipea hala꞉pa꞉pekee leekeme. 12 Koto natena꞉ta꞉ mo mandane dakisi mani mu haemeke haliwekima꞉ Dionima꞉ iki bapitaisi peaena꞉ ipiki a꞉pa lota꞉ pitolo alota꞉ Wala꞉la꞉ halio. Nikana꞉ma꞉ta꞉ eki hau piomonope laa lota꞉ pimikime. 13 Koto lemeke Dionima꞉ hombo peaaso alota꞉ Ikana꞉ma꞉ mo wanda꞉halina꞉ dakisi mani mimika꞉na꞉ta꞉ kota꞉ haka꞉ta꞉pao na miki mo Kapomanina꞉ Lo pima꞉ tombo ula꞉ tupa꞉ mia꞉pa꞉peke leekeme. 14 Mandane ami haliwekima꞉ make a꞉pa lota꞉ pitolo hata꞉ alota꞉ Nikana꞉ma꞉ make ekipiki haumanu peomonope lemekeme. Koto lemeke Dionima꞉ iki pa꞉ta꞉ alota꞉ Ma꞉nda꞉na꞉ mani pake muluekema꞉ paala꞉ tiao o yayapiki ekina꞉ pa hameke la꞉ tiaasa꞉eki ota꞉ na pea꞉pa꞉peke. Kutupa ika꞉ e pokaasemeke kita꞉la꞉ yenkita꞉ ana꞉na꞉ kita꞉la꞉me hone wia꞉pa꞉peke leekeme.

15 Mo wanda꞉halima꞉ koto haumanu paeyao handaata꞉ ika꞉ puki pa꞉ta꞉ hayeke ale tialu baeyeke ekima꞉ta꞉ ikana꞉ma꞉ hone eleke eleke witolo hata꞉ta꞉ do Dionita꞉ hande Ketiso pateya꞉la꞉me laa hone wimikime. 16 Koto ekina꞉ Dionima꞉ iki pa꞉ta꞉ alota꞉ I̱ma꞉ ikita꞉ ikalima꞉ bapitaisi peao halopate hali ma꞉nda꞉ wetepena꞉ ipilia꞉ halita꞉ ota꞉ honkopu wotu hala꞉me. I̱ta꞉ ipiki yaapo ana꞉ pea꞉peke na ya꞉la꞉me. Ipika꞉ anke dake holaapeke make I̱ta꞉ ana꞉ na pa꞉la꞉me leekeme. Ipikana꞉ma꞉ ikita꞉ Holi Sipitidi pita꞉ ti uleke yaapoma꞉ bapitaisi pealieke leekeme. 17 Ipikana꞉ma꞉ mo hande widi kilikina꞉ ambuku napeke yaapo putupa alu puluekema꞉ pana꞉pulu pa꞉la꞉ sa꞉sata꞉ ipika꞉ kikina꞉ miniki hala꞉me. Ipika꞉ widi kiliki epekeeki paeyaota꞉ ipika꞉ widi napeke u hala꞉ da pa꞉ta꞉ momba꞉la wilieke. Pate mo ambuku paeyaota꞉ tina꞉ pana꞉pu yankilieke. Koto tita꞉ na paeyeke pa to halieke leekeme.

18 Mo wanda꞉hali ika꞉ hoke haumanu hoki wala puki hone lekelena꞉yeke Dionima꞉ Koda꞉na꞉ Pi Seliapomanu ota꞉ epeke tupa꞉ la hala꞉tiki pominolo hata꞉ wanda꞉hali sutiatia pua꞉tiki pomiekeme.

19 Koto pa꞉la꞉pate Dionima꞉ mo kapomani hali tieke Hetodi pa꞉ta꞉ la halolo hata꞉ alota꞉ Neketa꞉ hoke haumanu peleme laa la haleekeme. Ekipeke. Hetodi ipika꞉ hamekena꞉ weteke Hetodiasi pa ipika꞉ handa꞉mea make ipikana꞉ma꞉ ti teke wotu yoka꞉tiki pomieke handa leekeme. 20 Koto leeke ekina꞉ Hetodi ipikana꞉ma꞉ Dioni dipula mea lopaeyeke ekima꞉ta꞉ mo ipika꞉ amba꞉ pieke hoke haumanu paeyaota꞉ koto ekima꞉ lu ankula yeekeme.

21 Kutupa Dionima꞉ wanda꞉hali paeyao siki bapitaisi hau peaota꞉ wetepe nane Yesu make bapitaisi hau peayekeme. Kutupa Yesuma꞉ yeni pitolo haena꞉ta꞉ oli hepeni lumba 22 mo Holi Sipitidita꞉ ba melipuma꞉ handekeeki hola꞉pa꞉niao Yesuna꞉ lokena꞉ a꞉pa holopeekeme. Kutaa oli ya nanema꞉ pi ho̱la̱꞉make homekema꞉ pi alo alota꞉ Neketa꞉ ota꞉ yaka puki piki wekie. Yaka pukima꞉ neke pa꞉ta꞉ ta꞉na꞉ma꞉ wotu homolome leekeme.

23 Yesu ipika꞉ bapita꞉ hali tieke homeke paeyao kiki yaapo bapimanu tupa꞉ yeketa꞉ ipika꞉ e kinipea pokeekeme. Mo wanda꞉halima꞉ hone witolota꞉ ipikita꞉ Diosepena꞉ eiyekee hone wimikime.