1 Hoto yunki mindiki hata꞉ hao Yesuma꞉ Pida pita꞉ Dia꞉mesi Dioni hama̱la̱꞉ handa꞉ meata꞉ pote tumiki pa꞉ta꞉ pua ika꞉siki haemekeme. 2 Kutupa ikana꞉ma꞉ handa꞉ pelia haena꞉ Yesuna꞉ loke wonu piliekeme. Ipika꞉ leke popeleketa꞉ nate pa̱a̱ pita꞉la꞉ tupa꞉ pa̱a̱ piekeme. Kutupa ipika꞉ daumanu make pa̱a̱ peaata꞉ hake wopu piekeme. 3 Kutupa Elaidia Mosesi yaapo opolo a꞉paata꞉ Yesu ame̱le̱ pi pi alo haemekeme. Kutu pitolo haena꞉ koto hoki nane tolu haemeke hali tepoma꞉ handemekeme. 4 Koto ekina꞉ta꞉ Pidama꞉ Yesu pa꞉ta꞉ alota꞉ Tekehalio. Do pa꞉ta꞉ haloma꞉ ekita꞉ a꞉pa꞉la꞉me. Koto ekina꞉ naka꞉ hone pia꞉ka꞉na꞉ta꞉ I̱ma꞉ sale da tepo a꞉eyono lae laata꞉ Homeke naka꞉eki ma꞉nda꞉ Mosesina꞉eki ma꞉nda꞉ Elaidiana꞉eki pea a꞉eyono lae leekeme.

5 Kutu piki pi alo haena꞉ta꞉ mo pa̱a̱ piki koa ma꞉nda꞉ma꞉ iki a꞉pa tu peaaso haena꞉ mo koa tukiki pa꞉ta꞉ pi ho̱la̱꞉makema꞉ alota꞉ I̱ma꞉ koto yaka puki piki weki pa꞉ta꞉ ta꞉na꞉ wopu homolome. Ipika꞉ pi opua꞉pa꞉pekee la꞉niaeyekeme.

6 Koto pi ho̱la̱꞉make epeekeeki opu haota꞉ mo disaipolo hali tepoma꞉ paala꞉ tiekema꞉ wopu homolo hata꞉ kenkena꞉ puki yama lopemekeme. 7 Yesuma꞉ iki pa꞉ta꞉ a꞉pa iki wataaso hata꞉ alota꞉ Paala꞉ma꞉ na homeke tiaapee leekeme. 8 Koto leeke mo hali tepoma꞉ la꞉ka꞉la꞉ liao handemekepate ma꞉nda꞉ na hake Yesu homeke hayeke handemekeme.

9 Potena꞉ hola꞉pa꞉niaaso haena꞉ Yesuma꞉ iki hando alo hata꞉ alota꞉ Oli hande upama꞉ handeke nono pimi hauta꞉ ma꞉nda꞉ pa꞉ta꞉ na lapa꞉peke laata꞉ Wanda꞉halina꞉ Eiyeketa꞉ ota꞉ homaa paa tiao haowa꞉ka꞉na꞉ alota꞉ ana꞉ pilieke leekeme.

10 Koto leeke pi opitolo ikana꞉ma꞉ Yesu pa꞉ta꞉ lota꞉ pitolo alota꞉ Pa ekipeke mo wape pea wala꞉tiki pu haleme haliwekima꞉ titina꞉ amba꞉la Elaidia ipilieke lo halemepe lemekeme.

11 Kutupa Yesuma꞉ iki pa꞉ta꞉ hombo peaaso alota꞉ Titina꞉ amba꞉la Elaidia ota꞉ ipilieke. Kutu pia꞉ka꞉na꞉ta꞉ ipikana꞉ma꞉ hau paeyao tikitiki yao wina꞉ loluekema꞉ ipilieke. 12 Kutu piliepate I̱ma꞉ iki pa꞉ta꞉ alome. Elaidiata꞉ amba꞉ epea꞉pate wanda꞉halima꞉ ipikita꞉ ota꞉ Elaidiae hone wopu na witolo hata꞉ ikana꞉ma꞉ pa ika꞉ hone pieke ekimanu ipiki pa꞉ta꞉ pimikime. Mo Wanda꞉halina꞉ Eiyeke pa꞉ta꞉ make ikana꞉ma꞉ koto mandake piki hoke haumanu kone pilimikie alome leekeme. 13 Mo disaipolo haliwekima꞉ koto leeke pi opitolota꞉ mo ala꞉ pita꞉ mo hande Dioni Bapitaisi pa꞉ta꞉ ala꞉me hone wimikime.

14 Iki tonkopuma꞉ mo wanda꞉hali pa꞉ta꞉ la꞉ka꞉la ipulu haena꞉ta꞉ hali homeke Yesu pa꞉ta꞉ a꞉pa panda꞉ pitolo hata꞉ 15 alota꞉ Tekehalio. Ya weki pa꞉ta꞉ a꞉ta꞉ma꞉ homa꞉peke laata꞉ Ipikita꞉ lu lopao mea keao weki yaalo tana꞉ eleke eleke ti tala꞉ pa꞉ta꞉ make ikali pa꞉ta꞉ make lu lopatiki pu hala꞉me. 16 Kutupa I̱ma꞉ naka꞉ disaipolo haliweki pa꞉ta꞉ hatuku epoa꞉pate ikana꞉ma꞉ ipiki epeapeke na yea꞉me leekeme.

17 Yesuma꞉ ipika꞉ pi hombo peaaso alota꞉ Koto wanda꞉halita꞉ hone wopu na tulaake ota꞉ puki taka꞉lake wanda꞉halie. I̱ta꞉ iki pa꞉ta꞉ hao pua hando natena꞉ hao na lua꞉pe. I̱ma꞉ iki pa꞉ta꞉ a꞉ta꞉ma꞉ homolo hata꞉ pa pu hamena꞉ kiaota꞉ hando natena꞉ tunkulua꞉pe laata꞉ Mo wekita꞉ I̱ pa꞉ta꞉ mea epoe leekeme. 18 Kutupa Yesuma꞉ Mo hoke temoko hando alo hata꞉ mo weki mina꞉pa꞉lae leeke handaata꞉ mo hoke temokoma꞉ mo weki mina꞉pa꞉layekeme. Kutu pieketa꞉ pa koto toma꞉na꞉ kone mo weki epea tiao hayekeme.

19 Yesu ipika꞉ siki haena꞉ ipika꞉ hoki nane tolu haemeke haliwekima꞉ ipiki pa꞉ta꞉ pua lota꞉ pitolo hata꞉ alota꞉ Pa ekipeke handa nikana꞉ma꞉ koto hoke temoko tolu lia꞉peke na ya꞉la꞉ ekita꞉ ekipa pia꞉pe lemekeme.

20 Yesuma꞉ hombo peaaso alota꞉ Ika꞉ hone tulaleme ekita꞉ aneke hapu na tulaemeke handa pia꞉me. I̱ma꞉ iki pa꞉ta꞉ ota꞉ ota꞉ pi alome. Ika꞉ hone tulaleme ekita꞉ mo ki̱mi̱le̱ma꞉ handeke ale masidadi waema꞉ handekeeki wimika꞉na꞉ta꞉ kota꞉ ikana꞉ma꞉ do pote pa꞉ta꞉ alo hata꞉ Mo pate leke pue laa la halemeka꞉na꞉ta꞉ kota꞉ koto pa꞉ta꞉ yola꞉ monealieke. Kutu piki hone tulalimi ekima꞉ta꞉ hau paeyao pea꞉pa꞉peke yelimikie. 21 [Pate dupiki hoke temoko toluekema꞉ta꞉ pota꞉ ma꞉nda꞉ dia꞉ ya꞉la꞉pate pa mo nee pi wia hata꞉ yeni pita꞉la꞉eki homekema꞉ ana꞉ pa꞉la꞉me.]

22 Ipika꞉ disaipolo haliweki paeyao Ka꞉lili nane a꞉pa mombelemeke pita꞉ma꞉ta꞉ Yesuma꞉ iki pa꞉ta꞉ alota꞉ Hosiki wetepena꞉ta꞉ mo Wanda꞉halina꞉ Eiyeketa꞉ haliweki oto pa꞉ta꞉ haena꞉ lelieke. 23 Kutu pia꞉ka꞉na꞉ta꞉ mo haliwekima꞉ ipiki limikie. Kota꞉ ota꞉ homa꞉liepate pa hoto tepo wia paa da꞉taalieke leekeme. Koto ekima꞉ta꞉ mo disaipolo haliweki ika꞉ pukima꞉ ka꞉nda꞉ homemekeme.

24 Yesu ipika꞉ disaipolo haliweki hatuku Kapeneami da opolo epemeketa꞉ mo tembolo dakisi mani mu haemeke haliweki a꞉pa Pida pa꞉ta꞉ lota꞉ pitolo alota꞉ Naka꞉ walaasa꞉ halima꞉ta꞉ tembolo dakisi mani lopao halepe lemekeme.

25 Pidama꞉ hombo peaaso alota꞉ Aowe. Lopao hala꞉me leekeme. Koto hoki naneta꞉ Pidama꞉ da pa꞉ta꞉ honda꞉ pambolo haena꞉ Yesuma꞉ ipiki pa꞉ta꞉ pi amba꞉la alo alota꞉ Saimonoo naka꞉ honema꞉ta꞉ eki hone wilipe laata꞉ Do kenkena꞉ handeteke haleme Kini haliwekima꞉ epi ameda pa꞉ta꞉ dakisi mani mea꞉tiki pu halimipe. Ika꞉ tapake pa꞉ta꞉ kone mea꞉tiki pilimikipe o tapake ma꞉nda꞉ ma꞉nda꞉ pa꞉ta꞉ mea꞉tiki pilimikipe.

26 Pidama꞉ hombo peaaso alota꞉ Mo tapake ma꞉nda꞉ pa꞉ta꞉ homeke mea꞉tiki pilimikie leekeme. Koto leeke Yesuma꞉ alota꞉ Kota꞉ koto ekina꞉ta꞉ mo Kini halina꞉ tapake wanda꞉halima꞉ta꞉ dakisi na wilimikie. 27 Pateta꞉ do wanda꞉halima꞉ niki pa꞉ta꞉ hoke hone wiaama꞉na꞉ mo ikali leke pa꞉ta꞉ pua naka꞉ kimai lopaapeke. Kutaata꞉ ota꞉ titina꞉ endilipi ta꞉pelita꞉ yola꞉ mea ipika꞉ kake ankoto peaata꞉ koto kake pa꞉ta꞉ta꞉ silipa mani homeke handa꞉ wilimikie. Koto manima꞉ta꞉ mo ya tembolo dakisi make naka꞉eki make ana꞉ pilieke. Kotoeki mea pua dika꞉ dakisi hala꞉peke leekeme.