1 Koto pi wala paeyeke hoki naneta꞉ Yesuma꞉ wanda꞉hali pa꞉ta꞉ make ipika꞉ disaipolo haliweki pa꞉ta꞉ make pi ma꞉nda꞉ dupa leekeme. 2 Mo hande pi ula꞉ ekimanu walo haleme haliwekima꞉ make mo Pa꞉tisi tonuma꞉ make iki paeyaoma꞉ta꞉ mo hande Mosesima꞉ waleeke tupa꞉ kone iki pa꞉ta꞉ moka꞉la꞉ tiao walo halememe. 3 Koto ekina꞉ta꞉ kota꞉ mo ikana꞉ma꞉ waleleme mana꞉ pimanu paeyao ota꞉ telimea pu hapa꞉peke. Kutu pulu pelemepate mo ika꞉ lokema꞉ pu haleme haumanu homeketa꞉ ota꞉ na honda꞉ mea pea꞉pa꞉peke. Pa ekipeke ikana꞉ma꞉ta꞉ mo ika꞉ waleme pimanu kone ikana꞉ma꞉ta꞉ ota꞉ na pu halemeke handa loa꞉me. 4 Ikana꞉ma꞉ta꞉ wanda꞉halina꞉ peiyoko manda ka꞉nda꞉ piki alemanu tonkao tiao halemepate pa ikana꞉ma꞉ kiao ika꞉ kiki ma̱lekesiki tindipao ma꞉nda꞉ a꞉nda꞉ ota꞉ na tamba꞉ mea tialimikie. 5 Ika꞉ pu haleme hau paeyaota꞉ pa wanda꞉halima꞉ handaena꞉ pu halememe. Ika꞉ you taado manda pokede nu dake petipekemanu wepu make kutupa mo kiki maketopa꞉ yaapona꞉ make homeke tupa꞉ kone pokede nu dakemanu wepiaata꞉ Koda꞉na꞉ pi tunkula ula꞉ ekimanu wape pea panko hopa꞉liao yamaata꞉ ta pomua꞉tiki piteme handa꞉e. Kutupa make ika꞉ dau tumiki kake nina꞉ta꞉ ota꞉ haka꞉ta꞉pao au laaseme pu honiki honiki make taa piteme handa꞉e. 6 Kutaa make mo haliwekina꞉ honema꞉ta꞉ ne pamba꞉tiki pimiki nate nina꞉ make yeni da pa꞉ta꞉manu pita꞉tiki pimiki nate nina꞉ make wanda꞉halima꞉ mo you haliwekina꞉ pita꞉peke sea manuna꞉ iki ombu mea pitatiki pina꞉yeke ta꞉na꞉ wopu homo halememe. 7 Makedi hama mombili ale nina꞉ wanda꞉halima꞉ iki manda꞉hande pitolo ika꞉ bikimanu mea a꞉meiyaluekema꞉ Disao. Epeke da ka꞉la꞉paasoe la꞉tiki pina꞉ ta꞉na꞉ma꞉ wopu homelememe.

8 Mo haliwekima꞉ta꞉ kutu pu halemepate pa ikana꞉ma꞉ta꞉ wanda꞉halima꞉ iki pa꞉ta꞉ Disao pi na lena꞉ lapa꞉peke. Pa ekipeke. Ika꞉ Disata꞉ homeke haena꞉ iki paeyaota꞉ hama̱la̱꞉ hama̱la̱꞉ halememe loa꞉me. 9 Kutupa make ikana꞉ma꞉ do kenkena꞉ ma꞉nda꞉ pa꞉ta꞉ Apa꞉o pi na lapa꞉peke. Pa ekipeke. Ika꞉ Apa꞉ homeke homeketa꞉ hepeni hala꞉me. 10 Kutaa make wanda꞉halima꞉ iki pa꞉ta꞉ You halie pi na lena꞉ lapa꞉peke. Pa ekipeke. Ketiso homeketa꞉ ika꞉ you hali hala꞉me. 11 Mandali epita꞉ iki tukiki pa꞉ta꞉ ika꞉ aneke hali halo pia꞉ka꞉na꞉ta꞉ kota꞉ ipikita꞉ iki paeyaona꞉ hone pa꞉la꞉ hau peao hala꞉ hali yelieke. 12 Pa ekipeke hali epima꞉ ipika꞉ kone I̱ta꞉ tumiki hali hanoe lo halia꞉ halita꞉ kota꞉ ipikita꞉ ota꞉ hosiki siki haena꞉ lelieke. Koto pa꞉la꞉pate epima꞉ ipika꞉ honema꞉ kone dekepo haya꞉ka꞉na꞉ta꞉ kota꞉ koto someta꞉ you hali haena꞉ mea a꞉meiyalieke laa leekeme.

13-14 Koto pi laa paeyeketa꞉ Yesuma꞉ alota꞉ Iki Lo Pi ula꞉eki walo haleme haliweki make Pa꞉tisi haliweki make iki paeyaona꞉ hoke yenki tieke ipuleke handolo ekina꞉ I̱ paala꞉e. Ikita꞉ hoke makeaaso yayapiki hau pu haleme haliwekie. Ikana꞉ma꞉ta꞉ mo hepenina꞉ Kilu Tombuao Hala꞉ eki pa꞉ta꞉ honda꞉ pamba꞉la꞉eki kiaaso hata꞉ta꞉ mo poluekema꞉ hone pa꞉la꞉ wanda꞉hali puaama꞉na꞉ ika꞉ leke popelekena꞉ kone mo honda꞉ pambolo peleme pota꞉ pa꞉ta꞉ pota꞉ kake katolao halememe.

15 Iki mo Lo Pi ula꞉eki walo haleme haliweki make Pa꞉tisi haliweki make iki paeyaona꞉ hoke yenki tieke ipuleke handolo ekina꞉ I̱ paala꞉e. Ikita꞉ hoke makeaaso yayapiki hau pu haleme haliwekie. Ikana꞉ma꞉ta꞉ pa mo hande homeke hali mea ika꞉ tapakena꞉ tunao haena꞉e laa lapeke ekina꞉ kone mo da yu paeyao lia lopao pomu haleme haliwekie. Kutaa mo some handa꞉ wia꞉ka꞉na꞉ta꞉ kota꞉ ipikita꞉ iki mo ti to hala꞉ ekina꞉ eiyeke tonu halemeeki ota꞉ lombei peao haena꞉ lelimikie.

16 Iki pa꞉ta꞉ hoke yenki tieke ipuleke handolo ekina꞉ I̱ paala꞉e. Ikita꞉ leke holupa pota꞉ na handeke hata꞉ kone Do pota꞉na꞉ ipupe laa lo haleme haliwekie. Ika꞉ waleme pi manuta꞉ dupa Mandali epima꞉ mo tembolo dana꞉ biki la alo hata꞉ hali keke pi la꞉ wia kone paa topo pia꞉ka꞉na꞉ta꞉ pa aleta꞉ ma꞉nda꞉ dia꞉ ya꞉la꞉pate pa mo somema꞉ tembolo da tukiki pa꞉ta꞉ ula꞉ kolona꞉ biki la alo hata꞉ hali keke pi wia꞉ka꞉na꞉ta꞉ kota꞉ koto pita꞉ ota꞉ topo pia꞉peke na ya꞉la꞉me laa walo halememe. 17 Ikita꞉ leke holu piki you hoke haliwekie. Hando ekita꞉ ota꞉ ekipe. Mo tembolo da pa꞉ta꞉ pa u pelia hala꞉ kolope o mo kolo yako peao hala꞉ tembolo dape laa I̱ma꞉ iki pa꞉ta꞉ lota꞉ pitolome leekeme. 18 Ika꞉ waleme pi ma꞉nda꞉ta꞉ dupa Mandali epima꞉ mo olodana꞉ biki la alo hata꞉ hali keke pi la꞉ wia kone paa topo pia꞉ka꞉na꞉ta꞉ kota꞉ pa aleta꞉ ma꞉nda꞉ dia꞉ ya꞉la꞉pate pa mo somema꞉ mo oloda manda ula꞉ hotekena꞉ biki la alo hata꞉ hali keke pi wia꞉ka꞉na꞉ta꞉ kota꞉ koto pita꞉ ota꞉ topo pia꞉peke na ya꞉la꞉me laa walo halememe. 19 Ikita꞉ leke holu piki haliwekie. Hando ekita꞉ ota꞉ ekipe. Mo oloda manda ula꞉ pa hala꞉la꞉ hotekepe o mo hoteke yako peaasa꞉ olodape laa I̱ma꞉ iki pa꞉ta꞉ lota꞉ pitolome leekeme. 20 Koto ekina꞉ta꞉ mandali epima꞉ mo olodana꞉ biki laa hali keke pi wia꞉ka꞉na꞉ta꞉ kota꞉ koto somema꞉ mo oloda make mo oloda manda ula꞉ ale paeyao make hali keke pi wita꞉la꞉me. 21 Koto tupa꞉ kone hali epima꞉ mo tembolo dana꞉ biki laa hali keke pi wia꞉ka꞉na꞉ta꞉ kota꞉ mo tembolo da make koto tembolo da pa꞉ta꞉ hala꞉ Koda꞉ pa꞉ta꞉ make hali keke pi ombu wita꞉la꞉me. 22 Kutupa make hali epima꞉ hepenina꞉ biki laa hali keke pi wia꞉ka꞉na꞉ta꞉ kota꞉ ipikana꞉ma꞉ Koda꞉na꞉ kilu tumbuao hala꞉ sea make koto seana꞉ pila꞉ Hali pa꞉ta꞉ make hali keke pi ombu wita꞉la꞉me.

23 Iki mo Lo Pi ula꞉eki walo haleme haliweki make Pa꞉tisi haliweki make iki paeyaona꞉ hoke yenki tieke ipuleke handolo ekina꞉ I̱ paala꞉e. Ikita꞉ hoke makeaaso yayapiki hau pu haleme haliwekie. Ikana꞉ma꞉ ika꞉ ne tende peaasa꞉ tekia꞉ o pa꞉sa꞉ta꞉ma꞉ handeke ale sunu kiki yaapo telipata꞉ putupa homeke Koda꞉ pa꞉ta꞉ taiti haluekema꞉ yeke epeke telipuluekema꞉ hone wopu u halememe. Kutu pu halemepate kone pa mo wanda꞉halina꞉ ka꞉nda꞉manu epeao epeke tupa꞉ telipeao make a꞉ta꞉ma꞉ homo make ota꞉ tikitiki hau pita꞉la꞉ ekimanu make koto mo hande Lo Pi ula꞉ ekina꞉ ota꞉ titina꞉ pimanu paeyao ota꞉ hone yonka꞉lalememe. Dia꞉me. Kotoeki manuta꞉ ota꞉ pea꞉tiki pitolo hata꞉ mo mandanekeeki make na mina꞉pa꞉lapa꞉peke. 24 Ikita꞉ leke holupa pota꞉ na handeke hata꞉ kone do pota꞉na꞉ ipupe laa lo haleme haliwekie. Ika꞉ supumanu pa꞉ta꞉ pila꞉ amumu sikita꞉ epeke tupa꞉ siki talopu mea bao halemepate kone mo kemolo ma꞉na꞉ tieke aneke kone ika꞉ supu tapu pa mea yola꞉niao halememe.

25 Iki mo Lo Pi ula꞉eki walo haleme haliweki make Pa꞉tisi haliweki make iki paeyaona꞉ hoke yenki tieke ipuleke handolo ekina꞉ I̱ paala꞉e. Ikita꞉ hoke makeaaso yayapiki hau pu haleme haliwekie. Ikana꞉ma꞉ ika꞉ kawasomanu pita꞉ kapomanu yaapona꞉ hama꞉ naneta꞉ epeke tupa꞉ tandepa witolo kone tukiki yaapo pa꞉ta꞉ta꞉ lokena꞉ hone pa꞉la꞉ haumanu pita꞉ pasa꞉tei pita꞉la꞉ haumanu paeyaoma꞉ tumbulu bao ula꞉me. 26 Iki leke holupiki Pa꞉tisi haliwekio. Titina꞉ mo ika꞉ kapo tukiki pa꞉ta꞉ tala꞉la꞉ hoke ale amba꞉la tanda꞉pa꞉peke. Kutu pimika꞉na꞉ta꞉ mo kapona꞉ manda make ana꞉na꞉ tanda꞉pa wilieke.

27 Iki mo Lo Pi ula꞉eki walo haleme haliweki make Pa꞉tisi haliweki make iki paeyaona꞉ hoke yenki tieke ipuleke handolo ekina꞉ I̱ paala꞉e. Ikita꞉ hoke makeaaso yayapiki hau pu haleme haliwekie. Ikita꞉ mo hama nane ota꞉ hakepiki ma꞉na꞉ kenke liala꞉ hali lapa꞉da tupa꞉ halememe. Koto hali lapa꞉da manuta꞉ hama꞉ naneta꞉ epeke hau pea hake pea ula꞉pate tukiki pa꞉ta꞉ta꞉ hali toko tandepeke holiki manuma꞉ tumbao u hala꞉me. 28 Koto hali lapa꞉da tupa꞉ta꞉ wanda꞉halina꞉ leke popelekena꞉ ika꞉ lokema꞉ piteme hau manuta꞉ ota꞉ epeke hau pu hala꞉ haliweki leke halemepate oni tukiki pa꞉ta꞉ta꞉ makea makea hau make hoke hoke hau manuma꞉ make tumbulu baalememe.

29 Iki mo Lo Pi ula꞉eki walo haleme haliweki make Pa꞉tisi haliweki make iki paeyaona꞉ hoke yenki tieke ipuleke handolo ekina꞉ I̱ paala꞉e. Ikita꞉ hoke makeaaso yayapiki hau pu haleme haliwekie. Ikana꞉ma꞉ mo amba꞉ homemeke potopede hali manuna꞉ lapa꞉ mandata꞉ epeke toopi da siki a꞉eyo make mo amba꞉ ota꞉ epeke hau pu hao homemeke wanda꞉halina꞉ nimina tiaasa꞉ a꞉emeke pa hala꞉ ale manuna꞉ au laaso ombu hao halememe. 30 Kutu pitolo hata꞉ ikana꞉ma꞉ ika꞉ honema꞉ta꞉ Mo hande ika꞉ apa꞉mei tonu haemeke toma꞉na꞉ haoma꞉ka꞉na꞉ yoluta꞉ kota꞉ nikana꞉ma꞉ mo hande potopede haliweki lia homaema꞉ tupa꞉ na lia꞉tiki pulu puma꞉me laa lo halememe. 31 Koto pi aleme ekima꞉ta꞉ ikana꞉ma꞉ ika꞉ kone mo potopede tonu limiki haliwekina꞉ tapake weki wandiki halemeeki peneme yaasememe. 32 Kota꞉ a꞉pa꞉la꞉me. Kotota꞉ mo ika꞉ apa꞉mei tonuma꞉ kini pimiki hoke hau manuma꞉ pa꞉la꞉ma꞉ ikana꞉ma꞉ paa paeyaapa꞉peke. 33 Ikita꞉ keto manuna꞉ eiyeke tonu kone keto halememe. Ikana꞉ma꞉ta꞉ iki mo ti to hala꞉ ale pa꞉ta꞉ pomena꞉ tapaalo pa꞉la꞉ ekita꞉ ekieki pa wendulumeke hone wilimipe.

34 Koto ekina꞉ta꞉ I̱ma꞉ iki pa꞉ta꞉ dupiki pi alome. I̱ma꞉ta꞉ mo mandane potopede haliweki make mandane hone wotu ula꞉ haliweki make mo yaka pi wala꞉la꞉ haliwekimanu make iki ame̱le̱ haena꞉ tapaalo polopate mandane haliwekita꞉ ikana꞉ma꞉ lu bao make mandane haliwekita꞉ a꞉ka꞉tei wapepiki tina꞉ lu endialimikie. Kutaata꞉ mandane haliwekita꞉ mo ika꞉ yeni pu haleme da tukiki pa꞉ta꞉ hata꞉ yombua baalimikie. Kutupa mandane haliwekita꞉ da teke homeke pa꞉ta꞉ yokaata꞉ da teke ma꞉nda꞉ pa꞉ta꞉ yoka pa꞉na꞉ tolu lia꞉tiki pilimikie. 35 Kutu pilimi ekina꞉ pulu pa꞉la꞉ ekita꞉ dupa alome. Mo hande hoke hau na pimiki epeke wanda꞉hali paeya tapao pa pahameke limiki ekina꞉ yenkita꞉ iki nane la꞉ mea lopaalieke. Koto alo ekita꞉ mo hande hoke hau na pieke Eipolo pa꞉ta꞉ kini pu mea lu tiki puaata꞉ mo hande ikana꞉ma꞉ tembolo da oloda yaapo tukiki pa꞉ta꞉ limiki Beta꞉kia꞉na꞉ eiyeke Sekataiya litolo lunaimeke ekina꞉ alome. 36 I̱ma꞉ ota꞉ ota꞉ pi alome. Mo hande pa hameke limikieki paeyaona꞉ hoke yenki paeyaota꞉ do ame haleme wanda꞉hali pa꞉ta꞉ ipilieke laa leekeme.

37 Yesuma꞉ alota꞉ Diutuseleme Diutuselemeo. A꞉ta꞉ tiekee. Nakana꞉ma꞉ hoto paeyao mo potopede haliweki lia꞉tiki lia꞉tiki pu make Koda꞉ma꞉ neke pa꞉ta꞉ ipika꞉ pi mea epena꞉ tapaeyeke haliweki make toopima꞉ lu haleme. Hoto paeyao mo hande koka꞉la꞉ inkiki ipika꞉ popakema꞉ ikikimanu panka꞉ mina꞉la꞉ tupa꞉ I̱ma꞉ make naka꞉ wekiwandiki ya kikima꞉ hapisa꞉ pu halopate nakana꞉ma꞉ kiao haleme. 38 Koto ekina꞉ta꞉ naka꞉ data꞉ hankoko taa pa꞉la꞉ handa꞉e. 39 I̱ma꞉ neke pa꞉ta꞉ alota꞉ Ame do aneta꞉ I̱ a̱i̱ na handolo pelepate pa nakana꞉ma꞉ I̱ pa꞉ta꞉ alota꞉ Tekehalina꞉ biki mea ipula꞉ hali pa꞉ta꞉ ta꞉na꞉e lelipi toma꞉na꞉ta꞉ kota꞉ I̱ pa handilipikie alome leekeme.