2
Homu pu alualu pia꞉pekeeki
1 Ika꞉ Ketiso pa꞉ta꞉ haleme ekita꞉ iki honkopu hamena꞉ la꞉la꞉pe o ipika꞉ pukima꞉ homa꞉la꞉ ekima꞉ta꞉ ika꞉ hone bamena꞉ la꞉la꞉pe o ikana꞉ma꞉ mo Holi Sipitidi ame̱le̱ ta꞉ma꞉ni pea halemepe o ika꞉ kone pukima꞉ homolo epeke hau pu alualu pelemepe. 2 Kutu pu haleme ekina꞉ta꞉ kota꞉ ika꞉ hone mandake wilimieki tekena꞉ make ika꞉ mandake pukima꞉ homa꞉ alualu peleme ekina꞉ make ika꞉ mandake hone peleme ekina꞉ make ika꞉ homeke hone wilimi ekina꞉ make kotoeki paeyaoma꞉ I̱ ta꞉na꞉ wopu homa꞉ tiaamena꞉ iki sutiaasome. 3 Kutupa make naka꞉ honumake homeke hone witolo o honumake hau o handaena꞉ hau ma꞉nda꞉ na pea꞉pa꞉peke. Kotoeki na pikita꞉ iki paeyao homu pu alualu pea hata꞉ ma꞉nda꞉ pa꞉ta꞉ ika꞉ hauma꞉ta꞉ nika꞉ hau lombei pa꞉la꞉me laa hone u hapa꞉peke. 4 Koto ekina꞉ta꞉ pa naka꞉eki homeke hone witolo ma꞉nda꞉na꞉ ekita꞉ naka꞉ leke tankema꞉ na handeke wopu hone wia handeteke ha alualu pea꞉pa꞉peke.
Ketisoma꞉ homu pea hayeke ekima꞉ Koda꞉ma꞉ ipika꞉ yeiya꞉ laeyekeeki
5 Ika꞉ honema꞉ pu haleme hau manuta꞉ mo hande Yesu Ketiso ipika꞉ honema꞉ pu hayeke hau leke kone pia꞉pa꞉peke alee.
6 Yesuma꞉ta꞉ ipika꞉ ateke Koda꞉na꞉ hau leke kone pu hayekepate pa ipikana꞉ma꞉ Ya Apa꞉ tupa꞉ hapeke ekita꞉ ya welema꞉ pa꞉ta꞉la꞉ mulueke hone na wiekeme.
7 Koto hau na pikita꞉ ipika꞉ honema꞉ hone pieke ekina꞉ hata꞉ hande Apa꞉ tupa꞉ hapeke ekita꞉ pa wina꞉ kone do kenkena꞉ ma꞉nda꞉na꞉ e pokaaso halina꞉ hau leke miekeme. Kutupa ipikita꞉ kenke hali leke a꞉paata꞉ kenke hali tupa꞉ hayekeme.
8 Kutupa ipikana꞉ma꞉ ipiki kone homu pea hata꞉ mo homolo polo pieke ekina꞉ na kiake mea homeekeme. Hande ipikana꞉ma꞉ a꞉ka꞉tei wapepiki tina꞉ homeeke ekina꞉ loa꞉me.
9 Koto haumanu piekeeki tekena꞉ta꞉ Koda꞉ma꞉ Yesuta꞉ ota꞉ paeyaona꞉ titina꞉ hali haena꞉ mea a꞉meiyao ota꞉ biki paeyao lombeipiki biki kone haleekeme.
10 Koto ekina꞉ta꞉ Yesu yeiya꞉ laaluekema꞉ta꞉ hepeni nane haleme ale manuma꞉ make do kenke nane haleme ale manuma꞉ make o kenke oto nane haleme ale manuma꞉ make kotoeki paeyaoma꞉ta꞉ ipiki pa꞉ta꞉ tumiki yotu hao panda꞉ pilimikie.
11 Kutupa mo Ateke hala꞉ Koda꞉na꞉ biki yeiya꞉ laaluekema꞉ iki paeyaoma꞉ paeyao opina꞉ peneme yaaso hata꞉ Yesu Ketiso ipiki homeketa꞉ ota꞉ Tekehalie laa lelimikie.
Do kenkena꞉ pa̱a̱ peaasa꞉ wanda꞉hali
12 Ya yankeke tonuo. Hande I̱ma꞉ iki ame̱le̱ mandake haoma꞉ pita꞉ma꞉ta꞉ ya kakena꞉ homo haeme ekita꞉ epea꞉pate ameta꞉ I̱ iki ame̱le̱ na halo dina꞉ ya kakena꞉ pa homo halimi ekita꞉ kota꞉ koto ekita꞉ ota꞉ titina꞉ haue. Ika꞉ Ketiso haleme ekita꞉ paala꞉ma꞉ make pututuma꞉ homolo hata꞉ pu paeyaaluekema꞉ hone wopu u hapa꞉peke. 13 Kota꞉ pa ekipeke Koda꞉ma꞉ta꞉ ikana꞉ma꞉ ipika꞉ hone pa꞉la꞉ hau pulu pa꞉la꞉eki peawaluekema꞉ ika꞉ hone pina꞉yeke ika꞉ tukiki pa꞉ta꞉ e pokolo ombu hala꞉me. 14-15 Do kenkena꞉ hoihoi piki hoke hau pu haleme wanda꞉hali tukiki pa꞉ta꞉ hata꞉ ikita꞉ hoke haumanu na talo yako pea Koda꞉na꞉ tikitiki piki wekiwandiki haluekema꞉ta꞉ ika꞉ hau paeyaona꞉ la la pu ape ape na leke hao hapa꞉peke. Mo hande hoihoi piki wanda꞉hali pa꞉ta꞉ mo hande deto hala꞉ pi la halolo hata꞉ta꞉ ikita꞉ oli hande hombulanka꞉ to hala꞉ tupa꞉ hapa꞉peke alee. 16 Koto hau a꞉nda꞉ pimikina꞉ta꞉ kota꞉ I̱ma꞉ ikina꞉ Ketisona꞉ paa epolo pa꞉la꞉ natena꞉ ya paleke na hake halo polo ekina꞉ teke wilieke. Kota꞉ pa ekipeke ikana꞉ma꞉ koto peleme ekima꞉ta꞉ ya pokoa꞉ eta꞉ pa hameke e na pokea꞉ ya꞉ka꞉ta꞉me lolo pelemeeki walieke.
17 Koda꞉ pa꞉ta꞉ lia halo haemeke tupa꞉ ikana꞉ma꞉ make ika꞉ Koda꞉ pa꞉ta꞉ hone tulaleme ekima꞉ta꞉ koto tupa꞉ kone pu halememe. Koto pu halemeeki mandaata꞉ eki a꞉nda꞉ pitolo ya we holaemeka꞉na꞉ta꞉ kota꞉ ta꞉na꞉ma꞉ homolome. Pina꞉e. Koto ekina꞉ta꞉ I̱ma꞉ iki ame̱le̱ mandakena꞉ ta꞉na꞉ma꞉ homoloma꞉me. 18 Ikana꞉ma꞉ make koto tupa꞉ ta꞉na꞉ma꞉ homolo hata꞉ I̱ ame̱le̱ mandakena꞉ ta꞉na꞉ma꞉ homa꞉pa꞉peke.
Timodi tapaalo piekeeki
19 Ika꞉ pimanu a꞉pa moka꞉lalieeki opitolo hata꞉ I̱ sa꞉sa꞉ peaena꞉ mo Tekehali Yesu ipika꞉ hone pa꞉lekeya꞉ka꞉na꞉ta꞉ kota꞉ hosiki hao Timodi iki pa꞉ta꞉ tapaaluekema꞉ hone witolome. 20-21 Mandane wanda꞉hali paeyaoma꞉ta꞉ ika꞉ honumake honumake hone homeke u halemepate pa mo Yesu Ketisoma꞉ pulu pa꞉la꞉ ekita꞉ hone na u halememe. Kutu pu halemepate Timodima꞉ homeke homeketa꞉ I̱ma꞉ witolo hone mandake witolo hata꞉ iki pa꞉ta꞉ a꞉ta꞉ma꞉ homa hao hala꞉me. 22 Ikana꞉ma꞉ make Timodita꞉ handolota꞉ ota꞉ epeke halie la handelememe. Kutupa make a꞉tala꞉ leke hata꞉ Timodi dikana꞉ma꞉ Koda꞉na꞉ Pi Seliapo daeyaena꞉ poko hapa꞉ eta꞉ hone wilimime. 23 Kutaata꞉ pa titina꞉ amba꞉la I̱ pa꞉ta꞉ epolo pa꞉la꞉ hau manuta꞉ eki haumanu ipiliepe la handata꞉ kota꞉ ipikita꞉ iki pa꞉ta꞉ a̱i̱ epena꞉ tapaaluekema꞉ hone witolome. 24 Kutupa make Tekehalima꞉ I̱ pa꞉ta꞉ waleke kia꞉ka꞉na꞉ta꞉ iki handuluekema꞉ I̱ make hosiki hao ipulueke.
Epa꞉pototaitisi tapaali pieke pi
25 Ya honema꞉ta꞉ nika꞉ Ketiso yankeke Epa꞉pototaitisi iki nane epena꞉ ota꞉ tapaapeke ya꞉la꞉me hone ulume. Ipikita꞉ I̱ yaapo mandakena꞉ Koda꞉na꞉ e pokaaso hata꞉ mo Pi Seliapo hoeyaama꞉na꞉ sa꞉sa꞉ pitolo hata꞉ haopa꞉me. Kutupa ipikita꞉ I̱ tamba꞉ muluekema꞉ ika꞉ pi lawaasa꞉ hali make haya꞉me. 26 Ipikana꞉ma꞉ iki a̱i̱ handuluekema꞉ hone wotu u hala꞉me. Kutupa ipiki yeni haasa꞉me pi opelemeeki opitolo hata꞉ ipikana꞉ma꞉ puki tandama꞉ homa꞉la꞉me. 27 Ota꞉e ipikita꞉ yeni tieke mea ota꞉ teke pa꞉ta꞉ homea꞉pate Koda꞉ma꞉ ipiki pa꞉ta꞉ a꞉ta꞉ma꞉ homea꞉me. Pa ipiki homeke dia꞉ya꞉pate Koda꞉ma꞉ I̱ma꞉ puki tanda ma꞉nda꞉ma꞉ na homonoyeke I̱ pa꞉ta꞉ make a꞉ta꞉ma꞉ homea꞉me. 28 Koto pia꞉ ekina꞉ta꞉ I̱ma꞉ ipikita꞉ iki pa꞉ta꞉ tapaaluekema꞉ hone tieke wotu pa꞉la꞉me. Kutaata꞉ ikana꞉ma꞉ ipiki paa ipilieki handolota꞉ ta꞉na꞉ma꞉ paa homilimikie kutupa ya ka꞉nda꞉ma꞉ homoloeki make pa paeyaalieke. 29 Koto ekina꞉ ikana꞉ma꞉ ipikita꞉ nika꞉ yankekeo laa ta꞉na꞉ma꞉ wopu homa mo Tekehalina꞉ bikina꞉ handa mea꞉pa꞉peke. Koto ekina꞉ta꞉ ipikana꞉ma꞉ pia꞉ hau tupa꞉ pu haleme wanda꞉hali paeyao pa꞉ta꞉ hone wopu u hapa꞉peke. 30 Ketisona꞉ e pokaaluekema꞉ hone witolo hata꞉ta꞉ ipiki homaapa꞉na꞉ hone na wieke ekima꞉ ipikita꞉ tekepa꞉ta꞉ homeekepate piekeme. Kutupiki hauta꞉ ikana꞉ma꞉ I̱ tamba꞉ mea꞉pa꞉peke na ya꞉la꞉ ekita꞉ ipikana꞉ma꞉ pealuekema꞉ piekeme.