1 Kutupa enisolo ma꞉nda꞉ oli hepeni nanema꞉ hao holopolo ipulu ipika꞉ kiki pa꞉ta꞉ta꞉ mo honiki na wiki naku tieke kiakena꞉ pota꞉na꞉ ki make ka꞉nda꞉ tieke piki seni miniki epea꞉eki handoa꞉me. 2 Ipikana꞉ma꞉ta꞉ mo hande popake itiki hake sita꞉ hande ambisanake hao haya꞉ keto kotota꞉ hande Depolo o Sadani la꞉la꞉ aleta꞉ mina 1 daoseni bapi manuna꞉ senima꞉ tonkaeya꞉me. 3 Mo enisoloma꞉ta꞉ mo sita꞉ oni naku tieke kiake pa꞉ta꞉ yola꞉ mea loka꞉ hao a꞉mbo pambea꞉me. Pa ekipeke mo sima꞉ta꞉ do kenke paeyao haleme tapake ta꞉ta꞉ ta꞉ta꞉ makeaama꞉na꞉ mo 1 daoseni bapimanu paeya꞉ka꞉na꞉ opolu baena꞉yeke pia꞉me. Koto hoki naneta꞉ nateleke hosiki siki ka꞉la꞉pa꞉ tapaalieke.

4 Kutupa kini seamanu handoa꞉me. Koto seana꞉ pitimi haliwekita꞉ pi yokaalu pulu pimi wele halea꞉me. Kutupa make mo hande Yesuma꞉ peneme yaeya꞉ ota꞉eki waleme ekina꞉ make Koda꞉na꞉ pi waleme ekina꞉ limiki wanda꞉halina꞉ temokomanu handoa꞉me. Ikana꞉ma꞉ta꞉ mo hande sayale tieke hombeleke make ipiki manda꞉ meao wepimiki ale yaapo pa꞉ta꞉ panda꞉puniao yeiya꞉ laaso hata꞉ yeni na pimi make ika꞉ wenoko o popeke nane kikina꞉ mo sayalena꞉ maka na mimikime. Ikita꞉ paa da꞉ta hata꞉ 1 daoseni bapi manuna꞉ Ketiso ame̱le̱ kini pita꞉ handeteke haememe. 5 Do ekita꞉ ota꞉ titina꞉ homa꞉la꞉eki mea tiaasa꞉ekie. Mo mandane wopu homemeke wanda꞉hali paeyaota꞉ a̱i̱ na da꞉ta tiao haemepate mo 1 daoseni bapimanu hoki nane detena꞉ pia꞉me. 6 Mo mandane homeme wanda꞉halimanu do titina꞉ mea tiaasa꞉eki pa꞉ta꞉ apa꞉taemeka꞉na꞉ta꞉ ika꞉ta꞉ ta꞉na꞉ma꞉ homena꞉ laa yako pina꞉ lelieke. Mo yaapo peao homa꞉la꞉ ekima꞉ta꞉ iki wataapeketa꞉ honkopu na ula꞉me. Ikita꞉ Koda꞉ pita꞉ Ketiso yaapona꞉ yeni peaasa꞉ haliweki hata꞉ 1 daoseni bapimanu ipiki ame̱le̱ handeteke halimikie.

7 Mo 1 daoseni bapimanu paeya꞉ka꞉na꞉ta꞉ mo Sadanita꞉ ipika꞉ dipula pila꞉eki ka꞉la꞉pa꞉ tapaalieke. 8 Ipikana꞉ma꞉ta꞉ mo kenke honiki honiki paeyao pa꞉ta꞉ hala꞉ tapake paeyao makealieke. Kotota꞉ Koko pita꞉ Meikoko leke tapakee. Sadanima꞉ta꞉ paeyao a꞉nda꞉na꞉ hatuku ipilieke. Mo tapaketa꞉ mo dawala hou manuma꞉ handilimikie. 9 Ikana꞉ma꞉ta꞉ kenke tieke tumbaaso hata꞉ Koda꞉na꞉ wanda꞉halina꞉ mombeleme alena꞉ make Koda꞉na꞉ pukima꞉ homa꞉la꞉ daoni make pua popei yaememe. Pate ti uleke oli hepeni nanema꞉ a꞉pa lopaa paeyao hoeyaeya꞉me. 10 Kutupa mo wanda꞉hali makeaeya꞉ Sadanita꞉ oni ti uleke kiake make titipupiki lanka꞉ ma꞉nda꞉ biki solopa pa꞉ta꞉ yola꞉ mea lopaeya꞉me. Kotota꞉ amba꞉ hande sayale tieke hombeleke make mo makeaaso potopede hali make lopala꞉ pa꞉ta꞉e. Kutupa ikita꞉ timba꞉ ala꞉eki make natepa yolao hoto paeyao puki tandama꞉ homo halimikie.

11 Kutupa mo hakepiki kini sea tieke pita꞉ mo seana꞉ pila꞉ hali yaapo handoa꞉me. Kutupa mo kenke ya yaapota꞉ ipika꞉ leke popelekena꞉ na haena꞉ loluekema꞉ pa pindipa pualu pitolo hata꞉ alupaepeme. 12 Kutupa mo homemeke wanda꞉hali aneke make natehali make paeyao mandakena꞉ mo kini seana꞉ puki tikitiki haemeeki handoa꞉me. Buka manuta꞉ lumbia꞉me. Kutupa buka ma꞉nda꞉ta꞉ mo da꞉ta꞉la꞉ wanda꞉halina꞉ buka lumbia꞉me. Mo homemeke wanda꞉hali paeyaota꞉ mo buka manuna꞉ lao wieke tupa꞉ ika꞉ pimiki tupa꞉ siki kone ma̱leke lia telipia꞉me. 13 Kutupa mo dawalama꞉ ipiki pa꞉ta꞉ homemeke wanda꞉hali halea꞉me. Kutupa homa꞉la꞉ ekima꞉ make mo homo hala꞉ kenkema꞉ make ipilika꞉ wia haepe toko halepeme. Kutupa paeyaota꞉ ika꞉ pimiki tupa꞉ siki kone ana꞉na꞉ ma̱leke lia telipia꞉me. 14 Kutupa homa꞉la꞉eki pita꞉ homo hala꞉ kenke yaapota꞉ oni ti uleke pa꞉ta꞉ yola꞉ mea lopaeya꞉me. Do ti uleke kiaketa꞉ yaapo peao homa꞉la꞉ekie. 15 Kutupa make ma꞉nda꞉ epi ipika꞉ bikita꞉ mo da꞉ta꞉la꞉ wanda꞉halina꞉ bukana꞉ na laeya꞉ someta꞉ oni ti uleke kiake pa꞉ta꞉ yola꞉ mea lopaeya꞉me.