2
Ko E Yesus Karo Rhek Ngat Laut Kir Kim O Engyel Ngaro Rhek
1-4 Tennik E Nut ten karo pos ngang o Yuda ko vgum o engyel ruk ngat kol ka gu kam rere orom mar tok. Va o Yuda tgus ngta lol he, he karo pos ngaro serppak ngta kpom mar tgus. Te tok, o Yuda tgus ngam kaennegiang E Nut karo pos ruk endruk he kerngnek vgum En kam kpoot mang ngar. He ekam tok, E Nut nam her mi kut kael a kapnes ngang ngar, kam sim kut kais kmikkiem lsir enang ko ngam kaennegiang karo pos enang tok kam kerngnek vgum En tok. Vanangko mor ri tete, ngot kle klol o rhek akuruk yok vat ko vgum o mia ruk ngat mi ngannik ko vgum Ngoldaip e Yesus mruo ko her en arhe ta ktar kpakvom kam paam ngaro rela mang ngar. Va o rhek ruk endruk ngta vle mang E Nut kam susulgim mor nngia nngia. Va ngat kaenserpagam o rhek ruk endruk kam kta havaeng ngor orom mar kat.
Mare, E Nut mruo tmur kaenserpagam karo rhek ruk endruk kat orom o ngaelmir ruk lserpgue va orom o ngaelmir ruk ngta reimsor mnam o mia va orom o reha ruk lserpgue ngo mamten va orom o nngiar ruk mkor E Nunu A Totur ko En tkaisis kim o mia ormar kmikkiem ka mur kut svil mruo. He enang tok, e Yesus karo rhek ruk endruk ngat ho mi kut laut hak he kir kim E Nut karo pos ruk endruk o mia ngat lol ko vgum o engyel tennik. He ekam tok, enangthe ngop kaennegiang e Yesus karo rhek ruk endruk mang E Nut ko tsusulgim mor tok, va ngot ho lo is hak kam mrua hong ngor mnam a kapnes to E Nut ner kael malpgem mor ekam tok. He ekam ko e Yesus karo rhek ruk mang kam susulgim mor ngat laut he kir kim o engyel ngaro rhek ruk mang o pos tok, va ngruak ho sim ktua ngangreal ngang ngor hak mang e Yesus karo rhek ruk endruk ngot ngannik ko vgum endruk ngat mi ngannik ko vgum e Yesus mruo, he nang mor kam lua vraik petgim e Yesus. Ii, mguak smia ngangreal ngang nguk mang e Yesus karo rhek ruk endruk kir kim o Yuda ko ngat lo smia ngangreal ngang ngar mang E Nut karo pos e.
Ko E Yesus Tlol O Mia Tgus Ngaro Ngaekmol Kam Yor
5 Ii, va a ngorsang to koknaik, endo kua rere mang tete, E Nut tlo en a ngorsang to endo ngang o engyel, mar kam nho mang kat e. 6 Nove, vanangko a mhel langto tittiegom E Nut karo rhek ko mnam E Nut ka meer mnam a mhe langto kmenserpagam a her papat to endo arhe ko thavae te,
“Nut, o mia, mar o gi vrong mia e, he nngia, ko im vu kael ila papat mang ngar he ka nho mang ngar. Ii, va A Mhel To Nkong Man Ma Volkha ta vle nngia, he im vu kaelongtok mang kat? 7 Ko ye her si ellik mang kmel en mi mhel kam vrua konner o engyel en kam vle tok vur nong ke laut na, vanang ye kle her ktua hover kam teiver kat kam him orom ila msasaen kam khenam ila mmok orom en. 8 Ye her teiver en tok, to le kael o vrong tgoluk tgus ko maktiegom en kam nho mang ngar.”
Ii, E Nut tel o tgoluk tgus ko maktiegom en he ho lo orim a tomhel tang hak kam lua vle ku meorom ka tavgo e. Pu tok, vanangko tete, ngot lo mi vokom o tgoluk tgus ko maktiegom en vop. 9 Vanangko e Yesus to tmur krus orom en mruo kam mur kaellik orom en a mi mhel kam vrua konner o engyel, en ngot kle mi kut vokom en tete te, E Nut teiver en kam him orom ka msasaen kam khenam ka mmok orom en tok. Ii, ngoma vokom e Yesus enang tok, ekam ko tkol o nganngannes he kyor mang o mia, he nang E Nut kam ring ya mang o mia tgus orom ka yor to endo ko tlol o mia tgus ngaro ngaekmol kam yor tok.
Ko E Yesus Ta Plam A Valngan To A Totur Orom Mar
10 Ii, her e Yesus to ta plam a valngan to E Nut nera susulgim mar arhe ko tlol o nganngannes kam yor kam susulgim mar enang tok arhe. He E Nut to tkueng o vrong tgoluk tgus, mar kam vle ngang en mruo, ther le ktarkanang ka ngaeha tgus hak orom Khal vgum o nganngannes ruk endruk, en kam ngae her mi kut lol nguaro ngaekmol kam yor tok kat arhe. He kmikkiem enang tok, E Nut ther mi kut el ka papat to kam tarkanang ka ngaeha orom e Yesus mo mmie tok, nang e Yesus kam kle kaeharom o mia kam vle te, mar E Nut kles msim her vgum ka yor tok, mar kam le kol a ktalhok to kam plong vle ko kim E Nut ngnik ngnik. 11 Ii, e Yesus teharom o mia, mar kam vle te, E Nut kles ruk ngma vle ngang En mruo msim orom ngaro keknen ruk o totur. Va o mia ruk endruk e Yesus teharom mar kam vle la totur tok, mar ngat kaum kottek mnam a valngan to atgiang msim. He ekam tok, e Yesus nam lua leep kam mon o mia ruk endruk te, kaornopeik e. 12 Ko en thavaeng E Nut te,
“Ngora kni pum yin kam kanprim yin kam mon ila munik ko kim koornopeik ngaro kerok mnam o kolkhek ruk ngoma kaum kam totu pum in.”
13 Va ta kta havaeng E Nut kat te,
“Dok vat, ngora kaur orom E Nut kam serppak orom En kat.”
Va tok kat te,
“Dok ta he, dok kar E Nut kles akuruk tel mar maktiegom dok.”
Ko E Yesus Tmur Ellik Mang Kmel En A Mi Mhel He Kpis Mo Mmie Kam Yor Mang O Mia
14 To kmikkiem enang ko o mia ruk endruk ngma vle orom ngaro pkor va ngaro gidiel, va e Yesus kat tpis mo mmie enang a mi mhel tok kat, orom ka mi vok va ka mi gidiel kat, en kam mi ktua kol a vle to mkor o mia ruk mo mmie. E Yesus ta vle tok, he nang en kam mi ktua yor mang o mia. He her vgum ka yor to endo, tho mi kut kir kim e Seten to o yoror ngar teit ka serppak 15 he kaimim kim o mia ngaro vurkul kam lo kta gor kam yor kat. Ii, ko ther hong ngar ko maktiegom e Seten ka serppak to tkaur mnam mar ka kpom mar kmenen mar mekam mekam kam gor kam yor tok. 16 Ii, e Yesus nam her gi ktua vle ngang o mia enang tok arhe, nang nam lua vle ngang o engyel kam turang ngar tok e. Parem ko, ta vle ngang o mia ruk ngta vle enang te, e Ebrehem kaores arhe. 17 He her sim kut mang ko o mia ngama vle orom ngaro pkor va ngaro gidiel tok, yek e Yesus ther mia pis tesgun mo mmie kam her sim ktua vle gi enang kaornopeik ruk endruk kmikkiem ngaro ngorsang lsir tgus tok. Ii, tesgun ther mia pis enang o mia tok, kam lol o vrong vnek tgus ruk o mia ngma lol kat. Yek, tle kut kais kam vle te, ngaro pris ruk laol ngaldaip to en, en kam sim kut kaeha mekam mekam mang ngar ngang E Nut. Ii, tpis kam vle te, ngaro pris ruk laol ngaldaip to en tok, en kam mrung ngar he mur kaen ka vok mruo kam nngiar ngang E Nut orom kam ngam menglol mnam E Nut ka vrek kam pet E Nut ka ngaesik ngang ngar pum ngaro kerkeknen. 18 Ii, he ekam ko e Yesus ta ktar kngae kun mnam o vrong vnek ngo mamten ruk o mia ngma ngae mnam mar, ko e Seten ther egom en orom mar, va en ther mi kut kais tete kam mrung o mia ruk ngma ngae kun mnam o vrong vnek ngo mamten ruk e Seten nam kaegom mar ormar tok kat kam turang ngar pum mar.