5
E Yoanes Tkaengogo Orom A Sipsip To A Sital Ko Ta Kpom E Nut Ka Meer Ko Maktiegom
1 Kopekam ko ko kaengogo orom o tgoluk tgus ruk endruk knop, kua langtar ma kuon vop, va ko le kaengogo orom Endo tkorsang kuon mang a ngorsang to endo ko ta kpom a meer kun mnam ka miktiek. Va ngat her ittiek kuon mang a meer to endo kalo ngaiting tgus to kvat orom o vnangal ruk a ktiek hori orom alomin. 2 Va ko kaengogo orom a engyel to tvua serppak ko ta rere klik te, “Erieto tmi kut is kam pet o vnangal ruk endruk he klamher a meer to endo?” 3 Ko vokom va nong a mhel tang mo mmie va kuon ma volkha, i o kun ku meorom a mmie ka ngaesik hak ta vle ko tmi kut is kam petik he klamher a meer to endo e. Va kam gi vur nho kun mnam, va nong a mhel tang hak to tmi kut is kmeharom tok kat e. 4 Ko vokom tok, to ko elha kmeti. Ko eti eti eti ekam ko a engyel to endo tlo pis mang a mhel tang to tmi kut is kam pet o vnangal, i o kam gi vrong nho kun mnam kat e. 5 Ko eti tok kngae, to a hipun langto mnam endruk a mhelom hori orom korlolo thavaeng dok te, “Or kmeti, ekam ko, e Devit kaes, endo ta vle enang a ho ka sipngan ko ta par mnam a ngausie ka pun to mkor e Devit, ka serppak ta vle enang a ngaemslang to a laion, her Endo arhe tmi kut is kam pet o vnangal ruk aktiek hori orom alomin kam lamher a meer to endo ekam ko en ther mi kut kir kim ka imuo he.”
6 To kopekam tok, ko kaengogo orom Endo ta vle enang A Sipsip To A Sital ko ta nho enang te, o mia ngat im kngam a yoror. Ta sir kun pgegom endruk korlolo E Nut tkueng ngar he ngta ktal ko ngat kairkleim a ngorsang to endo, va o ngorsang ruk a mhelom hori orom korlolo ngat kairkleim endruk korlolo tok kat. A Sipsip To A Sital to endo karo mus ruk aktiek hori orom alomin kuon mang ka lpek. Va karo kerok ruk aktiek hori orom alomin tok kat. Karo kerok ruk endruk, mar ngat kaum ka vle atgiang te, mar E Nunu A Totur, to ka tavgo ta vle kuo mang e Yesus kakro ngaomevek ruk endruk aktiek hori orom alomin.*O rhek ruk lsir ngata vle te, “O nunu ruk aktiek hori orom alomin.” Ii, her E Nunu A Totur arhe to E Nut tmeng, En kam ngae kun mnam o mhetor tgus mo mmie. 7 A Sipsip To A Sital to endo ta ngae kpis ko kim Endo tkorsang kuon mang a ngorsang he kol a meer ko mkor En kun mnam ka miktiek. 8 Tkol he, to endruk korlolo E Nut tkueng ngar he ngta ktal kar o hipun ruk a mhelom hori orom korlolo ngat kaum ktubulkek ku penharom A Sipsip To A Sital to endo. Ii, langto langto mnam mar tgus ta kpom a ho ka grie he kpum. Ii, va langto langto mnam mar ta kpom a kolhi to ngat eharom mar orom a kre to a gol kat. Va kun mnam o kolhi ruk endruk a paei ka ngaus to ngma mon te, a ensen nma pum ka grap ngpalmai. Va a ensen to endo ta vle te, o ngarkie ruk mkor E Nut karo mia mruo. 9 To mar tgus ngata kni pum A Sipsip To A Sital orom a kni to a gunngar kam kni te,
“Ye ho mi kut is kam kol a meer he kpet karo vnangal kam lamher, her vgum ko o mia ngat im yin kngam yin a yoror. Ii, ye her el ekam o mia ngang E Nut orom ila gidiel mruo tok. O mia ruk ngat pal mnam o vrong valngan, o vrong usiel, o vrong rhek va endruk nkong ngar ko mnam o vrong marhok tgus va ye her el ekam mar he orom ila gidiel mruo to endo. 10 Ii, ye her mi kut eharom o mia ruk endruk kam mi kut vle te, ilaro pris ruk ila tavgo ta vle kuo mang ngar, he nang mar kmeha ngang E Nut to ngoma totu pum. Ii, va her mar ruk nga tavgo nera vle kuo mang a mmie ta tgus kat arhe.”
11 To ko kaengogo orom o tgoluk akuruk yok va ko ngan o engyel ngarla vurgem ngarla vurgem ngaro ktui. Ko o engyel vang o engyel vang hak ngat kairkleim endruk tgus ngat kairkleim a ngorsang to endo, endruk korlolo E Nut tkueng ngar he ngta ktal va o hipun ruk a mhelom hori orom korlolo ruk ngat kairkleim mar kat. 12 Mar tgus ngat kaum ka kni klik pum A Sipsip To A Sital te,
“A Sipsip To A Sital, her en tmi kut is arhe kam lol o mia ngaro rhek ruk ngta kanprim he ktotu pum en ormar. Ii, tmi kut is kam lol ngaro rhek ruk ngta kanprim en ormar mang ka serppak, karo vu tgoluk, karo vu papat, ka tavgo va ka mmok kat. He en her Endo ngat im kngam a yoror kat arhe.”
13 Ngta kni tok, to ko kle kngan o tgoluk tgus ruk E Nut tkueng ngar ko ngta kni pum kat. Ii, endruk ku mmie, kuon ma volkha, kun ma a mmie ka ngaesik hak, va kun mnam a mou kat. Ngta kni pum E Nut kar A Sipsip To A Sital te,
“O mia tgus ngak khover A Sipsip To A Sital kar Endo nma korsang kuon mang ka ngorsang nginalo munik he kanprim min mang mela mmok kam ngae ngnik ngnik.”
14 Ngta kni pum min tok, to endruk korlolo E Nut tkueng ngar he ngta ktal, ngta koripang ngar te, “Mi lmien.” To o hipun ruk a mhelom hori orom korlolo ngta tubulkek ku penharom min he ktotu pmin kat.