IOANE ENA URIURI BAGUBAGUNANA
1
Tamada ana bogao boeana eai, heoiesegana eda abalobaina.
Bagubaguna eai ie tubu wa, i laoma e huia ta, ai ataieyao, matamai eai ai itayao, ai italau arinai, hinage nimamai eai ai abiita, iaede mauri Ribana— maurina se hemasarahayao, ai aie ita, ribana ai ribaribaei eo ai ribahemasaraha omi arimiu eai, ede mauri i lau e nige nosina, Tamana boeana eai, iaede se hemasaraha arida eai— saha aie ita, eo ai ataiei, iaede ai hemasarahayawa omi arimiu eai, bena omi to ai heoiesegana ta abi; mamohoi eda heoiesega ede Tamada arinai, maeda ia Natuna Iesu Keriso. Teina ginauridi ta ai uridiwa, bena eda kode i monau. (Io. 15.11.)
Riba wa ia arinai ai ataiei eo omi bena ai heribamiu, ede ina: Eaubada ia marana ede, eo ia boeana eai nige begana masigirina. Ena ta ene ia maeda heoiesegana ta abi, na sora masigirina eai ta laulau, ta boraauridi, eo mamohoina nige ta miamiawatai. Na ena marana eai ta laulau, doha ia ede marana eai, ita esau to esau abo ta hai‐heoiesega, eo Natuna Iesu Keriso osinana, baaea gamagamagari eai i heaheaada. Ena ta ene nige eda baaea, ta borauioida meta, eo mamohoina boeada eai nige’e. Ena eda baaea ta ribahemasarahadi, ia ena abi se lolo, eo i dudurai, eda baaea abo i ribagigiridi eo laulau gamagaridi nige se dudurai, aridi eai abo i heaada. 10 Ena ta ene ita nige ta baaea, ia ta awa‐boraboraei, eo ena riba arida eai nige’e.