1 Iakobo i torohaiuio ena dobila i lauwatai, to Eaubada ena aneru ia se hailobai. 2 Ena huia itadi Iakobo i ene, “Ina Eaubada ena tauiala ede,” to eanua wa esana ie tore Mahanaima.

3 Abo Iakobo ena heaheari tataodi i hetamaribagunaidi ena tau Isoa arinai, Seria eanuana eai, ia ede Edoma tanona eai. 4 Doha ina i lauhesomdi i ene, “Ina doha abo au ribalau agu tanuaga Isoa arinai, ‘Em heaheari tauna Iakobo ena riba ede ina. Huia ku’uku’una ea miamia Labana arinai, abo nei eai ea miamia i laoma e wauta. 5 Eau nimagu eai bulumakau, asini, mamoe eawoidi, heaheari tataodi eo sisinedi hinage: arinai riba ta ea hetamariawa egu guiau arim eai, bena nualolo ea lobai oa arim eai.’ ”

6 Tatao i hetamaridi wa, se uioma Iakobo arinai si ene, “Aie lage em tau Isoa arinai, eo ia hinage i laolaoma bena i hailobaim, ana bodao tataodi handere hasi maenayao.” 7 Iakobo i matausi ariri, eo i nuadubu, arinai mamoe eawoidi, eo bulumakau, eo kamela i peilabuiedi. 8 I ene, “Ena Isoa i laoma pele esega i lobai eo i hebaaea, pele esau wa abo i dago.”

9 Abo Iakobo i ene, “Oa tamagu Aberahama ena Eaubada, eo tamagu Isaako ena Eaubada, egu GUIAU, oa u heribagu u ene, ‘U uio em eanua tahunuana, eo em tataoyao aridi eai abo hinage ea saguim’, 10 eau nige ea lolo abo em ainauia gagiliaririna arinai u ainauiaigu, em gadosisi otaotahaina eo em abi lolo u heita em heaheari tauna arinai; paana nabada egu tu’e mo nimagu eai na ina Ioridana sagana ta ea awasi, na ina huia ta ea laoma pele labui lailaidi nimagu eai. 11 Ea awanorilaowa bena egu tau nimana eai u abihemaurigu, ia ede Isoa nimana eai, paana ea matausi ata i laoma i hebaaeagogoimai, nanatuguyao ma sinadiyao. 12 Abo hinage oa u ribaei u ene, ‘Mamohoi abo ea ainauiaim, eo am isimurita abo ea hegamagariaririedi doha gabogabo hasarina gelegelena wa nige tau esau abina i ata i hasiri.’ ”

13 Meta maionana eai ne ie bawa nei eai: abo ginauri saha eo saha nimana eai i lobai tupona ie abi bena Isoa ena tau i ainauiai. 14 Goti bawesinadi handere labui, goti tamoadi tau‐esega‐i‐mate, mamoe bawesinadi handere labui eo mamoe tamoadi tau‐esega‐i‐mate. 15 Kamela bawesinadi ma nanatudiyao tau‐esega‐i‐mate‐saudoudoi, bulumakau bawesinadi tatao‐labui‐si‐mate, bulumakau tamoadi saudoudoi, asini bawesinadi tau‐esega‐i‐mate ma nanatudiyao saudoudoi. 16 Abo i toredi ena heaheari tataodi nimadi eai, pele esau eo pele esau, eo i ribalau aridi eai i ene, “Au edabagunaegu, eo pele esau pele esau bena duaduaridi eai sorasoradi.” 17 Abo bagubagunadi i lauhesomdi i ene, “Ena egu tau Isoa au hailobai, eo i hesiolaowa i ene, ‘Omi ede eai enanayao, eo haedi au laulau, eo ina suisui ta au woeadi meta eai enanayao?’ 18 Abo au heuioi au ene, ‘Ina suisui ta em heaheari tauna Iakobo enanayao, eo isi ede ena ainauia ena guiau Isoa arim eai. Hinage u ita ia murimai eai i laolaoma.’ ” 19 Pei helabuina tauwoeaina hinage doha i lauhesom, hehaionana hinage, abo tatao gamagaridi isi suisui eawoidi se lauwataidi i heribadi i ene, “Ena Isoa au lobai ina doha abo au ribalau arinai, 20 hinage abo au heriba, ‘U ita em heaheari tauna Iakobo murimai eai i laolaoma.’ ” Paana i ene, “Ainauia i bagunaegu abo arinai nuana ea helolo, murina eai abo matana ea ita, nuana doha meta ea ginauri abo nuana ea hebiga.” 21 Arinai ainauia wa i baguna, na maiona ne ie bawa tatao gamagaridi boeadi eai.

22 Abo maionana eai ie toro, monenayao labui, ena heaheari sisinedi labui, eo nanatunayao saudoudoi‐esega i woeaidi to Iakobo sagana se awasi. 23 I abidi i hetamaridi goila hari sanaawasi eai, eo ena ginauri gamagaridi hinage. 24 Arinai Iakobo iabom ie bawa, eo tau esau maena se haipoipoi i lau e mara i uiari. 25 Abo tau esau wa ie ita taba nige Iakobo i saetawatawai, arinai gotuna i abi’ita; to edi haiabi boeana Iakobo danana i tarumo. 26 Abo i ene, “U abigabaegu paana mara i uiari.” Na Iakobo i ene, “Taba nige ea abigabaem i lau e em ribahelolo u leama enagu.” 27 Abotai i hesioei i ene, “Esam ede eai?” I heuio i ene, “Iakobo*“Iakobo” aniona ede tauborabora, tauaiyahari..” 28 Abo i ene, “Esam Iakobo abo se torebui Isaraela, paana oa doha wasawasa esau em gigibori ie lai Eaubada arinai, eo tatao aridi eai, eo hinage u saepoi.” 29 Iakobo i hesiolau arinai i ene, “Ea aibodaim bena esam u heribagu.” Na i ene, “Paana saha esagu bena abina u ata?” Abo nei eai tau wa Iakobo i ribahelolo. 30 Iakobo eanua wa esana ie tore Penuela†“Penuela” aniona ede Eaubada ana ao. paana i ene, “Inai Eaubada ea itayao, eo ai hai’itaita, na sora ma miagu.” 31 Abotai Penuela i torohaigabaei mahana i daladalasae ie sina potana eai, na i laulaudae. 32 Ginauri ta debana eai Isaraela tataodi suisui gotudi bulumadi taba nige se aidi i laoma e wauta, paana Iakobo gotuna tau wa i abi’ita to danana i tarumo.