MATAIO ENA EVANELIA
1
1 Iesu Keriso, Davida natuna, ia urutubunayao bukana ede.
2 Aberahama Isaako i hetubu, Isaako Iakobo i hetubu, Iakobo Iuda ma ena tataoyao i hetubudi. 3 Na Iuda Peresa eo Sera i hetubudi, Tamara arinai i abidi, Peresa Heserona i hetubu, Heserona Rama i hetubu, 4 Rama Aminadaba i hetubu, Aminadaba Nasona i hetubu, Nasona Salamona i hetubu, 5 Salamona Boasa i hetubu, Rahaba arinai ie abi, Boasa Obeda i hetubu, Ruta arinai ie abi, Obeda Iese i hetubu, 6 na Iese Davida i hetubu, ia ede wasawasa.
Davida Solomona i hetubu, Uria monena arinai, 7 Solomona Rehoboama i hetubu, Rehoboama Abia i hetubu, Abia Asa i hetubu, 8 Asa Iosapata i hetubu, Iosapata Iorama i hetubu, Iorama Usia i hetubu, 9 Usia Iotama i hetubu, Iotama Ahasa i hetubu, Ahasa Hesekia i hetubu, 10 Hesekia Manase i hetubu, Manase Amona i hetubu, Amona Iosia i hetubu, 11 Iosia Iekonia maena tataoyao i hetubudi, huiana se toaidi se laedi Babulonia eai.
12 Babulonia eai se laedi wa, murina eai Iekonia Salatiela i hetubu, Salatiela Serubabela i hetubu, 13 Serubabela Abiuda i hetubu, Abiuda Eliakima i hetubu, Eliakima Asora i hetubu, 14 Asora Sadoka i hetubu, Sadoka Akima i hetubu, Akima Eliuda i hetubu, 15 Eliuda Eleasara i hetubu, Eleasara Matana i hetubu, Matana Iakobo i hetubu, 16 Iakobo Iosepa, Maria monena, i hetubu, arinai abo Iesu, esana Keriso, ie tubuma.
17 Isidi gamagaridi Aberahama i hetubudi i lau e Davida arinai, isidi saudoudoi‐hasi, eo Davida ena huia eai i lau e se toaidi se laedi Babulonia eai, isidi saudoudoi‐hasi hinage, eo se laedi Babulonia i lau e Keriso arinai, isidi saudoudoi‐hasi.
18 Keriso edi huia labasina eai doha ede ina: ia sinana Maria Iosepa sora nige i tawasorai, taudi labui sora nige se mia esega, Earua Tabuna ia i heabiabi. 19 Monena Iosepa ia tau‐laulaududuraina, nige i henua tatao Maria se ita, bena i torehesuarayamuyamui. 20 Na ena nuatu i nuatudadaasa, enosuai eai Guiau ena aneru i taumasaraha ia arinai i ene, “Iosepa, Davida natuna e, tabu u matausi Maria monem u bodai, na Earua Tabuna ia i heabiabi; 21 abo i haisu, natuna tau abo i labasi, esana abo u tore Iesu, paana ede tatao, ia enanayao, edi baaea eai abo i hemauridi.” 22 Teina ginauri gamagaridi ta se tubu, bena Guiau ena riba, peroveta awana eai wa, abo i tubu, doha i ene:
23 “Hage au ita, hasara nuanuasupuna esau abo ie boga, abo hinage i haisu, natuna‐tau abo i labasi, esana abo se tore Emanuela,” (Is. 7.14)
(heaheasonina ede ina, Eaubada maeda.) (Is. 7, 8, 10) 24 Iosepa eno eai i siliata, abo i toro aneru ena riba wa i lauwatai, monena i woeai, 25 na sora nige i bodai i lau e natuna‐tau i labasi, abo esana ie tore Iesu.