1 Ita louda Pibe enana ai ribahesibasibamiu, ia ekalesia Kenekerea eai tauheayaiedi; 2 ia au oiamihai Guiau boeana eai, doha hetabu tataodi edi laulau, eo ana paisoa aisana aisana ia abo au sagusagui, paana ia tatao gamagamagari tau sagusaguidi ede, eo eau hinage i saguigu.

3 Perisika eo Akula, helegu taupaipaisoa Keriso boeana eai, ea aitoiedi; 4 egu mauri debana eai isi edi mauri se torehebiga, isi ea lautoiedi, hinage nige eaubom mo, Murimuri‐tataodi edi ekalesia gamagamagari hinage se lautoiedi. 5 Hinage ekalesia isi edi numa eai wa, ea lautoiedi. Epaineto, ia ea gadosisiaririei ea aitoiei, ia Asia ealahouna Keriso arinai. 6 Maria hinage ea aitoiei, boeamiu eai i paisoa adidiri ariri. 7 Eo Anironiko, eo Iunia, egu eanua tataodi, ea lautoiedi, nabada wa se tutuguduesegaimai, isi aposotolo boeadi eai se sae ariri eo isi Keriso tauataiena bagubagunadi, huia ne eau soragu. 8 Amepelia, Guiau boeana eai ea gadosisiaririei, ea aitoiei. 9 Urobano, ada sagu Keriso boeana eai, ea aitoiei, eo Setaku hinage, ea gadosisiei. 10 Apele ea aitoiei, Keriso ia i nualoloei. Aritobulo ena dodogayao ea lautoiedi. 11 Eo egu eanua tauna Herodiona ea aitoiei. Isi Narikiso ena dodogayao Guiau boeana eai ea aitoiedi. 12 Terupaina eo Teruposa isi Guiau arinai se paisoa adidiri, ea aitoiedi. Paresida, ea gadosisiaririei, ia Guiau ana paisoa taupaipaisoa adidiriena, ea lautoiei. 13 Rupo, Guiau ena tauhinehinerina esau, ma sinana, ia eau sinagu hinage, ea lautoiedi. 14 Asukirito eo Pelegona, eo Heremese, eo Pateroba, eo Heremasa, eo eda tataoyao isi maedi se miamiaesega wa, ea lautoiedi. 15 Pilogogo eo Iulia, eo Nerea, eo ia louna hinage, eo Olumepa, eo hetabu tataodi gamagamagari isi maedi se miamiaesega wa, ea lautoiedi. 16 Alagoi tabuna arinai au haiaitoiemiu. Keriso ena ekalesia gamagamagari omi se lautoiemiu.

17 Na egu tataoyao e, ea awanorilaowa arimiu eai, ea ene isi boeamiu eai se peilabuimiu eo se woeaponorimiu au itakomakomanidi; riba au ataieyao isi se laugudugudui: au otaotaedi. 18 Paana isi meta doha eda Guiau Iesu Keriso nige se heayaiei, isi bogadi mo se nuatuidi, edi riba amna eo edi ribapasipasi borabora arinai tatao supusupu se boraboraidi. 19 Omi emi awaabi tatao gamagamagari se nuatuiyao, arinai omi debamiu eai ea kode; egu nuatu ea ene bena lolo arinai au sonoga, na baaea arinai bena au supusupu. 20 Eaubada loni tauleawana, nige eawalana Satani abo i ututawatawai aemiu ubudi eai. Eda Guiau Iesu Keriso ena ainauia arimiu eai i ota. Amen.

21 Timoteo, helegu‐taupaisoa, eo Lukiso, eo Iasona, eo Sosipatela, egu eanua tataodi, se aitoiemiu.

22 Eau hinage, Teritio, teina leta tauurina ede, Guiau boeana eai ea lautoiemiu.

23 Gaio, egu aba‐aitaumana eo ekalesia gamagamagari edi aba‐aitaumana, i lautoiemiu, eo Eraseto, eanua ta edi tobo tauitawataina, eo Kwareto hinage, eda tau esau, se lautoiemiu. 24 Eda Guiau Iesu Keriso ena ainauia omi gamagarimiu arimiu eai i ota. Amen.

25 Ia arinai, henuapaipaimiu abina i ata, doha egu evanelia eai ea ribaei, eo Iesu Keriso ena lauguguia ribana eai hinage, doha hinage laulau‐eamuyamui se hemasarahamao, ia ede se toreyamui tanoubu ena abatubu eai wa, i laoma e huia ta. 26 Huia mo ta se hemasarahayama eo peroveta edi uriuri eai, Eaubada mauri nige nosina ena laugagaeo eai, eanua gamagamagari abo se heatadi, sunuma awaabina eai abo ie tubu. 27 Eaubada arinai, iabom i sonoga, Iesu Keriso debana eai ia se hedebasaei, i lau e ana huia, ana tasi. Amen. *Korinito eai Roma enadi se uri, Pibe nimana eai se hetamari, ia ekalesia Kenekerea edi heaheari sinena esau.