1 Jon 16.12, 1 Ko 2.14-15 Mam ay sɨkop. Yad nɨbop takaw agñɨnek ak, binɨb God Kawnan ne sek mɨdebal okok kɨlop agñɨnek tek nɨbop ma agñɨnɨm tek lak. Mel. Binɨb tap lum awl yɨl gos nɨgɨlak okok akaŋ, binɨb ñapay ŋaŋ Klays nop gos nɨgɨlak tek okok, kɨlop agñɨnek tek nɨbop agñɨnek. 2-3 Jon 16.12, 1 Ko 1.10-11, 11.18, Gal 5.20-21, Hib 5.12-14, Jem 3.16, 1 Pi 2.2 Ñapay ŋaŋ tul ñɨŋeb tek ak mɨdebek, binɨb awl tap ñɨbal tek ma mɨdebek. Anɨb ak bin kɨli ñapay ŋaŋ tul ñɨbal tek nɨbop agñɨnek. Nɨbop God takaw ogɨnap agñɨnek, ogɨnap agñen ma nɨgɨnɨmɨb tek lak ak ma agñɨnek. Mɨdobun ñɨn awl abe, tap lum awl yɨl gos nɨgɨlɨg yɨbɨl mɨdebɨm tek, God takaw ogɨnap agñen nɨgɨnɨmɨb tek ma lup. Anɨb apin, nɨbi mam ay okok kɨlop nɨgem chɨbol nɨbop ak tɨmel gɨl, mɨlɨk yapek penpen agɨl mɨdebɨm. Pel anɨgɨpɨm ak yad nepin, tap lum awl yɨl gos nɨgɨlɨg yɨbɨl mɨdɨl, binɨb lum awl okok gɨpal tek gɨpɨm. 4 1 Ko 1.12 Bɨ nɨbi olap agup, Yad Pol bɨne mɨdebin agup. Pen bɨ nɨbi olap agup, Yad Apolos bɨne mɨdebin agup. Nɨbi anɨb apɨm ak yad nepin, nɨbi binɨb lum awl okok gɨpal tek gɨpɨm.

5 Pen nɨgtep gɨnɨmɨb. Apolos ne bɨ an? Yad Pol, yad bɨ an? Chɨl bɨ omɨŋal bɨ wog gɨñeb mɨdobul. Bɨawl ne chɨlop aglek, wog keke aglak tek gɨpul. Pen wog nop ak gɨñol nɨŋɨd, nop gos lɨnepɨm. 6 Apo 18.4-11, 18.24-28, 19.1, 1 Ko 1.30, 2 Ko 3.5, 10.14-15 Yad tap yɨŋ yɨmnek tek gɨnek, Apolos ne ñɨg mal dap tap yɨmnek anɨb ak sogak tek gak. God pen ne nokom gek tap jakup. 7 2 Ko 12.11, Gal 6.3 Anɨb ak bɨ tap yɨŋ yɨmub ayɨp, bɨ ñɨg sogup ayɨp, omɨŋal gɨl bɨ yokɨp yɨb awl ma mɨdebil. God gek tap jakup ak pen, ne ke nokom yɨb awl mɨdeb. 8 Lom 2.6, Gal 6.4-5, Lep 22.12 Binɨb tap yɨŋ yɨbal okok binɨb ñɨg sopal okok, wog nokom yɨbɨl gɨpal. Pen nokom nokom wog gɨpal tek nɨŋɨd, kɨlop nokom nokom tap tep pen ñɨnɨgab. 9 Mat 13.3-9, Apo 15.4, 2 Ko 6.1, Epe 2.20-22, Hib 3.3-4, 1 Pi 2.5 Chɨlmɨŋal God wog ak jɨmñɨl gɨlɨg mɨdobul. Nɨbi God wog day ne tek mɨdebɨm. Pen abe God kal ne tek mɨdebɨm.

10 Lom 15.20, 1 Ko 4.15, 15.10, 1 Pi 4.11, 2 Pi 3.15, Lep 21.14 God ne yɨp yɨmug nɨŋɨd gɨtep gek, bɨ kal gep gos teplep yɨbɨl mɨdeb tek mɨdebin. Anɨgɨl mɨdɨl, kal meg awl nab ayaŋ ak puŋɨlen, bɨ olap apɨl dayday mɨdeb okok kɨdek geb. Pen binɨb apɨl kal anɨb ak gɨnɨg, kɨli keke nɨgtep gɨl gɨnɨgel. 11 Ais 28.16, Mat 16.18, 2 Ko 11.4, Gal 1.7, 1 Pi 2.4-6 Nɨb nepɨm, God ne Jisas Klays nop dɨl, kal meg awl nab ayaŋ pɨsnep puŋɨlak. Nop pɨsnep puŋɨlek, binɨb olap tɨgju yokɨl, kɨdeyɨl olap puŋɨlɨnɨmuŋ tek ma lup.

12 Pen kal dayday yek gebal ak, binɨb ogɨnap tap gol dɨl gebal akaŋ, ogɨnap silpa dɨl gebal akaŋ, ogɨnap kab teplep yɨbɨl dɨl gebal akaŋ, ogɨnap mab dɨl gebal akaŋ, ogɨnap bopɨl dɨl gebal akaŋ, ogɨnap sɨd dɨl gebal. 13 Luk 2.35, 1 Ko 4.5, 2 Te 1.7-10, 1 Pi 1.7, 4.12 Pen kɨdek God kot awl gep ñɨn ak, binɨb mɨdupsek wog tɨtay gɨpal ak mɨseŋ lɨnɨgab. Ñɨn anɨb ak apɨl sup ñek wog gebal anɨb okok mɨdupsek yɨnek, keke bɨlok nɨgɨnɨgel, tep mɨdeb akaŋ mel. 14 Binɨb an kal day wog gek, ma yɨnɨl mɨdtep yenɨgab, God nop tap teplep pen ñɨnɨgab. 15 Pen binɨb an kal day wog gek, pɨsnep yɨn pag yowenɨgab, God nop tap teplep pen ma ñɨnɨgab. Bɨ anɨb ak, nop tɨmel gek kul ma gɨnɨgab ak pen, ne mab yɨneb nab ayaŋ yek adɨkɨd dɨpal tek yɨnɨgab.

16 1 Ko 6.19, 2 Ko 6.16, Epe 2.21-22, Hib 3.6, 1 Pi 2.5 Nɨbi God kal ne ak mɨdebɨm, Kawnan ne ak nɨbop mɨgan ayaŋ mɨdeb. Tap anɨb ak ma nepɨm akaŋ? 17 God kal ne ak, ne aglek kal suŋtep ne ke mɨdeb. Pen nɨbi kal ne anɨb ak mɨdebɨm. Anɨb ak bɨ an God kal ne ak gɨ tɨmel genɨgab, nop pen abe gɨ tɨmel gɨnɨgab.

18 Snd 3.7, Ais 5.21 Nɨbi ke takaw yepɨs agɨnɨmɨb tek lup anɨb ak, nɨgtep gɨnɨmɨb. Bɨ nɨbi olap, ne gos tep lum awl ak nɨŋɨd, bɨ gos nɨgep mɨdebin agɨl gos nɨgup nɨm, ne ned bɨ sawl sek tek yonɨmuŋ. Anɨgenɨgab, kɨdek ne bɨ gos nɨgep ak yenɨgab. 19 Jop 5.13, 1 Ko 1.20, 2.6 Chɨn nopun, binɨb lum awl gos teplep tek agɨl nepal okok, God nɨgek binɨb gos sawl sek lɨpal. Buk Baybol ak tɨkɨl anɨb agak, Bɨ ogɨnap chɨn bɨ gos nɨgep mɨdobun ak, gos chɨn ak ke nɨŋɨd binɨb kɨlop yepɨs agɨnɨgabun agɨl gos nepal agɨl tɨkak. Anɨgɨl gos nepal ak pen, God ne gos kɨlop gek, gon tek kɨlop dɨnɨgab agɨl tɨkak. 20 Sng 94.11 Pen takaw olap sek tɨkɨl agak, Bɨ gos nɨgep okok, Bɨawl ak ne gos kɨli ak nɨgup agɨl tɨkak. Pen anɨgɨl nɨgup, gos kɨli gɨnɨgun agɨl gos nepal ak, jɨj olap ma mɨdeb yokɨp yɨbɨl yenɨgab agɨl tɨkak. 21 1 Ko 1.12, 3.4-6, 2 Ko 4.5, 4.15 Anɨb ak nɨbi binɨb ogɨnap kɨlop, binɨb awl mɨdebal agɨl yɨb kɨlop dad ma aplanɨmɨb. Yad nepin, tap okok mɨdupsek tap nɨbi. 22 Pol akaŋ, Apolos akaŋ, Pita akaŋ, lum awl akaŋ, pel mɨdep akaŋ, kumeb akaŋ, tap okok mɨñɨl mɨdeb akaŋ, kɨdek yenɨgab ak, tap okok mɨdupsek tap nɨbi. 23 Lom 14.8, 1 Ko 11.3, 2 Ko 10.7, Gal 3.29 Pen nɨbi Klays binɨb ne mɨdebɨm, Klays ne God bɨne mɨdeb.