3
Jisas ne Nikodemus nop agñɨtep gak
1 Jon 7.50, 19.39 Bɨ olap mɨdolɨgup, yɨb ne Nikodemus. Ne bɨ Pelisi olap, Juda bɨawl takaw tɨg asɨkep okok olap yek. 2 Mat 22.16, Jon 9.16, 9.33, Apo 2.22, 10.38 Ne maynab ayaŋ amɨl, Jisas nop nɨŋɨd anɨb agak, Tisa, chɨn nopun, tap mageptek gɨpan okok nak ke ma gɨpɨnap agak. God nokom nep agyokek apɨl nɨm, tap mageptek anɨb okok gɨlɨg, chɨnop takaw agñɨlɨg gɨpan agak.
3 Mat 18.3, Gal 6.15, Tat 3.5, Jem 1.18, 1 Pi 1.23, 1 Jo 3.9 Agek Jisas pen agak, Yad nep nɨŋɨd yɨbɨl agebin, binɨb an ke kɨdeyɨl ma lenɨgab, God binɨb dɨl kɨlop kod yenɨgab mɨgan ak ma amnɨgab agak. 4 Anɨb agek Nikodemus agak, Tɨtay dɨl binɨb tɨk lel awl gɨpal okok, tepayaŋ binɨb ke kɨdeyɨl lɨnɨgabal agak. Nonɨm kogmeg nab okok tepayaŋ amel, tepayaŋ tɨkɨnɨgel akaŋ agak?
5 Ese 36.25-27, Mak 16.16, Apo 2.38, Tat 3.5 Agek Jisas pen agak, Nep nɨŋɨd yɨbɨl agebin, binɨb an ñɨg ak sek God Kawnan ak sek nop gek ke kɨdeyɨl ma lenɨgab, God binɨb dɨl kɨlop kod yenɨgab mɨgan ak ma amnɨgab agak. 6 Sng 51.5, Jon 1.13 Binɨb ñapay tɨkɨpal tek tɨkel mɨdebal ak pen, God Kawnan ne ak gek, binɨb kawnan kɨli okok ke kɨdeyɨl mɨdebal agak. 7 Anɨb ak takaw nep apin, Nɨbi ke kɨdeyɨl lɨnɨmɨb apin ak, nɨŋɨd gos pal yɨbɨl ma lɨnɨmɨn agak. 8 Sav 11.5, 1 Ko 2.11 Yɨgen ak ne ke apɨl okok okok amub agak. Amɨl, dek pugak nep nepɨm ak pen, owup okok sek amub okok sek ma nepɨm agak. Anɨb ak tek nɨm, God Kawnan ne ak bɨ anop gek, ke kɨdeyɨl lɨnɨgab agak.
9 Anɨb agek Nikodemus pen agak, Nad ageban anɨb ak, taydɨl gɨnɨmuŋ tek lɨnɨgab agak? 10 Agek Jisas pen agak, Tɨtay dɨnɨgab agak? Nad Yislel binɨb tisa awl kɨli olap pen, tap anɨb okok ma nepan agak? 11 Mat 11.27, Jon 3.32, 7.16, 8.26 Nep nɨŋɨd yɨbɨl agebin agak. Chɨn tap tay nɨgtep gɨpun ak apun agak. Pen tap tay wɨdɨn ke nopun ak agñɨbun agak. Nɨbi pen takaw chɨn agñɨbun ak ma dɨpɨm agak. 12 Luk 22.67 Yad nɨbop tap lum awl yɨl gup tek agen gos ma nepɨm ak, God man ne alaŋ gup tek agen taydɨl gos nɨgɨnɨgabɨm agak? 13 Snd 30.4, Jon 3.6, 6.33, 6.38, Apo 2.34, Lom 10.6, 1 Ko 15.47, Epe 4.9-10 Pen binɨb olap God man ne alaŋ ma aj nepal agak. Bɨ Olap Ñɨne, ne nokom God man ne alaŋ nɨb mɨdɨl lum awl owak agak. 14 Nam 21.9, Jon 8.28, 12.32 Pen bɨlel Mosis man nep binɨb ma yelak nab okok mɨdɨl, ne tap yoy tek olap dap alaŋ lak agak. Lek, binɨb tap yoy tek anɨb ak nɨgɨlak okok, kɨlop suŋ lak agak. Anɨb ak tek nep, Bɨ Olap Ñɨne nop dap alaŋ lɨnɨgel agak.*Bɨlel ñɨn olap, God ne gek yoy tɨmel okok apɨl Yislel binɨb okok kɨlop suwel kumɨlak. Kumɨlaknɨŋ, Mosis tap yoy tek olap gɨlɨl, mab bak alaŋ yɨlek, binɨb tap yoy tek anɨb ak nɨgɨlak okok, kɨlop suŋ lak. Nɨbi buk Namba 21.6-9 nɨgɨnɨmɨb. 15 Jon 3.36, 6.47, 20.31 Anɨgɨl dɨlel, binɨb mɨdupsek nop gos lɨnɨgɨnɨgabal okok, pel pelnep yenɨgel agak.
16 Jon 3.36, 10.28, Lom 5.8, 8.32, 1 Jo 4.9-10 God binɨb lum awl mɨdupsek kɨlop mapen lak anɨb ak tek, Ñɨne nokom ak kɨlop nen agɨl ñak agak. Ak nɨm, binɨb mɨdupsek nop gos lɨnɨgɨnɨgabal okok, pɨsnep ma kul gɨnɨgel, pel pelnep yenɨgel agak. 17 Luk 19.10, Jon 5.22, 5.45, 12.47, Apo 17.31, 1 Jo 4.14 Anɨb ak nɨm, God Ñɨne nop agyokak anɨb ak, binɨb lum awl okok kɨlop tɨg asɨkɨl bɨlokɨnɨmuŋ agɨl ma yokak agak. Kɨlop tɨg asɨk dɨnɨmuŋ agɨl yokak agak. 18 Jon 3.36, 5.24, 6.40, 6.47, 20.31 Binɨb an Ñɨne nop gos lɨnɨgup ak, nop ma tɨg asɨk bɨlokeb agak. Pen binɨb an nop gos ma lɨnɨgup ak, nop tɨg asɨk bɨlokup agak. God Ñɨne nokom nop gos ma lɨnɨgup anɨb ak tek, nop tɨg asɨk bɨlokup agak. 19 Jon 1.4-5, 1.8-12, 8.12 Takaw awl yɨbɨl dɨpal jɨj anɨb ak, anɨgɨl mɨdeb agak. God mɨlek ne ak lum awl owup ak pen, binɨb okok mɨlek anɨb ak nɨgel kɨlop tep ma gup agak. Kɨli gɨ tɨmel gɨl mɨdebal tek, kɨsɨlɨm owup okok nep nɨgel tep gup agak. 20 Jop 24.13-17, Epe 5.11-13 Binɨb gɨ tɨmel gɨl mɨdebal okok, kɨli mɨlek ak nɨgel tep ma gup agak. Gɨ tɨmel gɨpun ak mɨseŋ lenɨgab agɨl, mɨlek ak yɨl ma opal agak. 21 Pen binɨb an takaw nɨŋɨd yɨbɨl ak kɨdek gɨpal ak, mɨlek ak yɨl opal agak. God kɨles ñek wog gobun ak, mɨseŋ nɨgep tek laŋ agɨl, mɨlek ak yɨl opal agak.
Jon Bɨ Ñɨg Pakñeb ak, ne Jisas bɨ tay tek takaw ak agñak
22 Jon 4.1-2 Tap anɨb okok kɨdek won ak, Jisas bɨne okok ayɨp amnɨlak, Judiya plopens nab okok. Am mɨdɨl, binɨb okok kɨlop ñɨg pakñolɨgup. 23 Pen Jon abe binɨb okok kɨlop ñɨg pakñolɨgup. Ne man sɨkol Aynon yep man sɨkol Salim ñɨg kuŋay yek sɨŋak mɨdɨl, binɨb okok apelak kɨlop ñɨg pakñolɨgup. 24 Mat 4.12, 14.3, Mak 6.17, Luk 3.19-20 Ñɨn nab anɨb sɨŋak Jon anɨgolɨgup. Kɨdek nɨm Helod Jon nop dɨl nag lak.
25 Pen bɨ Juda olap apɨl, Jon bɨne ogɨnap ayɨp penpen agɨlak. Juda binɨb okok kɨli chɨn ñɨg lɨ yokɨl, God nɨgek suŋtep yonɨgun agɨl, takaw anɨb ak agɨlak. 26 Jon 1.26-34 Penpen agɨl, Jon bɨne okok apɨl nop agɨlak, Tisa, ned bɨ ak nad ayɨp ñɨg Jodan gol kɨd adaŋ yek, takaw nop ak agñenak ak, mɨñɨl ne apɨl ñɨg pakñaknɨŋ, binɨb mɨdupsek nop yɨl apebal agɨlak.
27 Jon 19.11, 1 Ko 4.7, Hib 5.4, Jem 1.17 Agelak Jon pen agak, God ne man ne alaŋ mɨdeb ak, ne tap tay bɨ olap nop ma ñenɨgab ak, bɨ anɨb ak tap ak ma dɨnɨgab agak. 28 Mal 3.1, Mat 11.10, Mak 1.2, Luk 1.17, Jon 1.20, 1.23, 1.27 Nɨbi ke takaw yad ak nepɨm agak. Ned nɨbop agɨnek, Yad Bɨ God nop aglup ak, binɨb okok kɨlop dɨl kod yenɨgab ak mel agɨnek agak. God yɨp agyokek yad ned opin agɨnek agak. 29 Mat 9.15 Bɨ olap bin olap dup ak, bin anɨb ak bin ne mɨdeb agak. Pen bɨ anɨb ak bogɨlak ne ak, jak mɨdɨl takaw nop nɨŋɨd, bin ne ak pɨsnep dup agɨl mɨñmɨñ yɨbɨl gup agak. Yad nɨm anɨb ak tek, mɨñmɨñ yɨbɨl gɨl, yɨp tep gup agak. 30 Yɨb nop awl gɨl adek amnɨmuŋ, yɨb yɨp sɨkol gɨl ayaŋ amnɨmuŋ agak.
31 Mat 28.18, Jon 8.23, Lom 9.5, 1 Ko 15.47, Epe 1.21, Plp 2.9, 1 Jo 4.5-6 Bɨ adek alaŋ nɨb owup ak, tap okok mɨdupsek muk ne okok mɨdeb agak. Bɨ lum awl nɨb ak, binɨb lum awl gɨpal tek ne abe gup, binɨb takaw kɨli ak apal tek ne abe agup agak. Pen bɨ God man ne alaŋ nɨb owup ak, tap okok mɨdupsek muk ne okok mɨdeb agak. 32 Jon 3.11, 8.26, 15.15 Ne tap tay wɨdɨn nɨŋɨd, takaw ak nɨŋɨd dup ak, anɨb ak agñub agak. Ak agñub pen, takaw nop ak ma dɨpal agak. 33 Lom 3.4, 1 Jo 5.10 Pen binɨb an takaw nop dup ak, dup anɨb ak tek binɨb okok kɨlop yomub, God ne takaw nɨŋɨd yɨbɨl agup agak. 34 Ais 42.1, Jon 1.16, 7.16 God bɨ anɨb ak nop agyokek owak ak, God ne Kawnan ne ak yokek apɨl ayɨp nep mɨdeb agak. Ak nɨm takaw agñub ak, God takaw nep ak agñub agak. 35 Mat 11.27, Luk 10.22, Jon 5.20, 10.17, Hib 2.8 Nap Ñɨne nop mapen lɨl, tap okok mɨdupsek kod yonɨmuŋ agɨl, dɨ ñɨn adek nop ak lup agak. 36 Luk 3.7, Jon 1.12, 3.16-18, 6.47, Lom 1.17, 1 Jo 5.10-12 Binɨb an Ñɨne nop gos lɨnɨgup ak, pel pelnep yenɨgab ak pen, binɨb an Ñɨne nop ma dɨl kelɨgɨnɨgab ak, pel pelnep ma yenɨgab agak. God nop tɨmel nɨŋɨd yul awl ñek mɨŋel dɨlɨg nep yenɨgab agak.
3:1 Jon 7.50, 19.39
3:2 Mat 22.16, Jon 9.16, 9.33, Apo 2.22, 10.38
3:3 Mat 18.3, Gal 6.15, Tat 3.5, Jem 1.18, 1 Pi 1.23, 1 Jo 3.9
3:5 Ese 36.25-27, Mak 16.16, Apo 2.38, Tat 3.5
3:6 Sng 51.5, Jon 1.13
3:8 Sav 11.5, 1 Ko 2.11
3:11 Mat 11.27, Jon 3.32, 7.16, 8.26
3:12 Luk 22.67
3:13 Snd 30.4, Jon 3.6, 6.33, 6.38, Apo 2.34, Lom 10.6, 1 Ko 15.47, Epe 4.9-10
3:14 Nam 21.9, Jon 8.28, 12.32
*3:14 Bɨlel ñɨn olap, God ne gek yoy tɨmel okok apɨl Yislel binɨb okok kɨlop suwel kumɨlak. Kumɨlaknɨŋ, Mosis tap yoy tek olap gɨlɨl, mab bak alaŋ yɨlek, binɨb tap yoy tek anɨb ak nɨgɨlak okok, kɨlop suŋ lak. Nɨbi buk Namba 21.6-9 nɨgɨnɨmɨb.
3:15 Jon 3.36, 6.47, 20.31
3:16 Jon 3.36, 10.28, Lom 5.8, 8.32, 1 Jo 4.9-10
3:17 Luk 19.10, Jon 5.22, 5.45, 12.47, Apo 17.31, 1 Jo 4.14
3:18 Jon 3.36, 5.24, 6.40, 6.47, 20.31
3:19 Jon 1.4-5, 1.8-12, 8.12
3:20 Jop 24.13-17, Epe 5.11-13
3:22 Jon 4.1-2
3:24 Mat 4.12, 14.3, Mak 6.17, Luk 3.19-20
3:26 Jon 1.26-34
3:27 Jon 19.11, 1 Ko 4.7, Hib 5.4, Jem 1.17
3:28 Mal 3.1, Mat 11.10, Mak 1.2, Luk 1.17, Jon 1.20, 1.23, 1.27
3:29 Mat 9.15
3:31 Mat 28.18, Jon 8.23, Lom 9.5, 1 Ko 15.47, Epe 1.21, Plp 2.9, 1 Jo 4.5-6
3:32 Jon 3.11, 8.26, 15.15
3:33 Lom 3.4, 1 Jo 5.10
3:34 Ais 42.1, Jon 1.16, 7.16
3:35 Mat 11.27, Luk 10.22, Jon 5.20, 10.17, Hib 2.8
3:36 Luk 3.7, Jon 1.12, 3.16-18, 6.47, Lom 1.17, 1 Jo 5.10-12