10
Yislel binɨb kɨli God ne pel gup ak ma nepal
1 Mam ay sɨkop, gos yad nab ayaŋ nepin ak anɨgɨl mɨdeb, God ne Yislel binɨb kɨlop tɨg asɨk dɨnɨmuŋ. Pen yad God nop anɨgɨl pel agnepin. 2 Apo 21.20, 22.3, Gal 1.14, 4.17 Yad kɨlop nɨgtep gɨl anɨb apin, Kɨli God nop dɨtep gun agɨl, kɨles yɨbɨl gɨpal apin. Kɨli pen tap tɨtay gon God nop tep gɨnɨgab agɨl, gos nɨgtep ma gɨpal. 3 Lom 1.17, 9.30-32, Plp 3.9 God binɨb kɨlop gek, kɨli binɨb suŋtep ne yenɨgabal ak, anɨb ak kɨli gos ma nepal. Kɨli pen gos chɨn ke kɨdek gɨl, God binɨb suŋtep ne yonɨgun agɨl, gos anɨb ak nepal. Anɨb ak kɨli God gos ne ak kɨdek gɨl muk okok ma mɨdel, ne kɨlop gek binɨb suŋtep ne yenɨgel tek ma lup. 4 Mat 5.17, Jon 3.18, Gal 3.24 Chɨn nopun, Klays ne takaw Mosis ñu kɨl tɨkak ak gek, takaw anɨb ak gɨjuwak. Anɨb ak, binɨb Klays nop gos lɨnepal okok mɨdupsek, kɨli God binɨb suŋtep ne mɨdebal.
5 Wkp 18.5, Neh 9.29, Ese 20.11-13, Lom 7.10, Gal 3.12 Binɨb ogɨnap kɨli chɨn takaw Mosis ñu kɨl tɨkak ak kɨdek gun agɨl gos nepal. Anɨgon, God binɨb suŋtep ne yonɨgabun agɨl gos nepal. Binɨb anɨb okok, Mosis kɨli anɨgɨpal ak gos nɨŋɨd tɨkɨl agak, Bɨ God takaw ak mɨdupsek dɨl kɨdek gɨnɨgab ak, ne koŋɨm mɨdɨl pel yenɨgab agɨl tɨkak. 6 Lo 30.12-14 Binɨb ogɨnap pen kɨli Klays nop gos lɨnɨgel God kɨlop gek, binɨb suŋtep ne mɨdebal. Buk Baybol ak kɨlop anɨb okok gos nɨŋɨd tɨkɨl agak, Nad gos nad nab ayaŋ mɨdeb ak, takaw anɨb ak ma agnɨŋɨd agɨnɨmɨn, Anil God man ne alaŋ amnɨgab agɨnɨmɨn agɨl tɨkak. Takaw anɨb ak jɨj ak anɨgɨl mɨdeb, an yɨl God man ne alaŋ amɨl, adɨkɨd Klays nop poŋɨd ownɨgab? 7 Pen abe tɨkɨl agak, Takaw nɨm ak, Anil kaw mɨgan kɨluŋ ma tɨkak ak amnɨgab ak, abe ma agɨnɨmɨn agɨl tɨkak. Takaw anɨb ak jɨj ak anɨgɨl mɨdeb, an yɨl kaw mɨgan kɨluŋ ma tɨkak binɨb kubal tep ak amɨl, adɨkɨd Klays nop poŋɨd ownɨgab? 8 Takaw kɨl tɨkak anɨb ak pen anɨb agak, God takaw ne ak nad mɨdeban wulep sɨŋak mɨdeb agɨl tɨkak. Meg mɨgan nad pel ak ke mɨdɨl, gos nad nab ayaŋ mɨdeb agɨl tɨkak. Takaw agak anɨb ak nɨm, chɨn Klays nop gos lɨnɨgep takaw ak pel agñɨbun. 9 Mat 10.32, Luk 12.8, Apo 8.37 Pen takaw anɨb ak anɨgɨl mɨdeb. Nad agyɨkɨl anɨb agɨnɨmɨn, Jisas ne Bɨawl mɨdeb agenɨmɨn, pen God ne Jisas nop gek tepayaŋ tɨkjakak agɨl, anɨb ak gos nad nab ayaŋ gos lɨnɨgenɨmɨn, God nep tɨg asɨk dɨnɨgab. 10 Chɨn nopun, gos chɨn nab ayaŋ Klays nop gos lɨnɨgon, God chɨnop gek binɨb suŋtep ne mɨdobun. Pen Jisas ne Bɨawl mɨdeb ak nop gos lɨnopun agyɨkɨl agon, God chɨnop tɨg asɨk dup. 11 Ais 28.16, Jer 17.7, Lom 9.33 Buk Baybol ak tɨkɨl anɨb agak, Binɨb Klays nop gos lɨnepal okok mɨdupsek, kɨli nebeŋ ma dɨnɨgabal agɨl tɨkak. 12 Apo 10.36, 15.9, Lom 3.22, 3.29, Gal 3.28 Nɨgɨm. God ne Juda binɨb kɨli pɨs olap mɨdebal, binɨb Juda mel pɨs olap mɨdebal agɨl gos ma nɨgup. Kɨli mɨdupsek Bɨawl nokom mɨdeb, kɨli mɨdupsek nop suk agɨl agnepal okok, kɨlop dɨtep yɨbɨl gup. 13 Jol 2.32, Apo 2.21, 9.14 Adek anɨb ak nep buk Baybol ak tɨkɨl agak, Binɨb Bɨawl nop suk agɨl agnɨgɨnɨgel okok mɨdupsek, ne kɨlop tɨg asɨk dɨnɨgab agɨl tɨkak.
14 Anɨb ak binɨb kɨli Klays nop gos ma lɨnepal ak, tɨtay dɨl nop suk agɨl, chɨnop tɨg asɨk dɨnɨmɨn agnɨgɨnɨgel? Pen ne gak takaw ak tɨmud pak ma nepal ak, tɨtay dɨl nop gos lɨnɨgɨnɨgel? Pen bɨ olap takaw teplep ak kɨlop ma agñub ak, tɨtay dɨl takaw anɨb ak tɨmud pak nɨgɨnɨgel? 15 Ais 52.7, Nah 1.15 Pen bɨ takaw teplep agñeb ogɨnap kɨlop ma agyokɨpal ak, tɨtay dɨl takaw teplep ak agñɨnɨgel? Takaw anɨb ak tek buk Baybol ak tɨkɨl agak,
Bɨ takaw teplep dad apebal okok, tep yɨbɨl dad apebal agɨl tɨkak.
Yislel binɨb okok, kɨli takaw teplep ak ma dɨpal
16 Ais 53.1, Jon 12.38, Hib 4.2 Binɨb ogɨnap pen takaw teplep ak ma nɨg dɨlak. Anɨb ak tek Aysaya ne anɨb agak, Bɨawl, takaw tep agñobun ak, an nɨŋɨd gos lɨnɨgɨlak agak? 17 Jon 17.20 Anɨb ak chɨn nopun, binɨb takaw teplep ak tɨmud pak nɨg mɨdɨl nep, Klays nop gos lɨnepal. Pen Klays takaw teplep ak agñel nep, binɨb tɨmud pak nɨg mɨdebal.
18 Sng 19.4, Mat 24.14, Mak 16.15, Kol 1.6, 1.23 Yad pen nɨbop agnɨgebin, kɨli takaw teplep anɨb ak nɨgɨlak akaŋ? Yaw, kɨli nɨgɨlak agebin. Buk Baybol ak tɨkɨl anɨb agak,
Bɨ takaw agñeb okok, takaw kɨli anɨb ak lum awl ak mɨdupsek amɨl, man okok kɨd kɨd mɨdupsek yɨbɨl amek nɨgɨlak agɨl tɨkak.
19 Lo 32.21, Lom 11.11, Tat 3.3 Pen nɨbop tepayaŋ agnɨgebin, Yislel binɨb takaw anɨb ak nɨgtep gɨlak akaŋ? Yaw, kɨli nɨgɨlak agebin. Ned Mosis ne takaw God agak ak tɨkɨl agak,
Yad binɨb wakay olap ke nɨb, yɨb ma mɨdek yokɨp tek mɨdebal okok kɨlop dɨnɨgayn agɨl tɨkak. Kɨlop den, nɨbop chɨbol tɨmel gek mɨlɨk nɨgɨnɨgabɨm agɨl tɨkak. Binɨb anɨb okok sawl sek mɨdɨl gos nɨgtep ma gɨpal ak kɨlop dɨnɨgayn agɨl tɨkak. Kɨlop den, nɨbop gek mɨlɨk yownɨgab agɨl tɨkak.
20 Ais 65.1, Lom 9.30 Pen Aysaya abe takaw God agak ak tɨkɨl kɨles gɨl agak,
Binɨb yɨp ma pɨyowɨlak okok, yɨp nɨgɨlak agɨl tɨkak. Binɨb yɨp akal ma agnɨgɨlak okok, yad ke mɨseŋ len yɨp nɨgɨlak agɨl tɨkak.
21 Ais 65.2 Pen Yislel binɨb kɨlop gos nɨŋɨd, takaw olap God agak ak tɨkɨl agak,
Yad mɨnek mɨnek kɨlop dɨnɨg, kɨli adɨkɨd yɨp yɨl apel kɨlop dɨtep gɨl ayɨp yenɨgayn agɨl tɨkak. Kɨli pen takaw yad ak ma nɨg dɨl, yɨp kud ñɨl takaw tɨbɨlɨkɨlak agɨl tɨkak.
10:2 Apo 21.20, 22.3, Gal 1.14, 4.17
10:3 Lom 1.17, 9.30-32, Plp 3.9
10:4 Mat 5.17, Jon 3.18, Gal 3.24
10:5 Wkp 18.5, Neh 9.29, Ese 20.11-13, Lom 7.10, Gal 3.12
10:6 Lo 30.12-14
10:9 Mat 10.32, Luk 12.8, Apo 8.37
10:11 Ais 28.16, Jer 17.7, Lom 9.33
10:12 Apo 10.36, 15.9, Lom 3.22, 3.29, Gal 3.28
10:13 Jol 2.32, Apo 2.21, 9.14
10:15 Ais 52.7, Nah 1.15
10:16 Ais 53.1, Jon 12.38, Hib 4.2
10:17 Jon 17.20
10:18 Sng 19.4, Mat 24.14, Mak 16.15, Kol 1.6, 1.23
10:19 Lo 32.21, Lom 11.11, Tat 3.3
10:20 Ais 65.1, Lom 9.30
10:21 Ais 65.2