5
Mi pakapaka rorou vivvil ma Mi Natu Sipsip
1 Samo, o nga dengarie mi pakapaka rorou vivvil simi riman suv eie ese ta nga mogos simi mogomogos ni vuor. Ma mi vinavataor a nga mon siba bienengeiv kokouk ma gi nga buliet vangvangasie ngan mi napaririem potsu luo bu poko buliebuliet. 2 Ma o nga dengarie mi angelo ngeisngeis ta nga vakokoit katsep ngan mi ien leong nge pevien, “Ese a kalei oit nia tsang rivie sien ine bu poko buliebuliet nge vueie ine mi pakapaka rorou vivvil?” 3 Eiekesen kap ka mei simi rangit ma simi kaber o, i mendien mi kaber, a nga oit nia tsitsingie ian mi pakapaka rorou vivvil nge dedeng i aron. 4 O nga ta masitinoiv beitsak simi vunan gi kap nga vorotan ka mei va a nga kalei oit nia tsitsingie ine mi pakapaka rorou vivvil nge dedeng i aron. 5 Samo mi mei kes sibu komosi ka ni tsientsang a nga oeng seou, “Kian va e ta ta! Pare, mi Laion simi matabu Iuda, mi Buon e Davit, a te tseiptseiprio. Eie a oit nia tsang rivie ian bu poko buliebuliet mi napaririem pouts luo nge vueie ine mi pakapaka rorou vivvil.”
6 Samo o nga dengarie mi Natu Sipsip ian ta nga mat malan va gi te nga muna kenvamate. Eie a nga tuir i kotubuon mi mogomogos ni vuor meie ba vinagoso voveit ian ta tino ma bu komosi ka ni tsientsang. Ine mi Natu Sipsip a nga suvuon bu koum mi napaririem potsu luo ma bu katsomat mi napaririem potsu luo. Ine bu katsomat, arie egie mi napaririem potsu luo bu Moromoruo se Raban ian e Raban ta nga turan rakot sibu korot kokouk simi kaber. 7 Ine mi Natu Sipsip a nga nemei nge por tsana ian mi pakapaka rorou vivvil simi riman suv eie ese ta nga mogos simi mogomogos ni vuor. 8 Ma sien tate nga poro ine mi pakapaka rorou vivvil, ba vinagoso voveit ian ta tino meie bu komosi ka ni tsientsang ba sinangavur luo ma voveit gi nga sege pukupukukaek i matan ian mi Natu Sipsip. Bu mei keskes segie gi nga suvuon bu aapMi aap eie kegi kepineits nia togo bu Iuda malan mi napa ei taongtaong ma bu koi gi ta tsana ngan mi gold ian ta nga vous ngan mi buliebuliet saien sosong, arie kegi sar nono mi kuoluon e Raban. 9 Ma gi nga kavarie mi pak vour,
“Evoi e kalei oit nia poro ine mi pakapaka rorou vivvil
ma nia tsang rivie ian bu buliebuliet sien,
simi vunan gi nga kenvamate no,
ma ngan mi dara e nga voir tsana mi kulou va ken e Raban
kuvu sibu matabu kokouk ma bu vuna nama kokouk ma bu suasuada kulou kokouk ma bu vuna enamon kokouk.
10 E te nga tsana gie va egie mi kuoluon ken mangmagoso Nguts magiet Raban ma e te nga tsana gie va egie bu prist nia tsatsang sien.
Ma gi ta vuor i popon mi kaber.”
11 Samo o nga dengarie nge rongomie mi inan bu angelo gi ta nga viririsie mi mogomogos ni vuor ma ba vinagoso ian ta tino ma bu komosi ka ni tsientsang. Mi aesaes segie a palan beitsak a kap ka mei a oit nia ase. 12 Ngan mi ien leong gi nga pevien,
“Ine mi Natu Sipsip gi ta nga kenvamate eie a kalei oit.
Eie a kalei oit nia suvuon mi ngeisngeis ni vuor, bu sinsuv, bu banga vienviendon, mi ngeisngeis,
ma mi minangarei, mi matvinavaso ma mi tietienengei!”
13 Samo o nga rongomie bu vinagoso kokouk simi rangit ma simi kaber ma i mendien mi kaber ma i popon mi barateis ma bu kepineits kokouk i aron, gi nga kaveir,
“Rakot seie ese ta mogos simi mogomogos ni vuor ma rakot simi Natu Sipsip
mi tietienengei ma mi minangarei ma mi matvinavaso ma mi ngeisngeis,
ta mon rovoriu sibu ra bu ra!”
14 Ian ba vinagoso voveit ian ta tino, gituo nga pevien, “Amen” ma bu komosi ka ni tsientsang gi nga sege pukupukukaek nge rengeir.