3
1 Romeni avuhainaa vaiinti Taiberiusiva raqikiqi viharoma 15 ihi vara kovaro vi entara Pontiusi Pairaatava kamaanira avuhainaa vaiintivano vaiharo Iutia vataqaa raqiki vauvaro Herotiva Kariri vataqaa raqiki vauvaro Herotira qatavano Piripiva, Ituria vataqaavata Tarakonitisi vataqaavata raqiki vauvaro Lisaniasiva Abilene vataqaa raqiki vaura.
2 Mintumanta Anaasivavata Kaiapaasivavata vitanta noraiqamavi Kotira kaiqa vara amite vau vaiintikaqaa raqiki vaura. Vi entarama Sekaraiaara maaquvano Ioniva qumina vataini kia vaiintivano vaunaini vauvaro Kotiva virara ti uva vaiinti nahenti tiva nimiane tuvaro 3 Kotiva tuntema kero, Ioniva Iotani Namarivano tuvunaini vi aniharo vakaaka vaiinti nahenti tiva nimiro tiharo, Qora aaraqaa nira qaqirake namari varaivaro Kotiva ne qora kaiqa vare vai uvara nunka nimitaarire, tiro. Ioniva minti ti vaura.
4 Haaru qumina vaka paropeti vaiinti Aisaiaava mintima tiro:
Vaiinti vovano qumina vataini vaiharo naveraitiro tiharo,
Noravano aniaina aarara qerama amiteha vira aara avuqavuqama amitaivaro viva vivauma ho aniarire.
5 Ne uqitaiqiraqi vata ntava mpiqake, nora aiqinave, inaara aiqinave, ne vira teqa kaivaro aara avuqavu variarire.
Aara rare raarera inara teqa kaivaro avuqavuma viro variarire. Aara otiqetero ururero inara ehauruma/humuqu kaivaro vohaa avuqavuqai variarire.
6 Ekaa naato vataini variaka Kotiva vaiinti nahenti kuvantu nimitero ntitaaina okarara tavevarave, tura. (Aisaiaa 40:3-5)
Aisaiaava haaru qumina vaka vi uvara tiva tovaro, Ioniva anirero vohaa qaramakero vi uvara tura.
7 Ioniva minti ti vaumanta vaiinti nahenti airivano Ionira vira namari varareka viva unaini anirovaro Ioniva vika tiva nimiro tiharo, Ne uqahi/quaiha vaintairama variavo. Kotira arara ite vaivaro vaiinti nahenti ntaihareva auti vaivo. Tavave ninavuvata aruantorave aiqu autute kantama vuate timantae ne maini te unanaini aniavo? 8 Ne quqaiqamake qora kaiqa qaqira kareka autivera, koqe kaiqaqai varaqi vuate. Ne nenta tiha, Eparahaamiva tinavu kaivaqavave, tinavu qovave, vairara ti, tenavu ho vauro, tivorave. Kotiva mintiataa irera, viva homa ni qaqira kero maa orinavuraqihairo Eparahaamira naintivara vara qovaraiqama kaanarove.
9 Kotiva katari tuqireva rori katari tuqaqima qeramakero vataivo. Kia koqe tava irainara viva teqaaqama kero ihaqi aqu kairaro ita vuanarove, tiro.
10 Ioniva minti tumanta mini ruvaaqumavi vauka vira ireha tiha, Ike, vi uvara are tianara tenavu iriha nantie irarave? 11 Tuvaro viva vika tiva nimiro tiharo, Vaiinti vovano sioti taaraqanta vatairava kia vatainaravata vonku amiarire. Vaiinti vovano kara vatairava kia vatainaravata rairakera amiane, tiro.
12 Minti tumanta takisi vare vau vaiintika namari varareka anuka vira ireha tiha, Maara ti variara vaiintio, tenavu vo, nantie irarave? 13 tuvaro Ioniva vika tiva nimiro tiharo, Ne takisi varehama kamaanira uva irihama avuqavuqamake takisi varaate. Kia nenta irike qumina voqavata varaate, tiro.
14 Ioniva minti tumanta iqoka vaiintinavu vira ireha tiha, Tenavu vo, nantie irarave? tuvaro Ioniva vika tiva nimiro tiharo, Kia oru vorara ari ruqutu kaarorave tiha monu timiane tiate. Kia qumina voraqaa uva ntuvake vataate. Ne aami kaiqa varehama nenta vare monura viraraqaima hove tiate, tiro.
15 Ioniva minti ti vaumanta vaiinti nahenti mini ruvaaqumavi vauka Kotiva atitaaina vaiintira, Mesaiaara vira vekaiqiha vaukara ti, vika nai ireha nai ireha tiha, Maa vaiintivae Mesaiavano vaivo? ti.
16 Vika minti ti vauvaro Ioniva iriro vika nái tiva nimiro tiharo, Te qumina namariqai ni nimi vauro. Noravano ti aataraariravama ti naantiara ani vaivo. Te qumina vaiintivano vaihara ti, te vira aiqu nonkutai naaquntara kia ho qantu amitararave. Ne namari varaantema kero, viva Kotira Maraqura ni nimiharo, nai iha itaainara voqaara viravata ni nimianarove.
17 Viva nai havore kauquqi tota varero uiti raisi voqaara riruruma/ritatima kero, nora nai havoreqohairo vaqita varero vuru nai naavuqi vatero viraqaahairo qumina rapavata vaqita varero vuru kia qimpa vuaina iharaqi aqu kairaro ita vuanarove, tiro.
18 Minti tivakero vaiinti nahenti vira uva iriate tiro, Ioniva vi uvaravata vo uva vo uvavata, vika tiva nimiharo Ihuva aniaina vakaakara koqe vakaakavata, vika tiva nimura.
Herotiva Ionira karapuhiqama kora
19 Herotiva Kariri vataqaa raqiki vauvaro Ioniva Herotira atiharo tiharo, Herotiva kia nai qata naata Heroti-Namarira varaataarave. Viva qora kaiqa viravata, airi qora kaiqa vokiravata varaivo, tiro.
20 Ioniva minti tuvaro Herotiva qora kaiqa voqavata vareharo Ionira karapuhiqama kora.
Ioniva Ihura namari amura
(Matiu 3:13-17; Maaki 1:9-11)
21 Hoqarero Ioniva kia karapuhiqi vau entara, viva vaiinti nahenti namari nimiharo Ihuravata namari amura. Viva namari vira amuvaro Ihuva Kotira aare vauvaro naaruvavano qantuara vuvaro 22 Kotira Maraquravano mirura voqaara ata varero tuviro, tuvu Ihuraqaata utama vuvaro uvavano naaruvaihairo mintima tiro: Are ti Maaquma variarao. Ti muntukavano ariarama vaivo. Te ariara quahema vauro, tura.
Ihura kaivaqaukavara nutu
(Matiu 1:1-17)
23 Ihuva ihi 30navu varakero viraqaahairo nai kaiqa hoqarama kero varaqiro vumanta vaiinti nahenti virara Iohepira maaquve tura.
Iohepiva Helira maaquvano vauvaro
24 Heliva Mataatira maaquvano vauvaro
Mataativa Rivaira maaquvano vauvaro
Rivaiva Melkira maaquvano vauvaro
Melkiva Janaira maaquvano vauvaro
Janaiva Iohepira maaquvano vauvaro
25 Iohepiva Matatiaasira maaquvano vauvaro
Matatiaasiva Amosira maaquvano vauvaro
Amosiva Nahumura maaquvano vauvaro
Nahumuva Esilira maaquvano vauvaro
Esiliva Nagaira maaquvano vauvaro
26 Nagaiva Maatira maaquvano vauvaro
Maativa Matatiaasira maaquvano vauvaro
Matatiaasiva Semenira maaquvano vauvaro
Semeniva Josekira maaquvano vauvaro
Josekiva Jodaara maaquvano vauvaro
27 Jodaava Joanaanira maaquvano vauvaro
Joanaaniva Resaara maaquvano vauvaro
Resaava Serubabelira maaquvano vauvaro
Serubabeliva Seatielira maaquvano vauvaro
Seatieliva Nerira maaquvano vauvaro
28 Neriva Melkira maaquvano vauvaro
Melkiva Adira maaquvano vauvaro
Adiva Kosaamura maaquvano vauvaro
Kosaamuva Elamataamura maaquvano vauvaro
Elamataamuva Erura maaquvano vauvaro
29 Eruva Iosuaara maaquvano vauvaro
Iosuaava Eliesera maaquvano vauvaro
Elieseva Iorimura maaquvano vauvaro
Iorimuva Mataatira maaquvano vauvaro
Mataativa Rivaira maaquvano vauvaro
30 Rivaiva Simeonira maaquvano vauvaro
Simeoniva Iutaara maaquvano vauvaro
Iutaava Iohepira maaquvano vauvaro
Iohepiva Jonaamura maaquvano vauvaro
Jonaamuva Eliakimira maaquvano vauvaro
31 Eliakimiva Meleaara maaquvano vauvaro
Meleaava Menaara maaquvano vauvaro
Menaava Matataara maaquvano vauvaro
Matataava Nataanira maaquvano vauvaro
Nataaniva Devitira maaquvano vauvaro
32 Devitiva Iesira maaquvano vauvaro
Iesiva Obetira maaquvano vauvaro
Obetiva Boasira maaquvano vauvaro
Boasiva Saramonira maaquvano vauvaro
Saramoniva Nasonira maaquvano vauvaro
33 Nasoniva Aminadaapira maaquvano vauvaro
Aminadaapiva Ataminira maaquvano vauvaro
Ataminiva Aanira maaquvano vauvaro
Aaniva Hesaronira maaquvano vauvaro
Hesaroniva Peresira maaquvano vauvaro
Peresiva Iutaara maaquvano vauvaro
34 Iutaava Iekopira maaquvano vauvaro
Iekopiva Aisaakira maaquvano vauvaro
Aisaakiva Eparahaamira maaquvano vauvaro
Eparahaamiva Teraara maaquvano vauvaro
Teraava Nahora maaquvano vauvaro
35 Nahova Serukira maaquvano vauvaro
Serukiva Reura maaquvano vauvaro
Reuva Pelekira maaquvano vauvaro
Pelekiva Ebera maaquvano vauvaro
Ebeva Selaara maaquvano vauvaro
36 Selaava Kainaanira maaquvano vauvaro
Kainaaniva Apaksaatira maaquvano vauvaro
Apaksaativa Semura maaquvano vauvaro
Semuva Noaara maaquvano vauvaro
Noaava Lamekira maaquvano vauvaro
37 Lamekiva Metuselaara maaquvano vauvaro
Metuselaava Enokira maaquvano vauvaro
Enokiva Jaretira maaquvano vauvaro
Jaretiva Mahalalelira maaquvano vauvaro
Mahalaleliva Kenaanira maaquvano vauvaro
Kenaaniva Enosira maaquvano vauvaro
38 Enosiva Setira maaquvano vauvaro
Setiva Adaamura maaquvano vauvaro
Adaamuva Kotira maaquvano vaura.
Sataaniva Ihura avatora
(Matiu 4:1-11; Maaki 1:12-13)