Hibulu
1
Yaubada Natuna binei
Odubona houga magomagouna tahaya tapuna po tapuna uyahinei Yaubada a baha tu bahapiko i welewelehi googata uyahihi ma hi ibaabaniyeya. Ma tauta ata houga uyahina naka anani kokoe, ma a bahahi i ibaabaniyehi Natuna uyahinei. Yaubada Natuna i inagani ipa ginouli atapuhi uyahihi ina taniwaga, odubona Natunana uyahinei ginouli atapuhi i iwawalihi. Ma Yaubada a wasawasa Natuna i liyayahi, po tauna amana a dewa i lugogoni. Ma a baha wipoyanagei ginouli atapuhi hoi yada po hoi hipuli e woomomohihi. Ma ita apapoe ubeihi i hilage po i liyeuyeuta ma Yaubada Gegewahagana u awala hinebawana i duhuna.
Yesu ma tu winoyanoya mi yadena
Yaubada Natuna tu winoyanoya mi yadena atapuhi i gelagonihi po gowana Yaubada i weleweleya tu winoyanoya gowahi i haki lagonihi. Matababana Yaubada ega houga gehouna tu winoyanoya mi yadena uyahihi ita baha ita pa,
‘Tam natuwe,
Amalai a kawainatunem,’
bo ega houga gehouna tu winoyanoya yadei uyahina ita baha ita pa,
‘Tam uyahiu una kawaiamana,
ma tau uyahim a kawainatuna.’
Geka bahahi naka Natuna tunawana binei i bahehi. Hougana a Natututuwoga i himihimila hopuniyai hoi hipuli ma i baha i pa,
‘Tu winoyanoya atapumi hoi yada apo uyahina ona polou.’
Ma tu winoyanoyahi ubeihi i ibaabani naka baha tapunei i pa,
‘Yaubada a tu winoyanoya i iwawalihi, hai nae mei togowa,
ma a tu bagibagi galenahi mei mayau alalatana.’
Ma Natuna binei i ibaabani i pa,
‘Tam Yaubada, om taniwaga ega anani kokoe.
Ma om digona dumadumalunei lawa e tanitaniwagehi.
Dewa dumadumaluna nugom i waya,
ma apapoe dewana om ani luhinidoodola.
Yaka tam Yaubada, ma om Yaubada amaka i Besinanam kaoha dumana uyahinei,
po om kaohana om lawa hai kaoha lata lagoni.’
10 Ma Yaubada a baha gehouna Natunana uyahina i baheya i pa,
‘Oo Guyau, houga tahatahayana uyahina tam hipuli u wiwawali,
ma ginouli atapuhi hoi yada nimomgei u dewahi.
11 Ginoulihi atapuhi apo hina yababa, ma tam apo una memae,
ma ginouli atapuhi apo hina odubo
12 po mei kaleko una pilihi po lupulu naka pite,
ma galenahi hina gunabuinihi
ma tam apega una gunabuinim,
apo una mewahaga.’
13 Yaubada tu winoyanoya gehouna uyahina ega ita baha ita pa,
‘U awala hinebawau una duhuna,
a sigana tu wigawiyem a houna hopunehi
aem u gaboulina.’
14 Ma tu winoyanoya mi yadena tauhi naka alugo wobagibagihi Yaubada i hounihi ipa hina haguta po tauta luyagohana ta wialoni.