2
Bouk Pentikos wei Laweeng Vambuing lam o
1 Gyeik bouk wei Pentikos eno lam, om xel wongeingis dalus qekuma eivek xomek ti. 2 Se denlek en nindenduing nambei laweeng nikanzek ti lam anghei tyoung gheyapu nei me pup eivek xomek lalei wei xel toundei eivek on. 3 Xel yei lulti nambei nenyex, xok ambei ghas eno dembuma me la dei lek xel on titi. 4 Laweeng Vambuing lam pupexe xomaxoneing on lek om xel luk vyend leimalei nambei ingwei Laweeng Vambuing wong wou xel o.
5 Gweimbeeng inyon xel wei toundei eivek Yerusalem on Anutu xe xel Yudayeiw wei mi yaleeng en Anutu xe petieing me betiwou e yo, eno lam anghei beyeeng tambak wei mindei xeinghembi en tyoung gheyapu. 6 Gyeik xel ngo nindenduing tine, moux alis vex ngenong on lam qekuma is etekeing, en nambei xel titi yon ngo xel di luk eivek xel venaxow titi vyend. 7 Xel etek niseikeing, om xel teling: “Beip xel moux alis vex dalus tine eno se Galiliyeiw? 8 Woyom nambei nya ekom xey titi ngo qayeeng eivek xe venaxow vyend? 9 Xey wei Patia me Midia me Elam me Mesopotamia me Yudia me Kapadosia me Pontus me Esia, 10 me Prigia me Pampilia me Izip me ela valu wei Libia paviy Sairini, me xe valu lam anghei Rom me na lam a toundei inye. 11 (Xel on valu Yudayeiw me xel ba wei mi betiwou petieing wei Mose yo). Me xel valu wei Krit me Arebia, eno xey a ngo xel di neil xuk nimza maseim wei Anutu xe yo teyei eivek xemaxow vyend.” 12 Xel etek me wou naleind ngenong, de teling wouma, “Tine qes nambei nya?”
13 Xel valu eno luk seloukeing en xel me neil, “Xel num wain ngenong o.”
Petele neil qayeeng wou xel qendu ngandoung on
14 Woyom Petele nale is sinaleyeiw xoumeeng ti yon, de luk me vya lekla dom neil qayeeng wou xel qendu ngandoung on bei, “Xam Yudayeiw me xam dalus wei ghe mindei eivek Yerusalem o, xam wong a neil qayeeng tine wou xam, xam a ngo embo nimza en vati wei ambei neil ne yo. 15 Moux ti beimambei ne eno se num me wo nol, nambei ingwei xam ghe di wou naleimim en o. Inye nanghei seivma limvey wei satiboukeing o! 16 Ma, inye vati wei poropet Yoel neil o:
17 “ ‘Anutu neil, “Eivek bouk loxyus,
tyek a qapyex a xe Laweeng Vambuing lek xomaxoneing dalus.
Xam neumim moux me xam neumim vex tyek baluk ambei poropet, de
xam neumyeiw ghavis tyek mendghalus pekwi me gyei lul leimalei,
de teivateiv wei xam o tyek gyei maviing.
18 Eivek bouk tiyon eno tyek a qapyex a xe Laweeng Vambuing lek a xe xukxe moux alis vex dalus,
me tyek xel a neil qayeeng ambei poropet.
19 De tyek a talex lul nelu nelu eivek tyoung gheyapu nei,
me dee wei lulvako eno lek tembuing axone,
gyand me nenyex me nenyex lu ngandoung tyek na tyip.
20 Sayeiv tyek pekwi me bo mapetok
de dentouk tyek bong ambei gyand
natax en bouk ngandoung wei Tambiy Ngandoung nam is xeiyaing ngandoung me nikanzek wei e yo.
21 Me xel dalus tiwei tyek taxe
Tambiy Ngandoung lei yo eno tyek Anutu devind xel noum veil meyeing.” ’ Yoel 2:28-32
22 “Xam xomaxoneing wei Israel o li nenyamim wou qayeeng tine, Yesu wei Nasaret on, Tambiy wei Anutu talex wou xam bei wong Yesu lak wou xam is lul nikanzek is dee wei lulvako yo wei xam ghe boulek bei Anutu wong e lam eivek xam senghoing eivek e maxow mema nambei ingwei xam ghe woulek o. 23 Yesu ne Anutu wou eivek xam memamim betiwou qes me ingwei wounalei en o pyap woy, eivek xel amba wei se mi betiwou qayeeng petieing o memend ekom xam ghe tuw e lek xax pepeeng me ghe leis e mey. 24 Ekom Anutu piyexe e qandi lek veil myavanei me tul e veil meyeing, en meyeing se teyeimbei zeimaxoun e. 25 De Dawit neil ambei nye lek e,
“ ‘A xei Tambiy Ngandoung mindei paviy ay taxombouk, en moxo toundei wou a memang payeiv
om tyek a se detek.
26 Nambei nyon a laleing mi wo nimza me a myang mi sanghoxe,
me tyek a neing a mi mendei me na toung mang en inyon.
27 En tyek wa seng bong a nung na toumendei eivek beyeeng wei meyeing o,
o tyek wa xe Tambiy Tiwei Vambuing eno se daxe pataleing.
28 Wang talex sakwaing wei a mi mendei mapieing eno wou ay
me tyek wang bong xeilala e pup ay, wou wa mamghalus.’ Qapiya Lalo 16:8-11
29 “Xam lingyeiw, a neil neing wou xam en xe bund Dawit bei moxo mey me e xe eeng toundei inye is xey me elam tyip gweimbeeng ne. 30 Woyom tambiy on poropet ti om woulek ingwei Anutu neil neing is inya punei bei tyek bong e buyeiw ti mendei lek siaking wei e xe yo. 31 Dawit yei tax me neil en qandieing wei Kilisi yo, de Anutu nalei se ma e me wong e toundei eivek leiveeng wei meyeing o, me tyek xel se gyei e neing on patal. 32 Yesu tine Anutu piyexe e qandi lek me xa dalus a xei lek mami. 33 De woyom Yesu lek me la gheyapu woy me la dei wou Anutu mema payeiv me qou Laweeng Vambuing wou Ma, nambei ingwei neil zonghek o. Moxo qapyex tine lam me xam ghe di wei me ghe ngo yo. 34 En Dawit se lek me la eivek tyoung gheyapu, qe emaxow neil embei,
“ ‘Tambiy Ngandoung neil wou a xe Tambiy Ngandoung,
“Lam dei wou a memang payeiv.
35 Deka a toung xel wei mi wo vevek wou wang eno na kwanghembi eivek wa vaxam
bole.” ’ Qapiya Lalo 110:1
36 “Nambei nyon xam xomexomek dalus wei Israel o ghe bongis bei Anutu wong Yesu tiwei xam ghe tuw lek xax pepeeng eno wo Tambiy Ngandoung me Kilisi.”
37 Gyeik xel xomaxoneing ngo tine, xel laleind wo nimaying me neil wou Petele me sinaleyeiw bei, “Xam lingyeiw, tyek xa bong vati?”
38 Petele neil elox bei, “Xam dalus on titi pekwi xow me xel zipek xam en Yesu Kilisi lei, en tyek semaleeng xam xe nilul sapa veil, dom tyek Anutu bong Laweeng Vambuing wou xam nambei byeind wei xam o. 39 Qayeeng wei neil zonghek ne eno inye wou xam me xam neumyeiw me inye wou xel dalus wei mindei dingta yo, me inye wou xel dalus wei Tambiy Ngandoung xe xe Anutu taxe yo.”
40 Petele peti xel en qayeeng ngenong. Me byexaxoun xel, “Xam a mi devind ama veil xel nilul wei bouk ti gweimbeeng ne.” 41 Om xel wei mi lewexe lek e xe qayeeng me lipek eno teyei lek 3,000 eno tendulek xel lek bouk tiyon.
Lalei tixemou wei xomaxoneing o
42 Xel moux alis vex wo ninkanzek bei ngo sinaleyeiw xe teyoxeing me toung laleind lekti me wounaleind en Yesu eivek ingwei xel dembu belet o me zeimemend. 43 Me sinaleyeiw wong lul nelu nelu ngenong me dee wei lulvako yo ngenong om xel dalus on etek. 44 Xel dalus wei mi wongis Yesu eno mi dei is ama me wong lulul dalusateiv on is laleind tixemou. 45 Xel mi wo vateivek lek tembuing me lulul wei xel xe yo, de mi wong wou xel wei lulul maeing o. 46 Bouk tambak eno xel mi qekuma eivek tete lalei wei xomek vambuing wei qekueing ama yo. Xel mi dembu belet eivek xel xe xomek me ya lekti is laleind nimza me laleind vevopeing. 47 Xel mi sanghoxe Anutu me mi wo xeindlala en xomaxoneing sapa laleind mi wo nimza wou xel. Me bouk titi eno Tambiy Ngandoung qou xomaxoneing valu is no, me xel wongis e me tendulek xel bamba me xel wo ngenong.