4
Petele luw Yoan nale wou xel kanzol mendghalus
1 Luw di neil xoulek wou xomaxoneing bembeeng on, de lumukiyeiw is beyeiv wei mi yeiteyei xomek vambuing o, me xel Sadyusi xel xouing lam wou Petele luw Yoan gyeik luw di neil qayeeng wou xel xomaxoneing on. 2 Xel laleind wo vanei ngandoung wou luw en xel woulek bei luw di teyoxe xomaxoneing sapa yon en ingwei Yesu qandi lek veil meyeing o. 3 Xel zeimaxoun Petele luw Yoan bei na toung luw na eivek xeitueing deka yanyeing le, en inye souk. 4 Ekom xel ngenong wei ngo xoulek eno wongis. Me xel moux nyouk teyei lek ambei 5,000.
5 De yanyeing eno xel leitata me teivateiv me xel putoung wei petieing o qekuma nanghei Yerusalem. 6 Anas lumuki lukanzek toundei inyon is Kaiapas, me Yoan, me Aleksanda me xel moux valu wei lumuki lukanzek nipapu eno is. 7 Om xel qou Petele luw Yoan me lam lax luw wou xel mendghalus dom teling wou luw bei, “Eivek nikanzek vati, me eivek eti lei eno muw ghe wong lulti beimambei yon nangya?”
8 Woyom Laweeng Vambuing pupexe Petele, om neil wou xel, “Xam leitata me teivateiv wei xel xomaxoneing o, 9 beip xam ambei teling uw en tambiy tiwei uw a wong e vaxa wo nimzalek o, me xam ambei teling bei, e vaxa wo nimza lek ambei nya. 10 Woyom xam ghe bouk lek qayeeng tine, xam me xomaxoneing sapa wei Israel o dalus ghe boulek bei, eivek Yesu Kilisi wei Nasaret o lei, tambiy tiwei vaxa wo nol ne eno wo nimza lek me nale wou xam mamim. Xam ghe tuw Yesu lek xax pepeeng. Ekom Anutu piyexe e qandi lek veil meyeing. 11 Yesu yon
“ ‘qakous tiwei xam kamunda ghe pesek,
eno wong ambei qakous lukanzek wei mi byexaxoun xomek o.’ Qapiya Lalo 118:22
12 Tambiy ti se teyeimbei devind xey veil meyeing qe Yesu venaxow, en, eivek tyoung gheyapu xeinghembi eno Anutu se neil lei bange wei xelti yo teyei bei devind xey a noum veil meyeing.”
13 Xel teivateiv on yei Petele luw Yoan luk is nikanzek de se yaleeng, om xel woulek inyon bei luw xouing se wevek xomek qapiya, luw on moux bandaing, xel etek me wou kwend bei yuw on mi la is Yesu. 14 De xel yei tambiy tiwei luw wong e wo nimzalek o toungale inyon is luw, om xel se teyeimbei neil qayeeng ti nox wou luw. 15 Om xel neil wou luw bei luw na veil xomek kanzol, luw la veil de woyom xel luk wouma. 16 Xel teling, “Tyek xey a bong vati wou moux yuw ne? En xel sapa wei toundei eivek Yerusalem ne eno woulek bei luw wong xuk dee ne inye nimza, om xe se teyeimbei daxvun. 17 Ekom tyek xey a peti luw en luw se neil qayeeng tine na bo sapa wou xomaxoneing en lei tine no.”
18 Woyom xel lox me la taxe luw me luk nikanzek wou luw bei luw se baluk o teyoxe xomaxoneing en Yesu lei no. 19 Ekom Petele luw Yoan neil elox bei, “Xam teling ama, beip inye nimza wou Anutu manghalus bei xa betiwou xam de se Anutu? 20 Ekom uw se teyeimbei tip lukeing en lul sapa wei uw a xei me na ngo woy yo.”
21 Xel kanzol on neil qayeeng nikanzek valu no wou luw dom wong luw la, de xel se wo nimaying ti wou luw, en nambei xomaxoneing sapa yon di sanghoxe Anutu lei en vati wei belup on. 22 En tambiy tiwei luw wong e wo nimzalek eno xe vakovek qes ghanaw xoumeeng vey (40).
Xel wongeingis xe zeimeing mema
23 Xel kanzol tul Petele luw Yoan woy, woyom luw lox wou luw maxow xe xomaxoneing, me neil qayeeng dalus wei xel lumuki leitata me teivateiv neil wou luw o. 24 Xel ngo qayeeng tine woy, xel xouing toung laleind lekti eivek zeimeing mema wou Anutu. Xel neil, “Tambiy Ngandoung nikanzekta, wang toung tyoung me tembuing me mamileeng, me lulul sapa wei toundei eivek o. 25 Myaxeeng eno wang luk eivek xa mami Dawit, wa xe xukxe mya nangya Laweeng Vambuing bei:
“ ‘Nambei nya xomaxoneing sapa laleind wo myavanei,
xomaxoneing beimambei ne tup qayeeng bandaing bei bong kwa nilul enva?
26 Xel king wei tembuing eno yeiwou xow en embei bo vevek.
Me xel gyovaxa qekuma en xel embei bo vevek wou Tambiy Ngandoung
me embei bo vevek wou Kilisi is.’ Qapiya Lalo 2:1-2
27 Xa woulek bei vati wei wang neil atax takwei eno wo neing lek zonghek. En Herot aluw Pontias Pailat qeku is xel ba me xel wei Israel, eivek beyeeng ngandoung bei bong nimaying wou Yesu, wa xe xukxe vambuing tiwei wang beyal o. 28 Gyeik xel wong lul tine, xel betiwou kwa me wamaxow laleim en nikanzek wei wang o. Takwei eno wang tup qayeeng atax bei lulti beimambei ne eno neing a tyip. 29 Gweimbeeng, Tambiy Ngandoung wa bounaleim en xel xe qayeeng wei xel neil me wo yalenyeing wou xa yo, de wa devind xa wei wa xe xukxe yo, bei xa neil wa xe xoulek is nikanzek dom xa se ghaleeng. 30 De wa ni memam na lek xel wei vanei yo en xel bo nimzalek me wang bong dee wei lulvako yo eivek wa xe xukxe vambuing Yesu lei.”
31 Ka xel zeimemend woy, beyeeng kawei xel di qekuma lek on wo pimapi. Me xel dalus pup en Laweeng Vambuing me neil Anutu xe xoulek nikanzek, dom xel se yaleeng.
Xel wongeingis vind ama en lulul
32 Xel wongeingis laleind me lundpeyei eno la tixemou, xelti se neil embei lulti yon inyon emaxow xe, qe xel vind ama en lulul dalus wei xel xe yo. 33 Sinaleyeiw di tetulexe qayeeng neileing en ingwei Tambiy Ngandoung Yesu qandi lek o is nikanzek ngandoung me Anutu xe lalei xeiles wei ghanaw veil eno toundei is xel. 34 Inyon xel wei kanyo eno ti se toundei eivek xel senghoing, en eivek bouk titi xel eti yeiw wei xe tembuing, o xomek eno wo vateivek lek, me qou malew lek, 35 de toung ela wou sinaleyeiw vaxend, me xel pum malew on wou xel wei lulul maeing o. 36 Yosep, wei Livai nanghei Saiprus, xel sinale mi taxe e lei nge bei Banabas (qes ambei nye bei tambiy wei mi vind xomaxoneing en qayeeng nimza yo) 37 eno wong vateivek lek e xe tembuing de qou malew me toung ela wou sinaleyeiw.