15
Xel kanzol qekuma nanghei Yerusalem
1 Xel moux valu lam axone veil Yudia me la Antiok me di teyoxe xel amba wei wongis o bei: “Wangwei xam se ghuw nimim navi nambei Mose xe kwa nei, on tyek Anutu se devind xam veil meyeing.” 2 Paulus me Banabas ngo qayeeng wei xel moux on neil o om luw wo vevek wou qayeeng is xel me vuk lek qayeeng is xel lox me loum. Om xel beyal Paulus me Banabas bei luw na is xel wongeingis valu, bei xel na pu Yerusalem nei me na gyei xel sinale me teivateiv en telinyeing tine. 3 De kongrikesin wong xel la, om xel la lox Ponisia me Samaria senghoing, me di neil wou xel en ingwei xel amba pekwi xow o. Qayeeng nimza tine wong xel wongeingis wo xeindlala. 4 Ka xel la tyip Yerusalem eno xel wongeingis me xel sinale me gyovaxa qou xel. De Paulus aluw Banabas neil wou xel en lul dalus wei Anutu wong wou xel nangya luw memend o.
5 Woyom xel Parisi valu wei wongis eno nale me neil, “Xel amba na mi ghuw ninavi me betiwou petieing wei Mose yo.”
6 De xel sinale me teivateiv qekuma bei menyex wou telinyeing tine. 7 Ka xel neil qayeeng ngenong woy, Petele nale ghey me neil wou xel: “Xam lingyeiw, xam ghe woulek bei takwei eno Anutu beyal ay eivek xam senghoing bei a neil Xoulek Nimza wou xel amba en xel a ngo dom bongis. 8 Anutu, tiwei woulek xomaxoneing dalus laleind eno talex wou xey bei lewexe lek xel me wong Laweeng Vambuing wou xel, nambei ingwei wong wou xey o. 9 Moxo se wong kwa nge wou xel de nge wou xey, qe wong xel laleind wo vako en ingwei xel wongis o. 10 Woyom nambei nya xam ambeing bo axeing wou Anutu gweimbeeng? Xam se toung pelang nimaying lek xel betiyeing kwend, beip inyon xey o xe bundyeiw se teyei bei qalei? 11 Ma! Xey a wongis bei, eivek lalei xeiles wei xe xe Tambiy Ngandoung Yesu eno Anutu vind xey a lam veil meyeing nambei ingwei vind xel on.”
12 Xel dalus wei qekuma eno deduingma, en nambei xel di ngo Banabas me Paulus di neil qayeeng wei Anutu wong dee me lulvako eivek xel amba senghoing nangya luw memend o. 13 Luw tip qayeeng eno Jems luk elekla bei: “Xam lingyeiw, xam ngo a xe qayeeng. 14 Simon neil wou xam en vati wei Anutu talex myaxeeng en ingwei mi wou naleind en xel amba yo, bei na qou xel xomaxoneing me xel bong ambei emaxow xe. 15 Me qayeeng wei xel poropet eno la teyei lek is ambei nyon, xel byex eyeip eivek xoulek bei,
16 “ ‘Ka tine na veil eno tyek a noum me nam
me na dev Dawit xe xomek sel no wei pek me teila veil o.
Lulul wei xomek lelolexe eno tyek a menyex wou
de na dev vako no,
17 en kandek moux alis vex wei xel amba wei se Yuda eno gyimexe Tambiy Ngandoung,
me xel amba dalus wei mi wongis a leing o,
Tambiy Ngandoung neil embei. E venaxow wong lul tine qandi.’
18 Xel woulek inyon takwei qenang nei. Amos 9:11-12
19 “Nambei nyon a xe woueing nalei bei, xe se teyei bei bong lulti bo pok en xel amba wei pekwi xow me loum wou Anutu yo. 20 Embong ondek xey a byex qapiya wou xel, me na neil wou xel bei xel se qou yaeing wei xel toung ambei da wou tenu bandaing o, me kwa nilul wei kwapesiv o, me leliy leyeis wei xel bembinexe e kwa yo de xel se gya leliy wei gyand o. 21 En eivek beyeeng ngandoung titi eivek bouk wei myaxeeng o xomaxoneing valu mi neil petieing wei Mose yo teyei de xel mi pyaw eivek xomek qekueing ama lek bouk wei Sabat o.”
Xel wong qapiya la wou xel wongeingis wei xel amba yo
22 Woyom sinaleyeiw me teivateiv, is kongrikesin, xel embei beyal xel venaxow xe moux valu me bong xel na Antiok is Paulus me Banabas. Xel beyal Yudas (xel mi taxe lei nge bei Balsabas) me Silas, moux yuw on teiv eivek liyeiw senghoing. 23 Xel wong qapiya tine la is xel:
Xa sinaleyeiw me teivateiv ne xam limimyeiw,
xa byex qapiya ne lak wou xam wongeingis wei xel amba yo eivek Antiok, Siria me Silisia:
Bendiyeing xam.
24 Xa ngo bei xomaxoneing valu qandi eivek xa senghoing me lak wo nol wou xam laleimim is xel xe qayeeng me wong nimaying wou xam. Ekom xa se lenghek lek xel me wong xel lak wou xam. 25 Om xa dalus a toung laleimi lekti me na beyal xel valu me na wong xel lak wou xam is xa xe gweleeng Banabas me Paulus wei xa laleimi vind o, 26 moux yuw on teyeimbei saing luw xe mapieing en xe xe Tambiy Ngandoung Yesu Kilisi lei. 27 Nambei nyon xa wong Yudas aluw Silas lak wou xam, bei luw nak a neil qayeeng wei xa byex eno wou xam eivek luw venaxow myend. 28 Inye wo nimza wou Laweeng Vambuing me xa bei xa se toung nimaying lek xam. Qe xa neimbei xam a mi betiwou kwa valu nambei nye. 29 Xam mendei dingta veil yaeing wei xel toung ambei da wou tenu bandaing o. Xam seng gwa leliy is gyand, me xam se gwa leliy leyeis wei xel qo e kwa yo me xam pesek kwa nilul wei kwapesiv o. Tyek xam ghe bo nimza wangwei xam pesek lulti beimambei ne. Xam a mi mendei embo nimza.
30 Woyom xel wong moux ti beimambei yon la xo wei Antiok nei, de xel qeku moux alis vex wei xel wongeingis eno lekti me wong qapiya wei xel byex o wou xel. 31 Xomaxoneing pyaw qayeeng tiyon me xel wo xeindlala en ingwei xel qou qayeeng nimza wei embei devind me bong nikanzek wou xel o. 32 Yudas me Silas, luw venaxow on poropet. Om luw neil qayeeng ngenong bei devind me bong nikanzek wou liyeiw. 33-34 Ka luw la dei inyon bouk valu is xel woy, woyom liyeiw wong luw lox is mata wei lalei vevopeing bei luw nox wou xel wei wong luw lam o. 35 Ekom Paulus aluw Banabas nanghei toundei eivek Antiok, nanghei inyon eno luw me xel ngenong di teyoxe me neil qayeeng wei Tambiy Ngandoung xe yo.
Paulus aluw Banabas dembuma
36 Bouk valu la veil woyom Paulus neil wou Banabas, “Uw ambei nox mena me na ghei lindyeiw eivek beyeeng on dalus wei xey a neil Tambiy Ngandoung xe qayeeng eivek o me nanghei bei xel toundei woy.” 37 Banabas embei Yoan wei xel mi taxe e lei nge bei Malaka, eno na is luw, 38 ekom Paulus wou kwa bei inye se nimza bei e qou Malaka, en nambei la veil luw anghei Pampilia me se lox me la wo xuk is luw no. 39 Luw pyalek ama niseikeing me dembuma om luw se wo xuk is ama no. Banabas qou Malaka de luw qou sip me la tembuing nayak Saiprus eivek mamileeng, 40 ekom Paulus beyal Silas me luw la, de liyeiw toung luw eivek lalei xeiles wei Tambiy Ngandoung o. 41 Moxo la eivek provins wei Siria me provins wei Silisia yo, me byexaxoun xel kongrikesin wei toundei inyon o.