1 Ka bouk lim la veil, woyom Ananias lumuki lukanzek la xo wei Sisalia nei is xel teivateiv valu me tambiy wei lupeyei yeip yaing en petieing wei xel Rom o lei Tetalas, me qou xel xe qayeeng wei xel embei bo qayeeng en Paulus eno wou lei ngandoung wei seyap o manghalus. 2 Woyom lei ngandoung Peliks taxe Paulus la lalei, de Tetalas wong qayeeng en e me neil ambei nye: “Lei ngandoung Peliks, xa dei ewo nimza eivek wa xe lalei vevopeing me wang vind xa xe xel me ghe menyex wou lulul ngenong wei takwei wei xel se dei ewo nimza yo. 3 Xa xei lulti beimambei ne, om xa laleimi wo nimza mouyo, me na neil dange ngandoung wou wang. 4 Ekom xa se teyei bei zeimaxoun wang enden. Ambei tay wou wang en wa laleim vevop wou xa me na ngo xa xe qayeeng sepi kane.

5 “Xa xei tambiy tine eno mi wo nilul ngenong, moxo mi zeim xel laleind lek en vevek eivek Yudayeiw senghoing me la teyei lek tembuing sapa. Tambiy on gyovaxa wei xel qendu tiwei la veil xa dom xel mi taxe bei Nasaret o. 6 Me moxo wong me yei en embei bong xomek vambuing on bo nilaxes wou Anutu manghalus, ekom xa zeimaxoun e, me xa bei bo qayeeng en e nangya xa maxow xe petieing. 7 Ekom Lisias lei ngandoung lam is e xe vevekyeiw me wo vevek is xa me tetei Paulus veil xa memami. 8 Dekalekom neil qayeeng nikanzek wou eti yeiw wei embei zeim qayeeng en e eno e nam wou wang. Om wa venaxow ghe gwei embo nimza. Me teling e en tine, me na qou kwa wou emaxow vya en lul beimambei ne bei xa wo qayeeng en e.”

9 Xel Yuda vind Tetalas is ambei nyon, me byex qayeeng lek Paulus bei inye zonghek.

10 Woyom lei ngandoung wei seyap o tetax kwa bei e baluk om Paulus neil elox: “A woulek bei lek vakovek qes valu eno wang mi zeim qayeeng wei xa xomaxoneing dalus ne. Om a laleind wo nimza me na lewexe lek wa xe qayeeng. 11 Wangwei wa teling enana nei, yon wang boulek bei bouk xoumeeng yuw la veil eno a la pu Yerusalem bei na bong lalo. 12 A xei bei xel wei Yuda eno se yei bei a wo veweeng is xelti eivek xomek vambuing, o xel se yei bei a zeim xel qekueing ama yon laleind lek eivek Yudayeiw xe xomek qekueing ama me eivek beyeeng ngandoung on ti. Ma. 13 Me xel se teyei bei talex bei qayeeng wei xel byex lek a ne eno inye zonghek. 14 Ekom ambei neilteyei bei, a mi wong lalo wou Anutu wei xa bumiyeiw o me na mi betiwou Sakwaing Tiyon, wei xel mi taxe bei bange. A wongis lul dalus wei Mose byex eivek petieing o me xel poropet byex eyeip eivek qapiya yo, 15 me a wongis me na di toung mang en Anutu nambei xel moux beimambei ne bei tyek na piyexe xel wei bombek o me xel wei nilul o eno xel xouing qandi lek veil meyeing. 16 Om nambei nyon a mi wo nikanzek me na mi xeiteyei laleing wo nimza bei emi mendei embo bombek wou Anutu manghalus me xel xomaxoneing mendghalus is ambei nyon.

17 “Ka a la dei vakovek qes valu eivek beyeeng ba, a loum Yerusalem me na qou lul wei xeilala yo valu wou a xe xel xomaxoneing bei na bong wou xel wei kanyo yo de na toung da. 18 De gyeik xel yei ay eivek xomek vambuing eno a wo vako woy wou Anutu manghalus. Me xel ngenong ti se toundei is ay, me wo nindenduing bandabanda. 19 Ekom Yudayeiw valu lam anghei provins wei Esia nei me zeimaxoun ay. Wangwei xel xe qayeeng ti mendei gyeip wou ay ond inye nimza bei xel venaxow nam inye wou wa manghalus me bong qayeeng en ay. 20 O xel beimambei wei toundei inye eno teyeimbei neil sewokeing vati wei xel yei eivek ay eno teyei gyeik ingwei a nale wou xel kanzol mendghalus o. 21 Om qayeeng tixemou wei a taxe eno nambei nye: ‘Qayeeng wei xel meyeing tyek qandi lek veil meyeing, om qes tine gweimbeeng xel wong qayeeng en ay.’ ”

22 Woyom Peliks woulek kwa wei xel xomaxoneing ne mi betiwou Sakwaing Tiyon wo nimza yo, om tetulexe bouk dom wong xel lox de neil, “Gyeik Lisias lei ngandoung wei xel vevek o nam, tyek a menyex wou wa xe qayeeng.” 23 Moxo wo qayeeng nikanzek wou beyeiv bei e toung Paulus eivek xel belimbo memend, me neil wou xel bei xel se bale zeyi e qe e mi ghavineeng me nox me num eivek xomek lalei me xel se bale zeyi e xe gweleeng qe xel a mi gyei e teyei en lulul vatiyeiw.

24 Bouk valu la veil, Peliks lam is venei Drusila, inye Yuda vex ti. Moxo wong qayeeng la wou Paulus me e lam de li nenya wou qayeeng wei e di neil o, Paulus neil wou e en kwa wei wongeingis Yesu Kilisi yo. 25 Ka Paulus luk is xel en sakwaing bombek, me ingwei xomaxoneing na mi gyeiteyei xow me ingwei Anutu tyek na zeim qayeeng en xey loxyus o. Omva Peliks moxo yaleeng me neil, “Gweimbeeng inye woy! Wang na. Deka anghei sakwaing ti gyeip yaing, on tyek a bong qayeeng nak wou wang.” 26 Lek bouk kayon bombek eno moxo embeik nge tyek Paulus bong malew valu wou e, en na zeimaxoun Peliks lalei de na tul e na nivax. Om lumama eno moxo mi wong qayeeng la wou e bei baluk is e.

27 Ka vakovek qes yuw la veil, Posias Festus qou Peliks nimbeeng. De Peliks embei bong Yudayeiw bo xeindlala en e, om wong Paulus toundei eivek xeitueing.