Xoulek Nimza wei
Yoan
byex o
Qayeeng wei la tax o
Yoan byex Xoulek Nimza ne eno neil embei, ''Yesu e Anutu xe Qayeeng wei wo xomaxoneing me lam dei eivek xe senghoing o.'' Yoan wou nalei bei xomaxoneing bongis Yesu, Anutu Neu, me xel boulek bei, Yesu e tambiy tiwei Anutu neil zonghek bei bong e nam a qou xey a noumenam o. Yoan wou lek bei, xel wei wongis Yesu eno tyek na qou mapieing wei na mi mendei takwei takwei yo, om byex e xe qapiya ne (wei 20.31).
Myaxeeng eno Yoan neil wou xey bei, "Yesu e Qayeeng tiwei takwei eno mi dei is Anutu." Dekakom Yoan tul pavulek en lulvako wei Yesu mi wong o, en xey a bou lek bei Yesu e tambiy tiwei Anutu neil zonghek bei bong e nam me na qou xey a noumenam, me e Anutu Neu. Yoan neil wou xey is ambei nyon en lulvako qes wei Yesu wong o, de xey a xei ingwei xel valu wongis Yesu me betiwou e yo. Ekom xel valu eno embei se bongis.
Eivek sapta 13-17 Yoan tul pavulek en lul wei qandi eivek boukeing tiyon o, xel vevek embei zeim axound Yesu. Yesu toundei is e xe xel betiyeing me wong qayeeng nimza ngenong wou xel. Dekakom xel vevek qou Yesu me wo qayeeng en e, me tuw e lek xax pepeeng. Loxyus eno qayeeng yeip bei Yesu qandi lek me e xe xel betiyeing yei e.
Lul ti eno xey a mi xei lumama eivek qapiya wei Yoan o, inye kwa wei xey a qou mapieing wei xomaxoneing me na wong e wong ambei qayeeng pakeing wei lulul wei mapieing wei xel wongeingis o. Om xey a xei qayeeng wei laweeng me memiing me belet me xeiyaing me xax wain me gyovaxa wei sipsip o.
1
Qayeeng wo xomaxoneing
1 Eivek myaxeeng selis eno Qayeeng mindei, me Qayeeng mindei is Anutu, de Qayeeng on Anutu. 2 Inye mindei is Anutu eivek myaxeeng selis.
3 Eivek Qayeeng tine eno Anutu toung lulul sapa ne dalus, de embei ma veil eno lulti se woxow nambei e toung o. 4 Mapieing toundei eivek e, me mapieing tiyon eno inyon xeiyaing wei xel xomaxoneing o. 5 De xeiyaing tiyon mi siing eivek mapetok, ekom mapetok se teyei bei sevun xeiyaing.
6 Inyei tambiy ti Anutu wong e lam, moxo lei Yoan. 7 Moxo lam ambei tambiy wei neil Xeiyaing teyei, en kandek eivek moxo eno moux alis vex dalus a ngo e xe qayeeng me bongis. 8 Moxo venaxow se xeiyaing. Qe moxo lam bei na neil xeiyaing teyei. 9 Xeiyaing on zonghek wei mi wo xeiyaing wou xomaxoneing sapa, wei lam lek tembuing o.
10 Moxo mindei lek tembuing, me eivek e eno Anutu toung tembuing, ekom xomaxoneing wei tembuing eno se yeimend wou e. 11 Moxo la beeng qes, ekom xel wei e yo eno se qou e. 12 Qe moux alis vex dalus wei qou e eno xel wongis e lei, de moxo lewexe lek xel bei xel bong ambei Anutu neu. 13 Yakyak on se umbek en mamata gyand, o lalei vineing wei xomaxoneing neing o, o lalei vineing wei mayeiw o. Qe eivek Anutu eno wo xel umbek nambei e neuyeiw.
14 De Qayeeng wo xomaxoneing me lam dei eivek xa senghoing. Xa xei e xe xeiyaing ngandoung, inyei xeiyaing ngandoung wei Neu Moux tixemou tateis wei Ma wong e lam o, pup en lalei xeiles me zonghek.
15 Yoan neilteyei wou moux alis vex en e me taxe bei, “Inyei tambiy tiwei a neil wou xam bei, ‘Tambiy tiwei lam yus en ay eno ngandoung ghanaw ay, en nambei mindei takwei en ay.’ ” 16 De e xe lalei xeiles wei pup eivek e yo eno xey xouing a mi qou mata lumama titi teyeima. 17 En petieing eno wong wou xey eivek Mose mema, de lalei xeiles me zonghek eno lam wou xey eivek Yesu Kilisi. 18 Xelti se mi yei Anutu, qe Neu tixemou tateis, e maxow Anutu wei mindei wou Ma wes, eno talex Anutu wou xey.
Yoan lipekeing neilteyei bei e se Kilisi
19 De inye Yoan xe pavulek ne, gyeik xel Yudayeiw wei Yerusalem eno wong xel lumuki me Livaiyeiw la teling e bei, “Wang eti?” 20 Moxo neil teyei de se axvun qe neil teyei bei, “A se Kilisi.”
21 Xel teling e, “Woyom wang eti? Wa Eliya?”
Moxo neil, “Se ay.”
“Qe wa poropet tiwei xa di axe yo?” Petieing 18:15-18
Moxo neil embei, “Ma.”
22 Woyom xel teling e no, “Wang eti? Wa neilteyei wou xa en xa nox a neil wou xel wei wong xa lam o. Wambei neimbei wamaxow eti?”
23 Yoan neil nambei poropet Yesaya neil o,
“A tambiy tiwei vya taxeing ti lam eivek tembuing bandaing o,
‘Xam pepyawexe sakwaing embo bombek en Tambiy Ngandoung.’ ” Yesaya 40:3
24 Xel Parisi valu wei xel wong xel lam 25 eno teling e, “Wangwei wa se Kilisi, o Eliya o poropet nei yond nambei nya wang lipek xel?”
26 Yoan neil elox bei, “A lipek xam en memiing, ekom tambiy ti toungale eivek xam senghoing eno xam seng woulek. 27 Inyon tambiy tiwei lam yus en ay yo, de a se nimza teyei bei a tul yis wei e xe vaxalambes o.”
28 Lulul tine dalus qandi lek nanghei Betani wei memiing Yorodan loxalu nei, wei Yoan mi lipek moux alis vex anghei yo.
Yesu e Anutu xe Sipsip Lingheing
29 Bouk nge eno Yoan yei Yesu di lam wou e, om neil embei, “Wei, Anutu xe Sipsip Lingheing, tambiy tiwei semaleeng sewokeing veil xomaxoneing wei tembuing sapa yo! 30 Inye tambiy tiwei a neil gyeik ingwei a neimbei, ‘Tambiy tiwei lam yus en ay eno ngandoung ghanaw ay en nambei mindei takwei gyeik a se ghei umbek o.’ 31 A maxow eno a se woulek e, ekom qes wei a lam lipek xel en memiing bei bong xel Israel gyeimend wou e.”
32 Woyom Yoan neil teyei bei, “A xei Laweeng Vambuing lep me lam anghei tyoung gheyapu nei nambei beliy me la dei lek e. 33 A maxow se woulek e, qe tambiy tiwei wong a lam a lipek moux alis vex en memiing eno neil wou ay, ‘Tambiy tiwei wang wei Laweeng Vambuing lep me lam dei lek e eno tyek zipek xel en Laweeng Vambuing.’ 34 A maxow a xei me na neil wou xam bei tambiy tiyon Anutu Neu Moux.”
Xel betiyeing wei Yoan eno betiy Yesu
35 Bouk nge eno Yoan toungale inyon no is e xe betiyeing yayuw. 36 De moxo yei Yesu di la eno neil embei, “Wei, Anutu xe sipsip lingheing!”
37 Ka betiyeing yuw on ngo ingwei e neil tiyon, eno luw la betiwou Yesu. 38 Yesu pekwi ma, me yei luw di betiy e om teling, “Muw ghe di wimexe vati?” Luw neil embei, “Labai” (qes ambei nye Putoung), “wang mindei inya?”
39 Moxo neil elox bei, “Muw lam wei.” Om luw la me yei ingwei mindei eivek o, me luw mindei bouk tiyon is e. Inyon nambei seivma qou vey soukeing.
40 Andrias wei Simon Petele li yo, inyon yuw wei ngo qayeeng wei Yoan neil me betiy Yesu eno nge. 41 Andrias la yimexe li Simon me neil wou e tax bei, “Xa xei Mesia” (qes ambei nye Kilisi). 42 De Andrias qou Simon me la wou Yesu. Yesu yei e de neil, “Wa Simon Yoan neu. Tyek xel taxe wa leim bei Sipas.” (Xey a pekwi bei Petele. Qes bei qakous.)
Yesu taxe Pilip me Natanael
43 De bouk nge eno Yesu embei na Galili. Moxo yeiwou Pilip me neil wou e bei, “Wa betiy ay.”
44 Pilip on tambiy wei Betsaida yo, wei Andrias aluw Petele bend qes. 45 Pilip la yeiwou Natanael me neil wou e, “Xa xei tambiy tiwei Mose byex eivek petieing me xel poropet byex is ambei nyon o. Inyon Yosep neu Yesu wei Nasaret o.”
46 Natanael teling, “Nasaret ei! Inye lul nimza valu tyek nam anghei inyei?”
Pilip neil embei, “Lam me wei.”
47 Ka Yesu yei Natanael di lam eno moxo luk en e bei, “Tambiy tine Israel zonghek. Eivek e eno tyonyeing ma.”
48 Natanael teling, “Wang woulek ay ambei nya?”
Yesu lewexe bei, “Gyeik Pilip seng ghei taxe wang eno a xei wang toundei eivek xax basunghek xeinghembi.”
49 Woyom Natanael neilteyei bei, “Putoung, wang on Anutu Neu Moux, wa king wei Israel o.”
50 Yesu neil wou e, “Wang wongis en ingwei a neil wou wang bei a xei wang toundei eivek xax basunghek xeinghembi yo. Tyek wang gwei lul ngandoung valu ghanaw inyon.” 51 Woyom moxo tetulexe no, “A neil wou wang zonghek, tyek wang gwei tyoung gheyapu natax, me Anutu xe angelayeiw mendi zek me na gheyapu de mendi douk me noum lek Xomaxoneing Neu Moux.”