1 Yesu neil embei, “Xam laleimim se bo maying. Xam ghe bongis Anutu, me xam ghe bongis ay is ambei nyon. 2 Eivek Mang xe xomek nei eno lalei ngenong, wangwei se nambei nyon nei, on tyek a se neil wou xam. Om ambei na inyei me na menyex beyeeng wou xam. 3 Me wangwei a na menyex wou xam bamim nei, on tyek a noum a qou xam me nana is xow, me beyeeng wei ambei mendei eno tyek xam ghe na mendei is ay. 4 Xam ghe woulek sakwaing wei la beyeeng tiwei ambei na yo.”

5 Tomas neil wou e, “Tambiy Ngandoung, xa se woulek ingwei wa being na yo, om nambei nya tyek xa boulek sakwaing?”

6 Yesu neil embei, “A maxow sakwaing me zonghek me mapieing qes. Xelti tyek se nam wou Mang eivek sakwaing nge qe a maxow. 7 Wangwei xam ghe boulek a boy nei, on tyek xam ghe boulek Mang is. Gweimbeeng ne me e mi na eno xam ghe woulek moxo me ghe wei e.”

8 Pilip neil embei, “Tambiy Ngandoung, talex Mam wou xa, en e teyei lek xa laleimi yo.”

9 Yesu neil embei: “Pilip, inye wa seng ghei woulek ay? De a mindei eivek xam senghoing me enden eno? Xelti embei gyei ay eno yei Mang. Nambei nya wang neimbei, ‘Talex Mang wou xa’? 10 Beip wa seng wongis bei a toundei eivek Mang, de Mang toundei eivek ay? Qayeeng wei a neil wou xam eno inye se a maxow. Qe inye Mang toundei eivek Ay, me di wong e xe xuk. 11 Xam ghe bongis ay gyeik ingwei a neimbei a toundei eivek Mang de Mang toundei eivek ay, o xam ghe bongis xuk dalus wei a mi wong o. 12 A neil wou xam zonghek, xelti embei bongis ay on tyek bong vati wei a di wong ne, moxo tyek bong lul ngandoung beimambei ne ghanaw ingwei a wong ne, en nambei ambei na wou Mang. 13 De tyek a bong vatiyeiw wei xam ghe teling en eivek a leing o, en kandek Neu Moux bo lei ngandoung wou Ma. 14 Xam a mi teling wou ay en lul vatiyeiw eivek a leing, de tyek a bong.

15 “Wangwei xam laleimim devind ay, on tyek xam betiwou petieing wei a neil wou xam o. 16 De tyek a teling wou Mang, me e bong Vineing nge wou xam en e mi mendei is xam takwei takwei. 17 Vineing tiyon Laweeng wei zonghek o. Moux alis vex wei tembuing ne se qou e, en nambei xel se yei moxo, o xel se woulek e. Ekom xam ghe woulek e, en nambei moxo toundei is xam me tyek na toumendei eivek xam. 18 Tyek a se saing xam nambei yak pemboung. Tyek a mi nam wou xam. 19 Bouk sepika moux alis vex wei tembuing ne tyek se gyei a no, qe tyek xam ghe gwei ay. En nambei a toundei mapieing, de xam is ambei nyon tyek xam a toumendei mapieing. 20 Lek bouk tiyon eno tyek xam ghe boulek bei a toundei eivek Mang de xam ghe toundei eivek ay, de a toundei eivek xam. 21 Xelti embei qou a xe petieing me betiwou, ond tiyon lalei vind ay. Xelti embei lalei devind ay ond tyek Mang lalei devind e, me ay is ambei nyon tyek a laleing devind e me talex xow wou e.”

22 Woyom Yudas (se Yudas Iskariot) neil embei, “Ekom Tambiy Ngandoung, nambei nya wambei talex xow wou xa maxow de se wou moux alis vex wei tembuing sapa yo?”

23 Yesu neil elox bei, “Wangwei xelti lalei devind ay, ond tyek betiwou a xe teyoxeing. De Mang tyek lalei devind e, me tyek uw a nam wou moxo me na nam a mi mendei is e. 24 Tambiy ti lalei se mi vind ay eno tyek se betiwou a xe teyoxeing. Qayeeng beimambei wei xam ghe ngo ne eno inyon se a maxow xe, qe xel xouing on Mang tiwei wong a lam eno xe.

25 “A neil wou xam en lulul tine dalus gyeik a toundei is xam o. 26 Ekom Vineing, Laweeng Vambuing, wei Mang tyek bong e nam eivek a leing, eno tyek teyoxe xam en lul dalus me beil xam lumim lek en lulul sapa wei a neil wou xam woy yo. 27 Lalei vevopeing a wong e toundei is xam, a xe lalei vevopeing a wong wou xam. A se wong wou xam nambei xel wei tembuing sapa ne mi wong o. Om xam laleimim se bo maying me xam seng gwaleeng.

28 “Xam ghe ngo ingwei a neil o woy, ‘Ambei na de na noumenam wou xam.’ Wangwei xam laleimim devind ay, ond tyek xam ghe bo xeilala en ingwei ambei na wou Mang o, en Mang lei ngandoung eno ngandoung ghanaw ay. 29 A neil tiyon wou xam atax de se ghei qandi, en kandek gyeik ingwei embei qandi, on tyek xam ghe bongis. 30 Tyek a se puw qayeeng is xam, en gyovaxa wei mi yeiteyei tembuing ne eno lam. Moxo nikanzek se teyei bei bo lulti wou ay, 31 ekom ambei xomaxoneing wei tembuing sapa eno boulek bei a laleing vind Mang me na mi wong nambei kawei Mang peti bei a bong o.

“Xam qandi lek, en xey a na yo.”