3
Yoan Lipekeing menyex wou sakwaing
1 Eivek vakovek qes 15 wei Sisa Taibilias wo king wei Rom gyeik Pontias Pailat wo lei ngandoung wei seyap wei distrik Yudia yo de Herot yeiteyei distrik Galili dom li Pilip yeiteyei distrik Itulia me Tlakonaitis, de Lisanias yeiteyei distrik Abilini. 2 Gyeik ingwei Anas aluw Kaiapas wo lumuki lukanzek eno Anutu xe qayeeng lam wou Yoan wei Sakalias neu yo eivek tembuing bandaing. 3 Woyom moxo la eivek tembuing danghei dalus wei toundei memiing Yorodan vivi yo, me la neil xoulek wou moux alis vex bei xel pekwi xow me zipek, en kandek Anutu semaleeng xel xe sewokeing veil. 4 Lulti yon qandi nambei poropet Yesaya byex eivek qapiya yo,
“Vya taxeing ti lam eivek tembuing bandaing bei,
‘Xam menyex wou sakwaing en Tambiy Ngandoung, xam ghe bong sakwaing embo bombek en e.
5 Xam samax manya dalus e pup
me qandax lukendu is qetyei dalus e deteina.
Sakwaing dalus wei wo xeighekeing eno embo bombek,
me sakwaing wei wo nol eno embo belin.
6 Me xel xomaxoneing dalus tyek gyei Anutu xe sakwaing wei vind xomaxoneing veil nilul o.’ ” Yesaya 40:3-5
7 Yoan neil wou xel qendu ngandoung wei lam bei e zipek xel o, “Xam on myeiy nilul neu xam. Eti peti xam bei tyek xam a pek veil Anutu xe lalei vanei? 8 Xam ghe buk neing me talex bei xam ghe pekwi xow, me xam se neil wou ma bei xa bumi Apraham. En a neil wou xam bei, Anutu teyeimbei neil me qakous ti beimambei ne bong ambei Apraham neuyeiw. 9 Qov di yeip woy wou xax qes, me xax dalus wei se vuk neing nimza, eno tyek buv veil de banex ena eivek nenyex.”
10 Xel moux alis vex ngenong teling bei, “Om tyek xa bong ambei nya?”
11 Om Yoan neil elox wou xel bei, “Tambiy ti xe teimb yayuw toundei ond e bong nge wou tambiy wei ning teimb ma yo, de xelti xe yaeing toundei wou e ond e bong ambei nyon.”
12 Xel wei mi qou takis, eno valu lam is ambei nyon en embei nam zipek, om xel teling wou bei, “Putoung, tyek xa bong ambei nya?”
13 Moxo neil wou xel bei, “Xam a qou takis teyei lek ingwei seyap toung o, de xam se qou e zekna.” 14 Woyom xel vevek valu teling wou bei, “Dom xa ne bong ambei nya?”
Moxo neil elox wou xel bei, “Xam seng bo nol wou xomaxoneing me panax xel xe malew. Me na byex qayeeng tyonyeing lek xomaxoneing en xel xe malew. Qe xam ghe bou naleimim bei malew wei xam ghe mi qou en xuk on teyei woy.”
15 Xel xomaxoneing wei mindei me axe lulti beimambei yon xel dalus di wou naleind ngenong bei, “Beip Yoan on Kilisi?” 16 Yoan lewexe wou xel dalus bei, “A lipek xam en memiing, ekom tambiy ti nikanzek ghanaw ay eno tyek nam, de a se nimza teyeimbei a tul yis veil e xe vaxalambes. Eno moxo tyek zipek xam en Laweeng Vambuing me nenyex is. 17 Moxo zeim taliv eivek mema, en embei beyal wit neing veil myapapu, de qekuwou me na toung eivek xomek yaeing, ekom moxo tyek besei myapapu lek nenyex wei se mi mey yo.”
18 Yoan neil qayeeng valu wei embei byex xomaxoneing laleind o de neil Xoulek Nimza wou xel.
Herot toung Yoan eivek xeitueing
19 Ekom gyeik Yoan neil xel xe seyap Herot en sewokeing wei luw Herodias wei li venei yo, me kwa nilul dalus wei mi wong eno is. 20 De Herot tetulexe tine is nilul dalus wei mi wong o, dom toung Yoan la eivek xeitueing.
Yoan lipek Yesu
21 Gyeik ingwei xomaxoneing dalus di lipek, eno Yesu lipek is. Me ka e di zeimema, eno tyoung gheyapu tax. 22 Me Laweeng Vambuing lep me lam wou e, nambei beliy me lam dei lek e. De vya ti lam anghei tyoung gheyapu nei: “Wang on a Neung moux, wei a laleing vind o, a wo xeinglala en wang.”
Yesu buyeiw leind
23 Yesu xe vakovek qes la tyip ambei xoumeeng yal (30) gyeik ingwei e wong e xe xuk a tax o. Moxo Yosep neu.
Yosep on Heli neu,
24 de Heli yon Matat neu,
de Matat on Livai neu,
de Livai yon Melki neu,
de Melki yon Janai neu,
de Janai yon Yosep neu,
25 de Yosep on Matatias neu,
de Matatias on Amos neu,
de Amos on Nahum neu,
de Nahum on Esli neu,
de Esli yon Nagai neu,
26 de Nagai yon Mat neu,
de Mat on Matatias neu,
de Matatias on Semen neu,
de Semen on Josek neu,
de Josek on Joda neu,
27 de Joda yon Joanan neu,
de Joanan on Resa neu,
de Resa yon Serubabel neu,
de Serubabel on Seatiel neu,
de Seatiel on Neri neu,
28 de Neri yon Melki neu,
de Melki yon Adi neu,
de Adi yon Kosam neu,
de Kosam on Elmadam neu,
de Elmadam on Er neu,
29 de Er on Yosua neu,
de Yosua yon Eliese neu,
de Eliese on Jorim neu,
de Jorim on Matat neu,
de Matat on Livai neu,
30 de Livai yon Simion neu,
de Simion on Yuda neu,
de Yuda yon Yosep neu,
de Yosep on Jonam neu,
de Jonam on Eliakim neu,
31 de Eliakim on Melea neu,
de Melea yon Mena neu,
de Mena yon Matata neu,
de Matata yon Natan neu,
de Natan on Dawit neu,
32 de Dawit on Jesi neu,
de Jesi yon Obet neu,
de Obet on Boas neu,
de Boas on Salmon neu
de Salmon on Nason neu,
33 de Nason on Aminadap neu,
de Aminadap on Atmin neu,
de Atmin on Arni neu,
de Arni yon Hesron neu,
de Hesron on Peres neu,
de Peres on Yuda neu,
34 de Yuda yon Yakop neu,
de Yakop on Isaka neu,
de Isaka yon Apraham neu,
de Apraham on Tera neu,
de Tera yon Nahor neu,
35 de Nahor on Seruk neu,
de Seruk on Reu neu,
de Reu yon Pelek neu,
de Pelek on Eber neu,
de Eber on Sela neu,
36 de Sela yon Kainan neu,
de Kainan on Apaksat neu,
de Apaksat on Sem neu,
de Sem on Noaka neu,
de Noaka yon Lamek neu,
37 de Lamek on Metusela neu,
de Metusela yon Inok neu,
de Inok on Zaret neu,
de Zaret on Mahalalel neu,
de Mahalalel on Kenan neu,
38 de Kenan on Enos neu,
de Enos on Set neu,
de Set on Adam neu,
de Adam on Anutu neu moux.