7
Beyeiv wei xel vevek o xe wongeingis
1 Gyeik ingwei Yesu neil qayeeng tiyon dalus ma wou xomaxoneing me xel ngo woy, de moxo la eivek beyeeng Kapenaom. 2 Nanghei inyei eno beyeiv wei xel vevek wei Rom o ti mindei. E xe xukxe tiwei lalei mi vind e ghanaw veil eno vanei wong me embim amey. 3 Gyeik ingwei beyeiv ngo Yesu lam eno wong xel teivateiv wei Yudayeiw eno valu la wou e, me teling wou bei e na bong e xe xukxe bo nimzalek. 4 Gyeik ingwei xel lam wou Yesu, eno xel tay wou e bei, “Tambiy tine nimza, teyeimbei wa devind e, 5 en nambei moxo lalei mi vind xey wei Yuda yo, me ev xa xe xomek qekueing ama.” 6 Om Yesu la is xel.
Moxo la paviy xomek, gyeik inyon eno beyeiv wong gweleeng valu la neil wou embei: “Tambiy Ngandoung, wa seng bo pok wou xow en a se teyei lek bei wang nam eivek a bang. 7 Inye qes ambei nye, om a wou naleing bei a se teyei lek bei a maxow a nak wou wang. Qe wa neil qayeeng dom a xe xukxe embo nimzalek. 8 En a maxow is a tambiy wei a mi wevek tambiy wei wo lei ngandoung en ay yo, is axe xel vevek wei mi wevek a xeinghembi yo. A neil wou tine bei, ‘La,’ on moxo la, me nge nei, ‘Lam,’ on moxo lam. A neil wou a xe xukxe bei, ‘Wang bong xuk tine,’ on moxo wong.”
9 Gyeik Yesu ngo qayeeng tine eno moxo etek en e, me pekwi ma wou moux alis vex ngenong wei di betiy e yon, me neil wou xel bei, “A neil wou xam, a se xei xelti xe wongeingis wei ngandoung o nambei nye eivek Israel sapa.” 10 Woyom xel moux wei beyeiv wong xel la eno loumelam xomek me yeimbei xukxe wo nimzalek.
Yesu piyexe vexeiv ti neu moux
11 Ka enden nayaka le eno Yesu la beyeeng ti xel mi neil Nain, me e xe xel betiyeing me moux alis vex ngenong la is e. 12 Ka la paviy tete mya wei beyeeng, eno xel qalei meyeing ti me lam myayaing, vexeiv ti neu moux tixemou yon, de moux alis vex ngenong wei beyeeng eno lam is e. 13 Me gyeik ingwei Tambiy Ngandoung yei vex on eno lalei pyaxow en e me neil wou e, “Wa seng deeng.”
14 Woyom la paviy me axlek qoupek meyeing, me xel wei di qalei eno nale kanzek. De moxo neil, “Moux ghavis, a neil wou wang, qandi lek!” 15 De moux meyeing on qandi lek me dei ghey me luk atax, dekakom Yesu wong e lox me la wou ta.
16 Xomaxoneing dalus etek en ingwei xel yei Anutu xe nikanzek me sanghoxe Anutu me neil, “Poropet ngandoung ti qandi eivek xey senghoing, Anutu lam en embei devind e xe xomaxoneing.” 17 Pavulek wei Yesu ne eno xel tul ela wo tambak eivek Yudia me tembuing danghei danghei nei.
Yesu me Yoan Lipekeing
18 Yoan xe xel betiyeing neil wou e en lul dalus ti beimambei wei Yesu wong on. Om moxo taxe e xe xel betiyeing yayuw, 19 me wong luw la wou Tambiy Ngandoung bei na teling e, “Inye wa tambiy tiwei embei nam o, o xa mi daxe tambiy nge?”
20 Gyeik ingwei moux yuw on la wou Yesu, eno luw neil wou e bei, “Yoan Lipekeing wong uw alam wou wang, bei nam a teling, ‘Inye wa tambiy tiwei embei nam o, o xa mi daxe tambiy nge?’ ”
21 Lek bouk tiyon eno Yesu wong moux alis vex ngenong xe vanei leimalei wo nimzalek, me tiy xel laweeng nol wei toundei eivek moux alis vex eno veil, me wong xel ngenong wei mend tekeing eno yeila. 22 Om Yesu neil elox wou nenyalesana luw bei, “Muw ghe nox a neil wou Yoan en vati wei muw venaxow ghe wei me ghe ngo yo: Xel wei mend tekeing eno yeila, xel wei vaxend nol eno qeilek me la, xel wei lepa eno wo nimzalek, nenya qatu eno ngowou, de meyeing qandi lek, me xel kanyo eno ngo Xoulek Nimza. 23 Xel wei yei ay me xel xe wongeingis se tei eivek en ay eno xel bo xeindlala.”
24 Ka Yoan xe nenyales aluw lox veil le, eno Yesu neil wou moux alis vex en Yoan bei, “Xam ghe la eivek tembuing bandaing en xam a being na gwei vati? Ghet tiwei laweeng di vei elox me loum o? 25 Wangwei nama nei, yond xam ghe la bei na gwei vati? Beip xam ghe la di wei tambiy wei byex teimb nimzamza yo? Ma, xel wei mi byex teimb wei malew tata yo me xel xe lul nimzamza wei neing eno mindei eivek xel king bend. 26 Ekom xam ghe la en xam a being na gwei vati? Poropet ti? Ee, a neil wou xam, poropet tiyon ghanaw xel poropet ba. 27 Tambiy tiyon xel byex eivek xoulek ambei nye,
“ ‘Wei, tyek a bong axe nenyalesana wei mi neil qayeeng o ti natax en wang,
me tyek gyeiwou sakwaing en wang.’ Malakai 3:1
28 A neil wou xam, eivek xel wei tayeiw wou xel o eno Yoan ghanaw xel. Ekom tambiy wei lei maeing eivek Anutu xe tete lalei eno ghanaw Yoan.*7:28 Xel wei yei Yesu xe xuk me ngo xoulek nimza wei Yesu eno ghanaw Yoan. ”
29 (Xomaxoneing dalus, is xel wei mi qou takis o, gyeik xel ngo Yesu xe qayeeng, eno xel neil embei Anutu xe sakwaing on wo bombek, en nambei Yoan lipek xel. 30 Ekom xel Parisi is xel wei lupeyei ngandoung en petieing wei Mose eno xel pesek Anutu xe woueing nalei en sakwaing nimza wei xel o, en nambei Yoan se lipek xel.)
31 Yesu neil, “Tyek anghei xomaxoneing wei gweimbeeng ne me talex xel lek vati? Xel on nambei nya? 32 Xel on teyei lek yakyak wei mindei eivek beyeeng wei vateivek o me taxe la wou xel valu bei,
“ ‘Xa vei sakwep en xam
ekom xam seng aw,
xa wo talot
ekom xam seng eng.’
33 En Yoan Lipekeing lam eno se ya belet me se num wain, eno xam ghe neimbei, ‘Moxo memo toundei eivek e.’ 34 De Xomaxoneing Neu Moux lam ya me num, eno xam ghe neimbei, ‘Tambiy yon mi ya ngenong me mi num wain ngenong de e gweleeng wei xel wei mi qou takis o me sewokeing o.’ 35 Ekom lupeyei nimza eno yeip yaing bei inye bombek en mapieing wei xel dalus wei mi betiwou yo.”
Vex sewokeing ti eno taw wel lek Yesu
36 De Parisi ti taxe Yesu bei e na gya is e, om moxo la xomek wei Parisi yo me la dei lek zek†7:36 Gyeik tiyon eno tebol ma dom xel mindei lek zek me yeip xokeing me ya. me ya. 37 Gyeik vex wei sewokeing o ti mindei eivek beyeeng tiyon eno ngo Yesu la di ya eivek Parisi beeng, vexo qou botol qakous nimza is wel xeimangou toukale eivek o me la. 38 Vexo la nale wou Yesu demi paviy e vaxa de eng, me malouk taw lek Yesu vaxa. Woyom tul luvelus me vu Yesu vaxa luw angya, me sesuvexe Yesu vaxa lumama de taw wel lek e vaxa luw.
39 Gyeik ingwei Parisi tiwei taxe Yesu la eno yei vex tiyon wong ambei nyon, eno luk wou xow bei, “Wangwei tambiy tine poropet ti on tyek boulek bei eti axlek e me vex tiyon nambei nya, vex on sewokeing.”
40 Yesu lewexe lek e bei, “Simon, axe qayeeng ti om ambei neil wou wang.”
Moxo neil embei, “Putoung wa neil wou ay.”
41 Woyom Yesu neil wou e, “Moux yayuw qou malew vateivek wou tambiy ti, nge qou selewa vaxak xoumeeng de nge qou selewa vaxak ti. 42 Luw malew ma en ingwei luw embei bong enox zeyi yo, om tambiy on semaleeng malew vateivek wei luw xouing o. Om luw nge na laleind vind e ghanaw veil?”
43 Simon neil elox, “A wou naleing bei, tambiy tiwei e xe malew vateivek ngandoung wei e semaleeng veil o.” Yesu neil embei, “Wang wei me ghe neil bombek.”
44 Woyom moxo pekwi ma wou vex me neil wou Simon bei, “Wang wei vex tine? A lam eivek wa bam. Eno wa seng wong memiing valu bei a sekweyexe vaxang, qe vex tine sekweyexe a vaxang en malouk me vu gya luvelus. 45 Wa seng sesuvexe ay. Qe gyeik a eivek a lam wa bam eno vex tine se tip sesuvexeing a vaxang. 46 Wa seng taw wel lek a lung, qe vexo taw wel xeimangou yo lek a vaxang. 47 Om nambei nyon a neil wou wang, vexo xe sewokeing ngenong eno semaleeng veil, om vexo lalei vind a ghanaw veil. Ekom tambiy wei Anutu semaleeng e xe sewokeing nayaka eno e xe lalei vineing nayaka.”
48 Woyom Yesu neil wou vexo, “A semaleeng wa xe sewokeing veil.” 49 Xel bamba wei toundei lek zek me ya eno di neil eivek ama senghoing bei, “Eti inye om teyeimbei semaleeng sewokeing veil?”
50 Yesu neil wou vex on, “Wa xe wongeingis eno vind wang. Lak is laleim vevopeing.”