1 Lek bouk kayon eno xel valu wei toundei inyon eno neil wou Yesu en ingwei Pailat leis moux wei Galili nei valu mey gyeik xel di sei xound o. Me xel gyand semaleeng is leliy gyand. 2 Yesu neil wou xel bei, “Xam ghe wou naleimim bei xel Galili yon wong sewokeing ngenong ghanaw Galili valu dalus omek lulti yon qandi wou xel? 3 Ma, a neil wou xam, xam pekwi xow, ek na ma on xam dalus tyek na mey is ambei nyon. 4 De nambei nya en 18 moux alis vex wei xomek vaxading pek me leis xel mey anghei Siloam o? Xam ghe wou naleimim bei xel wong sewokeing ghanaw xel valu dalus wei toundei eivek Yerusalem nei? 5 A neil wou xam bei, ma! Ekom wangwei xam se pekwi xow, on tyek xam dalus na mey is ambei nyon.”

6 Woyom Yesu neil qayeeng pakeing tine, “Tambiy ti ev xax basunghek eivek e xe xuk wain, me moxo la en embei gyei xax on neing wei toukami lek o, ekom se yei neing ti, 7 om neil wou tambiy wei mi yeiteyei xuk wain o, ‘Eivek vakovek qes yal eno a mi lam a xei xax basunghek on neing, ekom a se xei neing ti, om vuv veil! Nambei nya e puw tembuing denzi bandaing?’

8 “Ekom xukxe neil e lox wou bei, ‘Teiv, wong e toukale vakovek qes tine is me a ev tembuing vivekwou me na toung lul denzi yo eivek e qes. 9 Wangwei e buk neing lek vakovek qes nge yus on nimza, ek na ma ond wang buv veil.’ ”

10 Lek Sabat ti eno Yesu di teyoxe xel eivek xomek qekueing ama ti, 11 me vex ti toundei inyon, eno laweeng ti wong e demi wo qendu teyei lek vakovek qes 18. Me vexo se teyeimbei bale bombek no. 12 Gyeik ingwei Yesu yei vexo eno taxe e lam de neil wou e, “Vex, wa xe vanei ma veil wang.” 13 Woyom moxo li mema lek e, de lutika eno vexo nale bombek me di sanghoxe Anutu.

14 Ekom gyovaxa wei xomek qekueing ama eno lalei wo vanei, en ingwei Yesu wong vanei wo nimzalek Sabat o, om neil wou xomaxoneing bei, “Inye bouk wei wongeing xuk eno limti toundei, om xam ghe nam en e gyeiwou xam lek bouk on ti, ek se lek bouk wei Sabat o.”

15 Tambiy Ngandoung lewexe wou e, “Xam wei myamim yuw o, xam titi seng la mi tul yis veil xam xe manghaxo o dongi lek Sabat eivek xomek leliy, me dandiy me la bei na bong memiing wou xel? 16 De vex tine nye Apraham neu, Sandang qo e xoun teyei lek vakovek qes 18, om se teyeimbei a tul lul tiwei qo e xoun on lek bouk wei Sabat o de ena nivax?”

17 Gyeik ingwei moxo neil tine, eno xel dalus wei pesek e yon ninyaleeng, de xomaxoneing wo xeindlala en lul nimza maseim dalus wei Yesu wong o.

18 Woyom Yesu teling bei, “Anutu xe tete lalei teyei lek vati? Tyek a neil lek vati? 19 Inyon nambei mastet vei, wei tambiy ti qou me ev eivek e xe xuk yaeing. Mastet on ling me wo ngandoung nambei xax teta me menek lam mi qo lewis lek memama.”

20 Moxo lox teling no, “Tyek a neil Anutu xe tete lalei lek vati? 21 Inyon nambei yis wei vex ti qou me semaleeng is palawa ngandoung wei dipekta yo, me e wong palawa dalus on vuk lek.”

22 Woyom Yesu di tupwou sakwaing me la Yerusalem. Om la eivek beyeeng dalus me beyeeng nayak me teyoxe xomaxoneing. 23 Xelti teling wou embei, “Tambiy Ngandoung, inye xomaxoneing nuyuw tyek Anutu devind xel?”

Moxo neil wou xel, 24 “Xam ghe bong nimkanzek me ghe na eivek xomek mya wei nayak o. A neil wou xam bei, xel ngenongakes wong me yei en embei na eivek, ekom xel se teyei. 25 Gyeik xomek ma qandi lek me xey qapomb zeyi, tyek xam bale myayaing me ghe nyeis memamim lek qapomb me taxe bei, ‘Teiv, tax qapomb veil xa.’

“Ekom tyek na neil wou xam bei, ‘A loung en xam, xam ghe lam anghei inya?’

26 “Woyom tyek xam a neil wou bei, ‘Xa xa me na num is wang, me wang nale eivek xa xe sakwaing mema nayak me ghe teyoxe wou xa.’

27 “Ekom moxo tyek na neil enoum bei, ‘A loung en xam, xam ghe lam anghei inya. Xam la veil ay en xam on ghe wong kwa nilul!’

28 “Tyek xam ghe deeng me zanga newoumim bo nyiknyik nanghei inyon, gyeik ingwei xam ghe gwei Apraham, me Isaka me Yakop me xel poropet dalus eivek Anutu xe tete lalei yo, dom xam venaxow eno tyek Anutu banex xam ghe na myayaing. 29 Xomaxoneing tyek nam anghei ninei me xeinei me punei me xonei, me tyek nam mendei me gya mata eivek Anutu xe tete lalei. 30 De ngo le, xel wei dei yus eno tyek na mendei mya de xel wei dei mya eno tyek nox mendei yus.”

31 Lek bouk kayon eno Parisi valu lam neil wou Yesu bei, “Wang na bange veil beyeeng ne en Herot embei nyeis wa mey.”

32 Yesu neil elox wou xel, “Xam ghe na neil wou naw bemeeng on bei, ‘Gweimbeeng me yanyeing eno tyek a tiy memo na me na bong xomaxoneing wei vanei yo bo nimzalek. De bouk yal eno tyek a bong axe xuk dalus na ma.’ 33 Ee gweimbeeng me yanyeing, me yanyeing nge eno tyek a na, me neing ayang inye se nimza bei poropet ti e mey anghei myayaing veil Yerusalem!

34 “Yerusalem, Yerusalem, wang mi leis xel poropet mey, me ghe nex xel wei Anutu wong e lam wou wang o en qakous, taxombouk eno a mi wong en ambei qeku neumyeiw dalus lekti nambei qouklex ta mi qeku neuyeiw eivek banis o. Ekom xam laleimim se mi vind. 35 Wei, kale tyek wa bam lelolexe me gyeip bandaing. A neil wou xam bei, tyek xam seng gwei a no, qe ka xam a neimbei, ‘Anutu bong mata wou tambiy tiwei lam lek Tambiy Ngandoung lei yo.’ ”