1 Yesu neil wou e xe xel betiyeing bei, “Tambiy wei lulul ana yo ti xe lei ngandoung wei mi yeiteyei xuk o ti mindei. Om xel valu lam me byex qayeeng lek e bei, ‘Wa xe lei ngandoung wo nol wou wa xe lulul.’ 2 Om moxo taxe e la lalei me teling wou e, ‘Vati ingwei a ngo en wa xe kwa ne? Wang na menyex wou qayeeng wei xuk wei wang o me na neil wou ay, en tyek wa seng bo lei ngandoung no.’

3 “De lei ngandoung neil wou xow bei, ‘Tyek a bong vati gweimbeeng? Axe teiv zeim xuk veil ay. A ninkanzek ma en ingwei ambei bong xuk wou xel nge me qandax tembuing o, de a ning yaleeng en tayeing lulul. 4 A woulek vati wei ambei bong o, om gyeik ingwei a noum veil xuk eno tyek xomaxoneing na qou a me na eivek bend.’

5 “Om moxo taxe xel wei qou lul vateivek wou e xe teiv ekom se wong zeyi yo, xel titi mi la lalei, moxo teling tambiy tiwei tax o, ‘Wang qou a xe teiv xe lulul vamva?’

6 “Moxo neil embei, ‘800 deng oliv wel.’

“Lei ngandoung neil wou e, ‘Wa qou wa xe qapiya me mendei daing me na byex bei 400 deng.’

7 “Woyom moxo teling nge wei yuw o, ‘De wang qou vamva?’

“Tambiy on neil elox bei, ‘1,000 bek wit.’

“Lei ngandoung neil wou e, ‘Wa qou wa xe qapiya me na byex bei 800 bek.’

8 “De teiv woulek vati wei lei ngandoung nilul on wong o, om sanghoxe e lei en wong kwa yon nambei xel wei lupeyei nimza yo. En xomaxoneing wei gweimbeeng ne eno kwa ghanaw veil, eno xel mi woulek sakwaing mema mema wei xel mi wong wou xel venaxow xe xel o, me xel ghanaw xel wei mi betiwou kwa wei xeiyaing o. 9 A neil wou xam, xam ghe bo xuk en malew wei tembuing ne en na puw xel nam me ghe bong gweleeng lek xel en kandek bouk wei qoueing malew ema, on xel a qou xam me na eivek xomek wei deing nimza luta luta yo.

10 “Wangwei xelti mi gyeiteyei lulul wei nayak o bo nimza on tyek gyeiteyei lulul wei ngandoung o bo nimza. Ek wangwei xelti se mi gyeiteyei lulul wei nayak eno bo bombek on tyek se gyeiteyei lulul wei ngandoung eno bo bombek is. 11 Om wangwei xam seng gweiteyei malew wei tembuing ne bo bombek, ond tyek eti bong lulul nimza wei tyoung gheyapu yo wou xam en xam ghe gweiteyei? 12 Me wangwei xam seng gweiteyei xel nge xe lulul bo nimza, on eti tyek bong wamaxow xe lulul wou wang?

13 “Xukxe ti se mi wong xuk wou teiv yayuw. En tyek lalei bo nol wou nge de lalei devind nge. O moxo tyek betiwou nge de na toung demi wou nge. Xam seng teyei bei bo xuk wou Anutu de malew is.”

14 Xel Parisi laleind mi vind malew, om xel ngo qayeeng tiyon dalus eno xel wo vyend wou Yesu. 15 Moxo neil wou xel bei, “Xam ghe mi wong xow wo nimza wou moux alis vex mend, ekom Anutu woulek xam laleimim. Lul vatiyeiw wei moux alis vex wou naleind bei inyon nimza maseim, eno inyon nilul ayang wou Anutu manghalus.

16 “Qayeeng petieing me qayeeng wei xel poropet o mi yeip me elam tyip wou bouk wei Yoan o. Eivek bouk kayon eno Xoulek Nimza wei Anutu xe tete lalei eno xel di neil e la teyei lek beyeeng sapa, me xel dalusateiv di wo ninkanzek me la eivek. 17 Inye se wo pok en ingwei tyoung aluw tembuing malang o. Ekom qayeeng wei xel byex eivek petieing eno ti tyek se nati.

18 “Xelti embei qateiv iingama wei luw venei de dii vex nge, on wo kwapesiv, de wangwei moux ti dii vex wei leya qateiv e veil iingama yo, on wo kwapesiv.”

19 Yesu neil no bei, “Inyei tambiy wei lulul ana yo ti mi vunek en teimb teleing me mateyek nimzamza de teyei lek bouk eno mi ya lulul nimza. 20 Nanghei lulul ana xe tete mya eno kanyo ti eno mindei inyon. E lei Laserus, qatyex sevunexe e ninavi. 21 Moxo mi wounalei bei gya lulul myapapu wei mi teila eivek lelek xeinghembi wei lulul ana xe yo, de woyom xel naw la mi myeil e xe qatyex.

22 “De bouk la wou eivek om kanyo tiwei mi tay eno mey me xel angela lam qou e me la toung wou Apraham byek. De tambiy wei lulul ana eno mey is me xel ev. 23 Eivek beyeeng wei meyeing xe yo eno moxo valwou myavanei ngandoung. Lulul ana moxo yeila Apraham toundei dingta me Laserus toundei wou e byek. 24 Om moxo taxe la wou e bei, ‘Mang Apraham, wa laleim e pyaxow en ay! Wang bong Laserus a toung mema deyis na eivek memiing me nam a toung lek a ghas en embo nityuweing nayaka, en a toundei eivek nenyex tine eno a axe myavanei ngandoung.’

25 “Ekom Apraham neil elox wou e, ‘Neung, wang bounaleim en ingwei wang mindei mapieing o, bei wang mi qou lul nimzamza de Laserus mi qou lulul wei nilul o, ekom gweimbeeng ne eno lalei wo nimza nanghei inye de wang valwou myavanei. 26 De lulti nge is, senghoing eivek xa de xam eno Anutu toung vul manghembi ti yeip zeyi woy. En kandek xel ne ti se teyeimbei qayil me nak wou xam de xam on ti se teyeimbei qayil me ghe nam inye wou xa.’

27 “Woyom moxo neil, ‘Nambei nyon a tay wou wang, mang, wang bong Laserus na mang beeng. 28 En a lingyeiw lim, om wong Laserus la peti xel en kandek xel se nam eivek beyeeng wei myavanei ngandoung ne is.’

29 “Ekom Apraham neil elox, ‘Mose xe petieing me xel poropet xe qayeeng eno di yeip wou xel om xel a mi ngo.’

30 “Lulul ana neil, ‘Ma, mang Apraham, ekom wangwei xel meyeing ti qandi lek me na wou xel on tyek xel bongis me pekwi xow.’

31 “Apraham neil wou embei, ‘Wangwei xel embei se ngo wou Mose me xel poropet, on tyek xel se teyei bei bongis tambiy wei qandi lek veil meyeing o.’ ”