1 Ka Yesu veilma lek me yei xel wei malew ana yo la di toung xel xe da eivek qoupek malew wei xomek vambuing o. 2 De moxo yei vexeiv kanyo ti is eno toung selewa gyand nayak yayuw la eivek qoupek malew. 3 De Yesu neil embei, “A neil wou xam zonghek, vexeiv kanyo toung malew ngandoung ghanaw moux alis vex valu. 4 Xomaxoneing on dalus xe malew ngenong, om xel toung danghei ka la eivek deng xeikatu. De vexeiv on lulul maeing, ekom toung malew dalus wei embei devind e yo.”

5 Moxo xe xel betiyeing valu yei xomek vambuing me luk en bei, “Xel qou qakous nimzamza me da wei xel toung wou Anutu yo me vunekwou xomek tiyon en.” Ekom Yesu neil embei, 6 “Bouk ti tyek nam eno lulul tiwei xam ghe di wei yon, tyek xel lelolexe dalus me banex ena xonei lek tembuing de qakous ti tyek se gyeip lek nge mapu.”

7 Om xel teling Yesu bei, “Putoung, gyeik inya lulti yon tyek qandi? Me dee vati tyek talex lek bei lul dalus tine embim nam atyip?”

8 Yesu neil embei, “Xam ghe gweiteyei xow, enok xel a tyoxe xam. Xel ngenong tyek nam lek a leing, me nam a neimbei, ‘A Mesia yo,’ me tyek xel a neimbei, ‘Bouk moxo di lam paviy.’ Ekom xam se betiwou xel. 9 Gyeik ingwei xam a ngo vevek ngandoung me vevek wei seyap o ngenong qandi, yon xam seng detek. En lul beimambei yon tyek qandi tax, ekom bouk loxyus tyek sim nam daing.”

10 Woyom moxo neil wou xel: “Tembuing nge tyek qandi me bong vevek wou tembuing nge, de tete lalei nge tyek bong vevek wou tete lalei nge. 11 Gyeik inyon eno tyek tembuing api ngandoung, de eivek beyeeng valu eno maxep ngandoung tyek qandi me vanei ngandoung is. Me tyek xam ghe gwei dee ngandoung nelu nelu valu qandi eivek tyoung me bong yalenyeing ngandoung wou xam.

12 “Ekom gyeik ingwei lul dalus on seng ghei qandi, eno tyek xel a zeimaxoun xam me bo nol wou xam. Tyek xel a qou xam me na eivek xomek qekueing ama me bong qayeeng en xam, me na toung xam ghe na eivek xeitueing, me tyek xel a qou xam me na bale wou xel king me lei ngandoung wei seyap o mendghalus. En nambei xam ghe mi betiwou ay. 13 Lulti yon tyek bong ambei sakwaing wei xam ambei neil axe xoulek teyei wou xel o. 14 Ekom xam seng bou naleimim ngenong atax bei tyek xam bale zeyi xow ambei nya. 15 En tyek a bong qayeeng wou xam me na bong lupeyei nimza wou xam is, om xel wei embei bong qayeeng en xam eno tyek se pyalek o bakeilek qayeeng wei a wong wou xam o. 16 Xam mamatam, me limyeiw, me nimpapu, me gweleeng, eno tyek xel a neil xam teyei me na toung xam eivek xel ba memend me tyek xel nyeis xam valu na mey. 17 Xel xomaxoneing dalus tyek gyei xam ghe bo nol en xam ghe mi betiwou ay. 18 Ekom xam lumim velus ti tyek se teyeimbei puw veil.*21:18 Qayeeng wei luvelus ti tyek se teyeimbei puw veil eno nambei nye, xam neing tyek na mey ekom lulti se teyeimbei bo nol wou xam numim pieing. 19 Om wangwei xam bale nikanzek ond tyek xam mendei mapieing eivek bouk loxyus.

20 “Gyeik ingwei xam ghe gwei xel vevek bale ebivekwou Yerusalem, on xam ghe boulek bei bouk wei beyeeng embei lelolexe eno paviy. 21 Woyom moux alis vex wei toundei eivek Yudia eno xel a pek me na lukendu. De xel wei toundei eivek Yerusalem eno xel na myayaing veil. De xel wei toundei myayaing en Yerusalem eno se na eivek lalei. 22 En inye bouk wei Anutu embei bong myaveweeng o, nambei qayeeng wei xel byex eivek xoulek eno tyek bo neing lek. 23 Bouk tiyon tyek bo lalei pyaweingxow en vex wei neu pouyek o me vex wei di wong luul wou neu yo! En nimaying ngandoung tyek qandi wou tembuing de Anutu xe lalei vanei tyek detei lek xomaxoneing wei Yuda yo. 24 Tyek xel amey en ngeyeing vevek, me tyek xel a qou xel me na xeitueing nanghei tembuing bamba nei. De xel amba tyek bakei vaxend eivek Yerusalem me gyeiteyei deka bouk wei Anutu lax eno na boueivek le.”

25 Yesu neil no, “Dee nelu nelu tyek qandi eivek sayeiv, dentouk, me betum, de lek tembuing eno xel xomaxoneing wei tembuing tambak ne eno tyek bou naleind ngenong me gyaleeng ngandoung, en tyek xel a ngo mamileeng buklek me bong nindenduing ngandoung. 26 Me lulul wei tyoung gheyapu eno tyek bo pimapi me xomaxoneing tyek gyaleeng ngandoung me mend bivek en vati wei embei nam lek tembuing o. 27 Woyom lek bouk tiyon eno moux alis vex tyek gyei Xomaxoneing Neu Moux nam eivek laxap ti is nikanzek me e xe xeiyaing ngandoung. 28 Gyeik ingwei lulul beimambei yon di qandi, eno xam qandi lek me ghe beil lumim lek, en bouk wei Anutu embei tul xam veil nilul eno di lam paviy.”

29 Yesu neil qayeeng pakeing ti wou xel bei, “Xam ghe gwei xax basunghek me xax sapa yon is. 30 Gyeik ingwei xam venaxow ghe gwei xax a byex nelu duing lek eno xam ghe boulek bei sewis di lam paviy. 31 Om gyeik ingwei xam ghe gwei lulul on qandi, on xam ghe boulek bei Anutu xe tete lalei di lam paviy.

32 “A neil wou xam zonghek bei, neing ayang moux alis vex wei bouk tine eno tyek se mey qe ka lulul ti beimambei yon qandi bole. 33 Tyoung aluw tembuing tyek na tip, ekom axe xoulek tyek se nati.”

34 Yesu neil no, “Xam a mi gweiteyei xow, en xam se num me betiwou Kwa nol wei numeing o xam seng bou naleimim en lulul wei xe neing o, wangwei xam ghe bong ambei nyon, on tyek bouk wei Tambiy Ngandoung xe yo tyek qandi wou xam lutika nambei leliy mi eivek lepulek o. 35 En tyek lulti yon qandi wou moux alis vex dalus wei toundei lek tembuing sapa yo. 36 Xam a mi bale nikanzek me ghe gweiteyei xow taxombouk, me na mi zeimemamim wou Anutu, en kandek xam ghanaw lulul wei embei qandi yon. De tyek xam teyeimbei bale wou Xomaxoneing Neu Moux manghalus.”

37 Teyei lek bouk titi eno Yesu mi teyoxe xel eivek tete lalei wei xomek vambuing o. De boukeing eno la mi yeip nanghei lukendu wei xel mi neil Oliv nei. 38 De satiboukeing lul eno xomaxoneing dalus mi qandi me lam xomek vambuing en embei na mi ngo e xe qayeeng.