4
Sandang wo axeing wou Yesu
1 Woyom Laweeng Vambuing qou Yesu me la tembuing bandaing nei bei tambiy mapetok bo axeing wou e. 2 Yesu vambu yaeing teyei lek bendiyeing mepyeiyuw me boukeing mepyeiyuw is om maxepya e. 3 Tambiy mapetok wei mi wo axeing eno lam wou e me neil, “Wangwei wa Anutu Neu Moux, ond neil me qakous ti beimambei ne pekwi nambei belet.”
4 Yesu neil elox, “Xel byex eivek xoulek eno nambei nye: ‘Xomaxoneing se mindei mapieing en belet venaxow, qe xel mi dei mapieing en qayeeng tambak wei mi lam eivek Anutu mya yo.’ ” Petieing 8:3
5 Woyom tambiy mapetok qou e me la beyeeng vambuing Yerusalem me wong e nale lek xomek vambuing on pundanghou. 6 Moxo neil, “Wangwei wang on Anutu Neu Moux ond vyeip me la tembuing. En xel byex eivek xoulek eno nambei nye,
“ ‘Moxo tyek bong qayeeng nikanzek wou e xe angela en xel gyeiteyei wang,
me tyek xel a zeim wang zekna eivek memend,
en kandek qakous ti se byex wa vaxam.’ ” Qapiya Lalo 91:11-12
7 Yesu neil elox wou e, “Inyon xel byex eivek xoulek is bei: ‘Wa se toung wa xe Tambiy Ngandoung Anutu eivek axeing.’ ” Petieing 6:16
8 Kalekom tambiy mapetok qou e me la lek lukendu vaxading. De talex tete lalei wei tembuing sapa me lulul nimzamza dalus eno wou e. 9 E neil, “Wangwei wang dev vaxam qatu eivek me ghe bong lalo wou a nei on tyek am bong lul dalus tine wou wang.”
10 Ekom Yesu neil wou e, “Sandang, la dingta veil ay! En xel byex eivek xoulek eno nambei nye, ‘Wang bong lalo wou Tambiy Ngandoung wa xe Anutu me ghe bong xuk wou e venaxow.’ ” Petieing 6:13
11 Woyom tambiy mapetok la veil e, dom angela lam me vind e.
Yesu xe xuk teyoxeing tiwei tax o
12 Ka Yesu ngo bei xel toung Yoan eivek xeitueing, moxo lox me la Galili. 13 De la veil Nasaret, me la dei eivek Kapenaom, wei di yeip wou lounyeing Galili vi yo, eivek tembuing wei Sebulon me Naptali. 14 Eivek kwa tine eno Yesu wong e la teyei lek ambei qayeeng wei Anutu neil eivek poropet Yesaya mya yo:
15 “Tembuing wei Sebulon me tembuing wei Naptali,
eno di yeip wou lounyeing vi, me la valu wei Yorodan nei,
me tembuing wei Galili wei xel amba lam dei lek o.
16 Om xomaxoneing wei mindei eivek mapetok ngandoung eno yei xeiyaing ngandoung ti.
Me xel wei mindei eivek mapetok eno
xeiyaing byex la lek xel.” Yesaya 9:1-2
17 Lek bouk tiyon eno Yesu neil qayeeng atax wou xel, “Xam pekwi xow, en tete lalei wei tyoung gheyapu eno lam paviy.”
Yesu taxe xel betiyeing tiwei tax o
18 Bouk ti eno Yesu la ghavineeng wou lounyeing Galili nenyawes, yei tambiy yayuw wei lindama yo, inyon Simon xel mi taxe bei Petele luw li Andrias. Luw di nex lewek eivek lounyeing, en nambei xel on ingwei mi qou woing o. 19 Woyom Yesu neil, “Muw lam me betiwou ay, en tyek a bong muw a qou xomaxoneing nambei muw ghe mi qou woing o.” 20 Lutika eno luw ghanaw luw xe lewek dom betiwou e.
21 Yesu la no, me yei tambiy yayuw inyon Jems wei Sebedi neu moux me li Yoan. Luw toundei eivek bot is ma teiv Sebedi, me di menyex wou lal xe lewek. Woyom Yesu taxe la wou luw. 22 Se wo lululek en luw ghanaw luw xe bot me ma teiv dom betiwou e.
Yesu wong xel wei vanei eno wo nimzalek
23 Yesu la ghavineeng eivek Galili tambak, me di teyoxe xel eivek xomek qekueing ama wei Yudayeiw o, me moxo di neil Xoulek Nimza wei tete lalei, me wong xel wei vanei leimalei eno wo nimzalek eivek xel xomaxoneing on senghoing. 24 Yesu xe pavulek la wo sapa eivek Siria, me xomaxoneing qou xel dalus wei vanei leimalei wong xel o me lam wou e, eti yeiw wei vanei nilul is vanei ngandoung, me laweeng nilul dei eivek xel me xel wei vanei wei nietekeing mi wong xel mi pewilexe lek tembuing me xel wei kanzek mey eno Yesu wong xel wo nimzalek. 25 Xel qendu ngandoung wei betiy e eno lam anghei Galili me Dekapolis, me Yerusalem, me Yudia me Yorodan loxalu nei.