1 Gyeik Yesu neil qayeeng ti beimambei ne ma, woyom moxo la veil Galili me la eivek tembuing wei Yudia me la loxalu wei memiing Yorodan nei. 2 Xel qendu ngandoung betiwou e, om moxo wong xel wo nimzalek nanghei inyon.

3 Xel Parisi valu lam wou e bei bong axeing wou e. Xel teling, “Beip inyei petieing neil embei moux ti qateiv iingama wei venei yo veil en woueing nalei wei emaxow o?”

4 Yesu neil elox, “Beip xam seng pyaw qayeeng wei di yeip eivek qapiya wei Anutu yo bei, eivek myaxeeng eno ‘Anutu toung xomaxoneing, moux aluw vex,’ Myaxeeng selis 1:27 5 de neil, ‘En qes tine moux tyek na veil ma luw ta me luw venei na toung lekti me luw bo neing tixemou?’ Myaxeeng selis 2:24 6 Om luw se wo yuw no, qe luw wo neing tixemou. Nambei nyon vati wei Anutu tup lekti, eno xomaxoneing ti se qateiv e tip.”

7 Xel teling, “Woyom nambei nya Mose wong qayeeng nikanzek bei moux e bong qapiya wou venei en qateiv iingama de bong vex on na?”

8 Yesu neil elox, “Mose lenghek lek bei xam qateiv iingama en nambei xam laleimim on wo nikanzekta. Ekom myaxeeng eno kwa nambei inyon eno ma. 9 Om a neil wou xam bei wangwei tambiy ti venei se bo kwapesiv is tambiy nge ekom leya qateiv iingama wei luw o, dom dii vex nge yond moux on venaxow wo kwapesiv.”

10 Xel betiyeing neil wou e, “Wangwei kwa nambei nyon gyeip senghoing eivek moux ti luw venei, ond inye nimza bei moux tiyon se dii vex.”

11 Yesu neil elox wou xel bei, “Xel ngenong tyek se qou qayeeng tine, qe wou xel valu wei Anutu wong nikanzek wou xel eno tyek bong ambei nyon de tyek xel se diima. 12 En moux valu nikanzek wei embei bo yak eno ma gyeik ingwei umbek o, me xel valu eno xomaxoneing veil e nikanzek, de xel valu eno se ii vex en xel wou kwend en xuk tete lalei wei tyoung gheyapu yo. Tambiy ti embei qou kwa nambei nye ond wong e qou.”

13 Woyom xel qou yakyak me lam wou Yesu bei e ni mema lek xel me na zeim wou xel. Ekom xel betiyeing luk nikanzek wou eti yeiw wei qou xel me lam o.

14 Yesu neil, “Wong xel yakyak on lam wou ay, de xam se bale zeyi xel, en tete lalei wei tyoung gheyapu nei eno inye wou xel ambei nyon.” 15 Gyeik e li mema lek xel woy, woyom moxo la veil inyon me la.

16 Tambiy ti lam wou Yesu me teling, “Putoung, lul nimza vati a teyei bei bong dom na qou mapieing luta?”

17 Yesu neil elox, “Wang teling ay en vati wei nimza yo en va? Inyon Anutu venaxow nimza. Wangwei wa bei qou mapieing luta nei, ond wa betiwou qayeeng petieing dalus.”

18 Moux moxo teling, “Tina?”

Om Yesu neil elox, “ ‘Wa seng nyeis xel amey. Wa seng bo kwapesiv is vex wei dei leya yo. Wa se panax. Wa seng bong qayeeng tyonyeing wou xel. 19 Wa mi gwevek mam aluw tam. Wa laleim e mi devind nimpapu nambei wa laleim mi vind wamaxow o.’ ” Qouloum 20:12-16; Lumuki 19:18

20 Tambiy ghavis on neil wou e, “Petieing dalus eno a mi betiwou. De vati tyek am bong no?”

21 Yesu lewexe, “Wangwei wambei mendei bo nimza nei, ond la wo vateivek lek lulul dalus wei wang o me wong wou xel kanyoyeiw, de tyek wa qou lul nimza ngenong nanghei tyoung gheyapu nei. Woyom wang nam betiwou ay.”

22 Ekom tambiy ghavis on ngo qayeeng tine, om moxo lalei wo maying ngandoung me la, en nambei e xe lulul ngenongakes.

23 Woyom Yesu neil wou e xe xel betiyeing, “A neil wou xam zonghek, inye pok ngandoung en lulul ana embei na eivek tete lalei wei tyoung gheyapu nei yo. 24 A neil wou xam no bei, inye pok neing en ingwei kamel embei na eivek ying manghalus wei duweing o, de pok wei malew ana ti embei na eivek tete lalei wei Anutu xe yo eno ghanaw xel amba ne.”

25 Yesu xe xel betiyeing ngo tine, moxoyeiw etek niseikeing me teling, “Wangwei nambei nyon nei ond tyek eti mendei mapieing luta?”

26 Yesu yeila xel de neil, “Wou xel xomaxoneing eno inye se teyei, ekom is Anutu eno lulul dalus on teyei.”

27 Petele lewexe lek e, “Xa ghanaw lul dalus bei betiwou wou wang! Woyom tyek xa qou vati?”

28 Yesu neil wou xel, “A neil wou xam zonghek, gyeik kawei lul dalus embei bong vako, eno Xomaxoneing Neu Moux embei mendei lek e xe sia vambuing wei lei ngandoung o, xam eti yeiw wei ghe mi betiwou ay eno tyek xam mendei lek a xe sia xoumeeng yuw wei vambuing, me ghe gwei veleivlei xoumeeng yuw wei Israel o teyei. 29 Me xel sapa wei ghanaw xel xe xomek, o liyeiw moux, o liyeiw vex, o ma, o ta, o neuyeiw, o xuk en a leing yon tyek na qou 100 ngenong is me tyek xam a qou mapieing luta luta. 30 Ekom xel ngenong wei lam atax eno tyek nox yus, de xel ngenong wei lam yus eno tyek na tax.”