1 Ka Yesu la veil tete wei xomek vambuing, eno e xe betiyeing ti neil wou e, “Putoung! Wei, qakous qakous ngandoung nimza yon, me xomek nimzamza yon.”

2 Yesu lewexe, “Wang wei xomek ngandoung dalus ne? Qakous ne ti tyek se mendei lek nge mapu, qe tyek xel lelolexe dalusateiv dom banex e deteina.”

3 Ka Yesu dei lek lukendu Oliv nei wou xomek vambuing vi valu nei, Petele me Jems, Yoan me Andrias xel teling wou e xupekeing, 4 “Neil wou xa, gyeik inya ekom lulti beimambei ne nam atyip? Me dee vati tyek xa boulek bei lul dalus ne embim bo neing lek?”

5 Yesu neil wou xel, “Xam ghe gweiteyei xow, en kandek xelti se nam a tyoxe xam. 6 Xel ngenong tyek nam lek a leing, me na neimbei, ‘A Mesia,’ me tyek xel a tyoxe xel ngenong. 7 Gyeik xam a ngo xel vevek ngandoung me qayeeng laweeng en xel vevek ngandoung o, on xam seng detek, lul ambei nyon tyek nam atyip, ekom bouk loxyus eno nanghei. 8 En xomaxoneing wei tembuing nge tyek qandi lek me bo vevek is xomaxoneing wei tembuing nge yo, tete lalei nge tyek bo vevek is tete lalei nge, me tyek inyon tembuing api eivek beyeeng valu beti, me maxep ngandoung tyek nam. Lulti beimambei ne tyek nam myaxeeng nambei vex wei mi axe vanei natax en ingwei yak mi umbek o.

9 “Xam a mi gwei xow teyei. En tyek xel a zeim xam me na qou me na wou xel kanzol me xel sesa xam eivek xomek qekueing ama. Tyek xam bale wou lei ngandoung wei seyap o mendghalus me king en ay. De tyek xam a tul pavulek wou xel en vati wei xam ghe wei lek mamim o eno wou xel. 10 Me xam a neil Xoulek Nimza wou xomaxoneing tembuing sapa yo bole. 11 Gyeik ingwei xel embei zeimaxoun xam me bo qayeeng en xam on xam seng bounaleim ngenong en vati wei xam ambei neil o. Xam a neil vati wei Anutu wong wou xam lek bouk kayon bombek. En inye xam venaxow tyek se baluk qe Laweeng Vambuing tyek na neil inyon teyei.

12 “Li moux tyek na neil li moux teyei me na toung e na eivek xel memend me xel nyeis e mey, de mayeiw tyek bong ambei inyon wou neuyeiw. Neuyeiw tyek bo nol wou mamata me na toung xel na eivek meyeing. 13 Me xomaxoneing dalus tyek laleind bo vanei wou xam en ay, ekom eti embei bale nikanzek me ena bouk loxyus wei lulul ne embei na tip lek on tyek Anutu devind xel en xel se mey.

14 “Deka xam ghe gwei lul nilul ayang, wei mi wo nol wou lulul eno na bale nanghei beyeeng vambuing wei tyek se teyeimbei bale yo.” (Yon xam wei ghe mi pyaw qayeeng ne eno xam woulek.) “De wong xel wei toundei eivek Yudia nei pek me la lukendu qendu nei. 15 Wangwei xelti na toumendei lek xomek demi qetyei eno tyek douk me noum, de se na eivek e xe xomek lalei me na qou vati wei e yo me na myayaing. 16 Wangwei xelti la toundei eivek xuk yaeing eno tyek se nox xomek me na qou e xe teimb ding nge. 17 Tyek inye bo nilul eivek bouk kayon en xel vex wei xeipouyek o me xel tayeiw wei di wo luul wou neuyeiw o! 18 Xam a zeimemamim wou Anutu en kandek lul tine e se nam eivek bouk wei laweeng nityuweing wei nigheghoing o, 19 en bouk ti beimambei yon tyek bo bouk wei nimaying ngandoung me tyek se teyei lek nambei myaxeeng selis wei Anutu toung tembuing me elam tyip gweimbeeng ne yo me lul nimaying ti tyek se nox teyei lek no. 20 Wangwei Tambiy Ngandoung se qateiv bouk wei nimaying eno bo sepi, on tyek xelti se mendei mapieing, ekom wounalei en e xe xel wei beyal wou emaxow o, om qateiv bouk wo sepi. 21 Lek seivma kayon, wangwei xelti e neil wou xam, ‘Wei, Kilisi inye!’ o ‘Wei, e inyei!’ yond xam seng bongis e xe qayeeng. 22 En xomaxoneing tyonyeing valu tyek na neimbei a Kilisi o a poropet eno tyek nam a tyip me bong dee me lulvako valu wangwei xel teyei nei on tyek xel dandiy xomaxoneing wei Anutu beyal o. 23 Om xam ghe gweiteyei xow. A neil wou xam atax en lul dalus wei bouk tine embei nam o.

24 “Ka bouk ti beimambei wei nimaying ngandoung ne na ma veil,

26 “Woyom lek bouk kayon eno xomaxoneing tyek gyei Xomaxoneing Neu Moux tyek nam eivek laxap ngandoung is nikanzek ngandoung me xeiyaing ngandoung. 27 Me tyek bong e xe xel angela na qekuwou e xe xel wei beyal o eivek beyeeng dalusateiv me e na tembuing sapa nei, nanghei ingwei tembuing la tip lek o, me ena ingwei tyoung dalus la tip lek o.

28 “De xam ghe boulek xax basunghek, gyeik ingwei xax mema byex lis vako lek woy, yon xam ghe boulek bei, buk wei seiv embei siing eno lam paviy. 29 Om nambei nyon, gyeik ingwei xam ghe gwei lul beimambei wei a neil wou xam en o belup, on xam ghe boulek bei Xomaxoneing Neu Moux lam paviy, me toungale wou qapomb. 30 A neil wou xam zonghek, xel qendu ti gweimbeeng ne tyek se mey qe ka lul dalus ti beimambei ne nam atyip bole. 31 Tyoung me tembuing tyek nati, ekom a xe qayeeng tyek se nati.

32 “Xelti se woulek bouk o seivma, me angelayeiw eivek tyoung gheyapu eno se woulek, o Neu moux se woulek is, qe Ma venaxow. 33 Xam ghe gwei xow teyei me mendi daxe! En xam seng woulek bouk kayon bombek. 34 Inye nambei tambiy ti la dingta. Gyeik ingwei moxo la veil beeng dom toung e xe xukxe bei xel a mi gyeiteyei e xe lulul, de pum xuk wou xel titi bei xel bong dom neil wou tiwei mi nale zeyi xomek mya bei e mi gyeiteyei.

35 “Nambei nyon xam a mi gweiteyei me ghe daxe en xam seng woulek bouk gyeik ingwei xomek ma embei noum o, beip eivek soukeing, o boukeing masenghoing, o gyeik ingwei qouklex sesa vya, o di nexla yo. 36 Wangwei e noum lutika nei, on wei xam seng bong e gyei ingwei xam ghe di weip o. 37 Vati wei a neil wou xam, eno a neil wou xel dalus, ‘Xam a mi gweiteyei me ghe daxe!’ ”