12
Vex me wex ngandoung
1 Dee vako ngandoungateiv ti qandi eivek tyoung gheyapu, vex ti byex sayeiv lek xow ambei vunekeing, me dentouk toundei eivek e vaxa me betum xoumeeng yuw on nambei qelumking ti toundei lek e lu. 2 Vexo xei qou veil om aing en myavanei en e bim bou neu. 3 Woyom dee vako nge qandi eivek tyoung gheyapu: Wex gyand ngandoung ti is lu lim yuw me lukepeind xoumeeng me qelumking lim yuw toundei lek e lu lim yuw. 4 Wex ngandoung tiyon xeixos pepa betum qendu ti eivek yal eno lam veil tyoung me nex xel la tembuing. Wex ngandoung on nale wou vex on ma wei embim bou neu yo, en kandek e zep vex on neu gyeik bouk kawei e dumbek o. 5 Vexo wou neu moux ti, me moux yak ti yon eno tyek gyeiteyei xel tembuing sapa is patongeeng aen o. Xel vyex vex on neu yak on la gheyapu daing wou Anutu me e xe siaking. 6 Vex on pek me la tembuing bandaing wou beyeeng wei Anutu yeiwou woy en e yo, beyeeng wei tyek xel gyeiteyei e teyei lek bouk 1,260.
7 Me vevek ngandoung qandi eivek tyoung gheyapu. Maikol me e xe angelayeiw wo vevek is wex ngandoung on, me wex ngandoung on is e xe angela wo vevek is xel no. 8 Ekom wex ngandoung on se wo nikanzek en vevek om tei veil, om xel se teyei bei mendei eivek beyeeng wei tyoung gheyapu nei. 9 Maikol me e xe angela nex wex ngandoung ngandoungateiv on tei lam axone, myeiy on inyei myeiy wei takwei qenang o. Om xel taxe e tambiy mapetok o Sandang, wei mi tyoxe xomaxoneing tembuing sapa yo. Om Maikol alis e xe angela nex e lam tembuing is e xe angelayeiw.
10 Woyom a ngo vya ngandoung ti eivek tyoung gheyapu neil:
“Gweimbeeng xuk wei xe xe Anutu qou xey a loum eno lam woy me nikanzek ngandoung me tete lalei wei xe xe Anutu yo lam
me Kilisi qou lei ngandoung.
En tambiy tiwei mi byex qayeeng lek xe lindyeiw wou xe xe Anutu manghalus bendiyeing me boukeing eno xel nex e lam axo tembuing ne.
11 Xe lindyeiw wo vevek ghanaw e nangya gyand wei Sipsip Lingheing o de nangya pavulek wei xel o,
xel laleind se vind deing mapieing wei xel o me ingwei wangwei xel amey o.
12 Om nambei nyon, tyoung gheyapu
is xam wei ghe mindei eivek tyoung gheyapu yo wo xeimimlala.
Ekom xam ghe gweiteyei xow en nimaying wou xam tembuing me xam mamileeng en tambiy mapetok lak axo yon wou xam.
E lalei wo myavanei ngandoung en e yei bei e ning bouk wo sepi lek.”
13 Wex ngandoung on yeimbei xel angela nex e lam tembuing, om e la betiy vex wei wou neu moux on. 14 Ekom xel wong tuw wei ngandoung o ti banis yayuw wou vex on en kandek vex on e zeivek me na tembuing bandaing wei xel yeiwou woy en e yo, de tyek xel gyeiteyei me bet embo nimza teyei lek vakovek qes yal me veweeng dalus is bei ena dingta veil myeiy ngandoung on. 15 Woyom myeiy ngandoung on mutek memiing nambei memiing ngandoung lam lox mya nikanzek wei memiing on qalei vex on na. 16 Ekom tembuing vind vex on, en tax mya me lep memiing ngandoung wei wex ngandoung on mutek e lam lox mya yo. 17 Woyom wex ngandoung lalei wo vanei wou vex on om la en embei na bo vevek is vex on neuyeiw bamba. Xel wei mi wongis Anutu xe qayeeng petieing o me zeimaxoun Yesu xe xoulek me betiwou yo. 18 Me wex ngandoung on toungale wou mamileeng nenyawes.