16
Dipek lim yuw wei Anutu xe lalei vanei yo
1 Woyom a ngo vya ngandoung ti lam anghei xomek vambuing me neil wou angela lim yuw on, “La me taw dipek lim yuw wei Anutu xe lalei vanei yo lek tembuing.” 2 Angela tiwei tax o la taw e xe dipek lek tembuing me qatyex nilul wei mi wo vanei ngandoung eno wong xel xomaxoneing wei qou telumek wei leliy bemeeng me mi wo lalo wou e tenu yo.
3 Angela tiwei yuw on taw e xe dipek lek mamileeng me e pekwi me wo gyand xok ambei moux wei mey o ti me lulul sapa wei mapieing eivek mamileeng eno mey.
4 Angela tiwei yal eno taw e xe dipek lek memiing leimalei me memiing leimalei wei mi puw lulaxeiv o, me xel wo gyand. 5 Woyom a ngo angela tiwei yeiteyei memiing eno neil:
“Anutu, wang toundei gweimbeeng, me takwei qenang wang toundei. Me wang on vambuing ayang.
Wang zeim qayeeng en xel eno mi la bombek.
6 En xel qapyex gyand wei wa xe xel vambuing me poropetyeiw o,
om wang wo gyand wou xel bei xel a num. Enox me na zeyi kwa nilul wei xel mi wong o.”
7 Me a ngo qeind neil:
“Ee, Tambiy Ngandoung, wa Anutu Nikanzekta.
Wang mi ngo xomaxoneing xe kwa me ghe wo qayeeng en xel, me qayeeng wei wang mi wong eno nye zonghek me bombek neing ayang.”
8 Angela tiwei vey eno taw e xe dipek lek sayeiv, me sayeiv qou nikanzek bei banyuw xomaxoneing en nenyex. 9 Nenyex myavanei wei sayeiv ne eno leis xel. Me xel lukyak lek Anutu lei, nyei Anutu wei e nikanzek wei mi yeiteyei lul nilul wei tei lek xomaxoneing ne is nikanzek. Ekom xel se pekwi xow me sanghoxe e lei.
10 Angela tiwei lim o taw e xe dipek lek siaking wei leliy bemeeng o, me e xe tete lalei eno wo mapetok ngandoung. Om xel nga venaxow ghas eivek myavanei ngandoung, 11 me xel lukyak lek Anutu wei tyoung gheyapu yo en xel xe vanei me xel xe qatyex wei xel qou yo, ekom xel se pekwi xow en vatiyeiw wei xel wong o.
12 Angela tiwei limti eno taw e xe dipek lek memiing ngandoung Yupretis me memiing on touklek bei bo sakwaing en xel King wei ninei wei sayeiv mi lam anghei yo. 13 Woyom a xei laweeng nilaxes yayal wei xok ambei dek eno xel lam myayaing veil wex ngandoung on mya me lam lox leliy bemeeng mya me lam lox poropet tyonyeing mya. 14 Xel nei laweeng nol wei memo yo wei mi wong dee wei lulvako yo, de xel mi la wou kingyeiyeiw wei tembuing sapa nei, bei na qeku xel en vevek lek bouk ngandoung wei Anutu Nikanzekta yo.
15 “Wei, a lam ambei panaxeing ti! Mata e na wou tiwei mindei de se mi yeip ma, dom mi yeiteyei xow is e xe vunekeing, en kandek e se na xei dengeing me bo niyalenyeing.”
16 Woyom xel qeku xel king lam lekti lek beyeeng tiwei eivek Hibru vyend eno xel taxe lei bei Amagedon.
17 Angela tiwei lim yuw eno taw e xe dipek la eivek tyoung. De eivek xomek vambuing eno vya ngandoung ti lam anghei siaking, me neil, “Moxo ma yo!” 18 Woyom zivip nex mema, me dewek toung me wo nindenduing me tembuing pi niseikeing. Tembuing ti se mi pi niseikeing nambei inye gyeik xomaxoneing lam dei lek tembuing ne yo. 19 Beyeeng ngandoung Babilon dembu la veweeng yal, me beyeeng ngandoung sapa wei tembuing sapa nei tei eivek. Anutu wounalei en Babilon ngandoung on me wong mayamya wei pup en wain wei e lalei vanei yo wou vex ne yo. 20 Xel tembuing nayak sapa wei mamileeng nei eno pek me la de xel se lox yei lukendu yon no en lati. 21 Sakwalek tata teyei lek 50 kilo titi eno tei lam anghei tyoung me tei lek xomaxoneing. Me xel lukyak lek Anutu en myavanei wei sakwalek tei lek xel o en nambei myavanei ne inyei lul nilul ngandoung ghanaw veil.