1 Ka tine lak veil a xei angela nge lam axone veil tyoung gheyapu. Moxo wo lei wei ngandoung ghanaw veil, me e xe xeiyaing eno wong tembuing dalus tel. 2 E taxe niseikeing, “Babilon ngandoung on tei me lelolexe. Vexo wong ambei beyeeng wei memo me laweeng nilaxes mindei eivek o me beyeeng wei menek sapa sapa wei nilaxes o. 3 En xel tembuing sapa ne mi num wain nikanzek wei e xe kwapesiv o. Xel king wei tembuing o wo kwapesiv is e me xel wei mi wong xuk vateivek lek tembuing eno xe malew mi nyouk en e xe kwa leimalei wei se mi wo niyalenyeing en o.”

4 Woyom a ngo vya nge nanghei tyoung gheyapu eno neil: “A xe xomaxoneing, xam lam veil e, en kandek xam xouing seng na eivek e xe sewokeing is e, en kandek xam se qou e xe myavanei yon ti, 5 en vexo xe sewokeing on qembu lekti me la tyoung gheyapu, me Anutu wounalei en vex on xe sewokeing. 6 Wong myaveweeng e lox wou vex on nambei vex on wong o, wang bong myaveweeng e nox wou vex on luyuw en kwa wei vex on mi wong o. De wa maleeng e xe myaveweeng luyuw eivek emaxow xe mayamya wei e maleeng o. 7 Xam ghe bong myavanei lumama wou vex on teyei lek nimaying wei kwa nilul wei e yo. Xam ghe bong e deeng en mi byexvaxa en lei me dei ghey en e xe lulul ngenong dom mi ghanang xow me neil, ‘A mindei nambei kwin, a se vexeiv me tyek a se teyei bei bo talot.’ 8 Nambei nyon eivek bouk tixemou eno lul myavanei wei nilul eno tyek nam detei lek e. Inye meyeing me talot me maxep ngandoung. Tyek nenyex gya e, en Tambiy Ngandoung Anutu ne nikanzekta wei mi zeim qayeeng en e yo.

9 “Xel King wei tembuing ne eno wo kwapesiv is vex on me wo kwa nilul ngenong is e eno gyei nenyexlu wei ya vex on eno tyek xel deeng me bo talot en e. 10 Tyek xel gyaleeng ngandoung de bale dingta me gyei myaveweeng wei e yo, me taxe bei: ‘Aei! Aei, beyeeng ngandoung on, O Babilon, beyeeng ngandoung wei nikanzek on. Eivek seivma tixemou eno wang qou nim lek xow en sewokeing wei wang on!’

11 “Xel wei mi wo xuk vateivek lek tembuing eno tyek deeng me bo talot en vex on en xelti se la wou xel xe qoupek valu no. 12 Qoupek valu wei ghol me silva, me qakous nimzamza me viyaviy, me qaeing teleing me qaeing mateyek de qaeing xeitewekeing me qaeing gyand, me xax qateiveing xeimangou leimalei me lul leimalei wei xel wong en elapan levek o me xax wei malew ngandoung en o me bras de aen me qakous wei vunekwou xow en o. 13 Vexo xouv qoupek wei xax sinamon me leisek me xax myalouk wei xeiliy wei mi wo lu xeimangou yo, denzi wei xeimangou yo me xax myalouk nimza me wain me oliv denzi, me palawa nimza me wit. Manghaxo me sipsip me vuteiv me karis me xukxe bandaing wei toundei mapieing o. 14 Tyek xel a neimbei, ‘Neing wei wa laleim leklam en wambei qou yo eno la veil wang. Wa xe lulul ngenong me vunekeing nimzamza eno lati veil. Tyek wa seng nox mena gweiwou lulti no.’

15 “Xel wei mi wo vateivek lek inyeyeiw me qou malew ngenong lam eivek e eno tyek bale dingta, me gyaleeng ngandoung en e xe myavanei wei e qou yo. Tyek xel deeng me bo talot 16 me na neil: ‘Aei! Aei, beyeeng ngandoung on, vunek en qaeing teleing on, qaeing mateyek, me qaeing gyand me ghol wei siing o, me qakous nimzamza me koumkoum! 17 Eivek seivma tixemou ne eno malew tambak me vunekeing dalusateiv on nati veil.’

“Xomaxoneing sapa wei mi qou sip, me xel dalus wei mi wo xuk lek sip on me xel wei mi ghavineeng lek mamileeng tyek bale dingta veil. 18 De xel yei nenyexlu wei nenyex ya e yo, tyek xel a neil, ‘Inyei beyeeng ngandoung eti nambei beyeeng ngandoung on?’ 19 Tyek xel banex vegyuveeng lek lund, me deeng me bong talot me na nyayek bei: ‘Aei! Aei, beyeeng ngandoung on, xel sip mayeiw dalus wei mi ghavineeng lek mamileeng en xel wo lulul ana en e xe malew ngenong mouyo. Eivek seivma tixemou yon eno vex on qou nilul ayang mouyo.’

20 “Xam tyoung gheyapu is xel vambuing me xam sinale me poropetyeiw, xam ghe bo xeimimlala en vex on. En Anutu wo myaveweeng wou e en kwa nilul wei mi wong wou xam o.”

21 Woyom angela nikanzekta ti zeim qakous ngandoung wei nambei qakous wei xel mi tendu la lek wit o me nex ela eivek mamileeng me neil: “Lek sakwaing nilul ambei nye tyek xel banex beyeeng ngandoung Babilon on na tembuing, me tyek xel se gyeiwou no. 22 Lenghekeing wei xel wei mi peitek gita me xel wei mi vei sakwep me xel wei mi vei gheveng o de xel wei mi vei vukxax eno tyek xel se ngo nindenduing ti eivek beyeeng ngandoung on no. Tyek xel se gyei xel xukxe wei xuk lei titi eno eivek wang no. Me tyek xel se ngo vya lenghekeing wei qakous wei xel mi tendulek wit eno eivek beyeeng ngandoung on no. 23 Xeiyaing wei lam ti eno tyek se tel eivek wang no. Vya wei moux me vex wei embei diima eno tyek xel se ngo eivek wang no. Wa xe xel wei mi wo vateivek o inye lei laeing wei tembuing o. Wang wong palak me ghe tyoxe xomaxoneing wei tembuing sapa yo.”

24 Eivek beyeeng ngandoung Babilon eno Anutu yei gyand wei xel poropet me xel vambuing me xel dalus wei xel leis xel mey lek tembuing.