Emos
1
Utu i viva: Emos utuutuniye
Utuutuke thiyake Emos ghalɨŋae, iye sip gharanjimbunjimbu, i mena Tekoa. Theghathegha umboiwo amba muyai ragheragheghe, mbaŋaniye Ujaiya iye va Juda lenji kiŋ na Jerobowam Johoas nariye iye Isirel lenji kiŋ, Loi i utugiya utuutuke thiyake weya Emos Isirel kaiwanji.
Loi valɨkaiwae i mukuwo
Emos iŋa:
Giya Loi ghalɨŋae laiye laghɨye moli i mena Saiyon
na e larɨmbɨya i mena Jerusalem e tɨne,
sip lenji ghamba ghan thɨ mare
na ou Kamel vwatae nana thiya mareyawowo.”
Loi ne i lithɨ weŋgi Isirel valɨnɨmaeŋgi
Giya Loi iŋa ŋgoreiyake:
“Kaiwae Damasiko gharɨgharɨniye thɨ vakatha valaŋa tharɨ
mane ya mwana njogha lo ghatemuruke.
Kaiwae thɨ giya vɨrɨ laghɨye weŋgi Giliyad gharɨgharɨniye.
Iya kaiwae ne ya vakatha ndɨghe i nda Kiŋ Hajael le ŋgolo
na tembe ve wova Kiŋ Benhaded le ŋgoloŋgolo vurɨvurɨghegheniye.
Ne ya ŋgoŋgo vwowona ghembana laghɨye Damasiko gha thɨnɨmba ŋginaŋginauye;
na ne ya mukuwo kiŋɨko iya i yaku e Malamo Aven tɨne,
na thela iya i mbaro Betidan e tɨne.
Siriya gharɨgharɨniye ne thɨ vaŋguŋgi
na vethɨ mebwabwari Kirɨ e tɨne,”
Giya Loi iŋa.
Pilistiya
Giya Loi iŋa ŋgora iyake:
“Kaiwae Gaja gharɨgharɨniye thɨ vakatha valaŋa tharɨ
mane ya mwana njogha lo ghatemuruke,
kaiwae thɨ takovaoŋgi vanautuma regha na vethɨ vaŋguraweŋgi na thɨ mebwabwari Idom e tɨne.
Iya kaiwae ne ya vakatha ndɨghe na i nda Gaja gha ganako
na ve wo gha ŋgolo vurɨvurɨghegheko wolaghɨye.
Ne ya mukuwo Asɨdod gha kiŋ na thela iya i mbaro Eskelon e tɨne.
Ekron mbene thɨ li vara nɨmaŋguke na vewo Pilistiya gharɨgharɨniye thavala mbe i nanjiwe.”
Giya Loi iŋa.
Taiya
Giya Loi iŋa ŋgora iyake:
“Kaiwae Taiya gharɨgharɨniye thɨ vakatha valaŋa tharɨ
mane ya mwana njogha lo ghatemuruke weŋgi,
kaiwae thɨ takovaoŋgi vanautuma regha na vethɨ vaŋguraweŋgi na thɨ mebwabwari Idom e tɨne
na ma thɨ ghambu vɨghathɨ gha dagerawe va thɨ vakatha.
10 Iya kaiwae ne ya vakatha ndɨghe na i nda Taiya gha ganako
na i nda weiye gha ŋgoloŋgolo vurɨvurɨghegheniyeko wolaghɨye.”
Giya Loi iŋa.
Idom
11  Giya Loi iŋa ŋgora iyake:
“Kaiwae Idom gharɨgharɨniye thɨ vakatha valaŋa tharɨ
mane ya mwana njogha lo ghatemuruke weŋgi,
kaiwae thɨ woidiŋa ŋgiya lenji bodaboda Isirel gharɨgharɨniye e gaithɨ gha ghalithɨ, na ma tembe gharenjiva weŋgi.
Lenji ghatemuruko ma ele ghambako na tene thɨ viyathuva.
12 Iya kaiwae ne ya vakatha ndɨghe i nja Teman na i ŋambu yathu Bosra le ŋgolo vurɨvurɨghegheniye.”
Giya Loi iŋa.
Amon
13  Giya Loi iŋa ŋgora iyake:
“Kaiwae Amon gharɨgharɨniye thɨ vakatha valaŋa tharɨ,
mane ya mwana njogha lo ghatemuruke weŋgi.
Kaiwae e lenji gaithɨ tɨne thɨ gaboŋgi na thɨ viyaŋgiya maramarabo Giliyad ele valɨvaŋga tɨne
nuwanjiya thɨ valaghɨyeŋa lenji ghamba mbaroko.
14 Iya kaiwae ne ya vakatha ndɨghe i nja Raba e gha ganako na i ŋambu gha ŋgoloko vurɨvurɨghegheniyeko wolaghɨye.
Ambane gaithɨ gha mbaŋa weiye yaro,
na gaithɨko ma i vurɨgheghe eŋge ŋgoreiye ndewendewe vurɨvurɨghegheniye.
15 Raba gha kiŋ na giyagiyaniyeko ne vethɨ mebwabwari e valɨvaŋga regha.”
Giya Loi iŋa.