5
Isirel i nuwotharɨ
1 Wo hu vandeŋe utuutuke iyake, ghemi Isirel gharɨgharɨniye,
iya nuwotharɨke wothuniye, ghino Emos, ya wothuŋake e ghemi.
2 “Isirel iye thɨnabwethubwethuru kaero i dobu, ma tembe i thuweiruva.
I ghene ghabana ele thelauko vwatae
na ma tene lolo regha i vaŋgu thuweiruva.”
3 Giya Loi Memevoroniye iŋa ŋgoreiyake:
“The ghemba laghɨye Isirel e tɨne i variye ŋgiya ragagaithɨ munɨserithaŋarɨ,
ko iyemaeŋge mbe/ma munɨthaŋarɨ eŋge thɨ raka njogha;
na ghembe laghɨye reghava i variye ŋgiya munɨthaŋarɨ,
ko iyemaeŋge mbe/ma theyaworo eŋge thɨ raka njogha.”
Isirel le numonjogha utuutuniye
4 Giya Loi iŋa ŋgoreiyake weŋgiya Isirel gharɨgharɨniye:
“Hu raka njoghama e ghino,
amba ne e yawayawalɨmi.
5 Ne hunde raka Beyasiba na vohu kururuwe.
Ne hunde mande na hu tamwe vaidiŋgo Betel e tɨne — Betel iye ne nandere moli.
Ne hunde raka Gilgal — gharɨgharɨniye ne vethɨ mebwabwari e vanautuma regha.”
6 Hu raka weya Giya Loi, na mbala mbe e yawayawalɨmi.
Thoŋgo ma hu rakawe ne i njama
ŋgoreiya ndɨghe laghɨye i rara weŋgiya Isirel gharɨgharɨniye.
Ndɨgheko ne i ŋambu ŋgiya Betel gharɨgharɨniye,
na tembe valɨkaiwaeva lolo regha i vun.
7 O ghemi, iya hu vɨva mbaroko thovuye na i tabo bigi maŋgemaŋgeniye
na hu botewayatho iyaŋganiya i rumwaru.
Giya Loi valɨkaiwae i vakatha na i mukuwo
8 Giya Loi i vakatha ghɨtara e njighɨnjighɨ ghamba mbaŋa na dayagha ghamba mbaŋa.
Iye i vɨva mbaŋambaŋa i wa e gougou,
na ghararaghɨye i wa e gougou.
Iye i kukla voreŋa mbwa/njighɨ e njighɨko tɨne
na i liŋgi e yambaneke.
Iye idae Giya Loi.
9 Iye i womena mukuwo weŋgiya thavala thɨ vurɨgheghe na ve nja weŋgiya lenji ŋgoloŋgolo vurɨvurɨghegheniye.
Vanuworɨrɨ weŋgiya tharɨ gha ravakatha na gharɨgharɨ thɨ rumwaru
10 Ghemi hu botewayatho thela i ŋgiwetho tharɨ utuniye e kot/niva,
na hu botewayatho thela i utuutu emunjoru. 11 Hu goriwoyathu mbinyembinyeŋgu na hu naŋguŋgwa lenji wit.
Iya kaiwae, othembe hu vatad ŋgiya ŋgoloŋgolo thovuthovuye e varɨvarɨ
mane huya yakuwe,
othembe hu kabwa waen gha uma thovuthovuye,
mane hu muna waen e nɨkinjiko.
12 Kaiwae ya ghareghare lemi tharɨna i laghɨye moli,
na lemi vakatha vatharɨ i ghanagha.
Hu vakatha vatharɨ weya lolo rumwarumwaruniye,
na u vavaloghe na hu ndeganegane mbinyembinyeŋgu le kot e tɨne.
13 Iya kaiwae thela hu goriwoyathu iye i manabu na i rokubaro iya e tharɨke ghanji mbaŋa iyako tɨnenji.
14 Hu tamweya thovuye, na thava tharɨ, amba ne e yawayawalɨmi.
Na mbala Giya Loi Vurɨvurɨghegheniye i thalavuŋga,
ŋgoreiya mbaŋake wolaghɨye huŋama iye weimi.
15 Hu botewayatho tharɨ, na hu gharethovuwa thovuye,
na hu vakatha na thovuye ko e tɨnenji.
Mbwata ambane Giya Loi Vurɨvurɨghegheniye iya amba e yawayawalinjiko.
16 Iya kaiwae Giya Loi, Giya Loi Vurɨvurɨghegheniye iŋa:
“Mbene randa eŋge e kamwakamwathɨko wolaghɨye,
na raŋa vetho laghɨye e ghamba mevathavathako wolaghɨye.
Ne thɨ kula weŋgiya rakakaiwo e umauma thɨ raka mena thiya randa,
na thɨ vamodoŋgiya gharɨgharɨ thɨ raka mena thiya randa kaiwanji.
17 E waenɨko ghanji umaumako wolaghɨye mbene randa eŋge
Iyake ne thɨ yomara kaiwae ne ya mena ya giya vuyowo e ghemi.”
Giya Loi iŋa.
Giya Loi gha mbaŋa ghathe
18 Aleu! Nevole hu thovuyaona,
iye thavala ghemi iya nuwamina
mbe i nawe vara Giya Loi gha mbaŋa gatheko.
Buda kaiwae nuwamiya Giya Loi gha mbaŋako i mena?
Mbaŋako iyako ne momouwo, mane manjamanjala.
19 Nevole ŋgoreiya amala regha i vogha weya laiyon na ma ve lavolevoleva beya,
na tembe ŋgoreiyeva ve ru ele ŋgolo
i liraweya nɨmae e babako na kaero mwata mamate i gharɨva.
20 Ko uŋa eŋge Giya Loi gha mbaŋa mane i momouwo na ma manjamanjala i nawe? Mbwana i momouwo ma manjamanjalaniye.
21 Giya Loi iŋa, “Ya botewa, ya botewayathu moli, iya lemi kururuna thaganiyeŋgi
na lemi mevathavatha thɨ vakatha ghambwera e ghino.
22 Othembe hu bigi mena mwaewo ghanɨŋga vowo ŋambuŋambu kaiwae na mwaewo wit vowo kaiwae
mena ya wovatha.
Othembe ne hu womena thetheghan gha tabo vondɨvondɨ lemi mwaewo vɨghathɨ vowoniye
mane ya wovatha.
23 Hu viyatho ghami wothuŋgina hu wothuwothuna
mane ya vandeŋe lemi hapɨna ghalɨŋae.
24 Ko iyemaeŋge mbe hu vakatha na thovuye weŋgiya mbinyembinyeŋgu
ŋgoreiya imba mbe i voruvoru vara,
na hu vakatha thanavu rumwarumwaruniye ŋgoreiya i voru valaŋa.
25 Isirel gharɨgharɨniye, mara ya noŋguŋga vowo na waewa e ghemi theghathegha ghwevarɨko e tɨne iyava ya vivako e ghemi e njamnjamɨbwagako. 26 Ko iyemaeŋge mbaŋake, kaiwae kaero hu kururu weya vatavatadɨ Sakut, lemi kiŋ loi, na tembe ŋgoreiyeva Kaiwan, lemi ghɨtara loi, ne hu bigiŋgiya iya loi vatavatadɨŋgina thiyana 27 mbaŋa ne ya vaŋguŋga vohu mebwabwari e valɨvaŋga Damasiko, na vaŋga/ghereiyeko.”
Giya (Loi) iŋa, iye idae Loi Vurɨvurɨghegheniye.