8
Vatomwe ghevarɨniye: Manjemanje uneune e nambo tɨne
1 Gheke Giya Loi Memevoroniye tembe i vatomweva vavaghare regha e ghino; iyako manjemanje uneune inanji e nambo tɨne. 2 Iwaeŋge Giya Loi i vaito Emos, iŋa, “U thuwe budakai?” Emos i gonjoghawe, iŋa, “Manjemanje uneune.”
Amba Giya Loi i dage e ghino, iŋa, “Mbaŋa kaero iko lo gharɨgharɨ Isirel kaiwanji. Mane tembe ya vɨvɨva lo renuwaŋa iya nuwaŋguiya ya lithɨko weŋgi.”
3 Giya Memevoroniye iŋa, “Ne e mbaŋako iyako wanakau thɨ wothuwothu e Ŋgolo Boboma tɨne ne i tabo randa. Ramaremare riwanji ne lemoyo moli na ne thɨ yathuŋgi eto. Huya rokubaro!”
Loi ne i lithɨ weŋgiya Isirel gharɨgharɨniye
4 Wo hu vandeŋe iyake, giyagiyana ghemi iya hu vuruvaululeŋgiya ranjavovo
na hu munjeva hu mukuwoŋgi mbinyembinyeŋgu e vanautumake iyake tɨne.
5 E nuwamina huŋa,
“The mbaŋa Manjala Togha gha mbaŋa iko
na kaero vo vakuneŋava wit.
Na thembaŋa Sabat veko na voya vakuneva?”
Mbala vo wovoroŋa witɨko yaŋunjawae modae,
na wo vakaivɨŋaŋgi ravavamodo e gherughɨrughɨ kwanɨkwan.
6 Ne ra vamodoŋgiya mbinyembinyeŋgu na thɨ tabo rakakaiwobwaga kaiwae ma valɨkaiwanji thɨ vamodo ghanji ghagako,
othembe thoŋgo ghagako nasiye ŋgoreiye ghegha ghae modae.
7 Giya Loi, iya Isirel le ghamba sirariko kaero i dagerawe iŋa: “Emunjoru mane ya renuwaŋa vaghawe lenji vakathako raraitharɨ.”
8 Iyake kaiwae yambaneke ne i mbarɨmbarɨrɨ na gharɨgharɨke wolaghɨye ne thiya randa.
Vanautumake laghɨye ne i ragheragheghe; ne i voro na i nja ŋgoreiya Walaghɨta Nael Ijipt e tɨne.
9 Giya Loi Memevoroniye iŋa, “Ne ya vakatha varae i ghawe ghararaghɨye mboro
na yambaneke i momouwo ghararaghɨye.
10 Ne ya vakathaŋga e lemi thagana tɨne ma huya warari,
ko mbema nuwatharɨ eŋge.
Na ya vɨva ghami wothu vawarari na iwa e nuwatharɨ.
Ne ya vakatha taulaghɨna ghemi umbalɨmina thiya vwata,
na ya vakathaŋga hu njimbo kwama bwedibwedi.
Ne ya vakatha mbaŋako iyako ŋgoreiye lolo regha i nuwatharɨŋa nariye mbe regha eŋge vara i mare kaiwae,
na bigibigike wolaghɨye ne thɨ yomara mbe weiye eŋge nuwotharɨ laghɨye.”
11 Giya Loi Memevoroniye iŋa, “Mbaŋa ma iya i menamenake, mbaŋaniye ne ya vakatha na vunuvu i yomara e valɨvaŋgana iyana.
Ma vunuvu ghanɨŋga kaiwae o mbwa, ko iyemaeŋge vunuvu Loi ghalɨŋae kaiwae.
12 Gharɨgharɨ ne thiya loŋga, iri e Njighɨ Maremareniye i wo Njighɨ Meditareiniyan,
na vethɨ vaghɨliye e ghaiwabuko na vewo e boimako.
Ne thɨ tamwe tako valɨvaŋgake wolaghɨye Giya Loi ghalɨŋae kaiwae, ko iyemaeŋge mane thɨ vaidi.
13 Othembe ne e mbaŋako iyako, ghɨmoghɨmoru na wanakau ghanji yamoyamo thovuye ne ghare thavwathavwa i nja weŋgi mbwa kaiwae.
14 Gharɨgharɨko thiyako iya thɨ tholo weŋgi loi vatavatadɨ Sameriya e tɨne, thɨŋa,
‘loi vatavatadɨ Dan e idae,’ o ‘loi vatavatadɨ Beyasiba gha loi idae,’ gharɨgharɨke thiyake ne thɨ dobu na ma tembe thɨ thuweiruva.”