Jisas Krais Le
Vatomwe
Weya Jon
Utu iviva
Jon iye Jisas ghalɨŋae gharaghambɨ, Sebedi nariye iyava i roriya bukuke iyake. Va i rori na i variye weŋgiya ekelesiya wabwi ghepirɨ va inanji Eisiya provins e tɨne. E mbaŋako iyako Rom lenji mbaro i vurɨgheghe e yambaneke valɨvaŋgako iyako, na thɨ vakatha vɨrɨ weŋgiya raloŋweloŋweghathɨ. Kiŋɨke iyava i vakatha vɨrɨke weŋgiya Kristiyan iye Sisa Nero. Iye va ghambaŋa mbaro theghathegha 54 i wa ve ghad theghathegha 68. Kiŋ regha vambe i vakathava vɨrɨ weŋgiya Kristiyan, iye idae Domitiyan. Iye va ghambaŋa mboro theghathegha 81 ghaghad theghathegha 96. Rɨghe laghɨye vara na thɨ vakatha vɨrɨ weŋgiya Kristiyan ŋgoreiyake. Rom va thɨŋa lenji kiŋɨko iye ŋgoreiya loi regha na gharɨgharɨ wo thɨ kururuwe. Ko iyemaeŋge Kristiyan thiye va thɨ botewo na thɨŋa, “Krais iye ghama Giya na mbe wo kururuwe eŋge vara amalaghɨniye.” Iyake kaiwae Rom lenji rambarombaro thɨ thɨghɨya wanaŋgiya Kristiyan na thɨ gaboŋgiya vavana (2:10; 2:13; 3:10; 6:9).
Rom vambe thɨ vaŋguraweva Jon e thiyo e raurau Patɨmos tɨne (1:9). Buk gharaghareghare lemoyo thɨŋa Kiŋ Domitiyan ghambaŋa e tɨne, mbwata theghathegha 95 e tɨne. Mbaŋaniye Jon vambe ina Patɨmos e tɨne Jisas i vatomweya bigibigi vavanawe na i uturaŋgiya.
Jon i govambwara weŋgiya Kristiyan Seitan le vakatha vɨrɨ weŋgiya ekelesiya ne i laghɨye, ko iyemaeŋge thiye mbe thɨ ndeghathɨ vurɨgheghe vara othembe thoŋgo thɨ vaidiya mare (12:11). Renuwaŋa laghɨye regha mbe thɨ ghataŋaghathɨ vara (2:7; 13:10; 14:12). Jon i govambwara Krais ne i njoghama amba i kivwalaŋgiya ghathɨghɨya. Thavala ghanjithanavu i tharɨ ne i lithɨ weŋgi, ko iyemaeŋge raloŋweloŋweghathɨ ne thɨ rakaru e yambane togha na buruburu togha e ghathovuye tɨne (21:7-8).
1
1 Bukuke iyake Jisas Krais le vatomwe utuniye. Loi va i giya bigibigike thiyakewe na i woraŋgiya weinda ghinda le rakakaiwo budakaiya tene i yomara ma mbaŋa molao. Krais va i variya le nyao thovuye e ghino, Jon, wovatomwe e tɨne na i vatomweya bigibigike thiyake weŋgo. 2 Na bigibigiko wolaghɨye ya thuweŋgiko ya govambwara e ghemi. Loi ghalɨŋae na Jisas Krais le woraŋgiya e ghino ya utuŋa utuniye e ghemi. 3 Thela thoŋgo i vaona weŋgiya gharɨgharɨ utuutuke iya Loi ghalɨŋaeke totoke e ghabuku tɨne, iye Loi i warari kaiwae, na thavala thɨ loŋweya utuutuke iyake na thɨ ghambu, Loi i warari kaiwanji. Kaiwae ma mbaŋa molao kaero bigibigike thiyake thɨ yomara.
Jon i gomwaewo ekelesiya ghepirɨ weŋgi
4 Ghino Jon, ya roriya letake iyake na ya variye i ghaona e ghemi ekelesiya wabwi ghepirɨ inami e valɨvaŋga Eisiya tɨne.
Ya naŋgo weya Loi iye noroke, mbaŋa me vivako, na mbaŋa i menamenake mbe inawe, ghare weŋga na le gharemalɨlɨ i riyevanjara gharemina. Tembe ŋgoreiyeva nyao theghepirɨ*Nyao theghepirɨ mbwata thɨ methɨ Nyao Boboma. Mbowo hu thuweva Vat 3:1. thiya inanji Loi e ghamwae ele ghamba yaku vwenyevwenye tɨne, thiye thɨ methɨ Nyao Boboma, 5 weiye Jisas Krais gharenji weŋga na lenji gharemalɨlɨ i riyevanjara gharemina. Jisas iye Loi ghalɨŋae gharayathu emunjoru, iye mare ghagamau, na iye yambaneke ghakiŋ lenji randeviva.
Jisas iye i gharethovuinda, le mare e tɨne i rakayathuinda na i thavwiyathu la tharɨ; 6 ko amba i bigiraweinda le ghamba mbaro gharɨgharɨniye. Ghinda ra tabo le rakakaiwo boboma le Loi na Ramae kaiwae. Jisas iye ra wovavwenyevwenye na ra wovavurɨvurɨghegheŋa mbaŋake wolaghɨye, ma ele ghambako. Mbwana. Ŋgoreiye.
7 Wo hu thuwe! Iye iya i njama e ŋgalɨlɨko, gharɨgharɨke wolaghɨye maranji ne i voro na thɨ thuwe,
na othembe thavala va thɨ vwe na i mare, thiye tembene thɨ thuweva.
Gharɨgharɨke wolaghɨye e yambaneke ne thɨ randa kaiwae.
Emunjoru! Mbwana. Ŋgoreiye.
8 Loi iye i Vurɨgheghe Moli, na iye noroke, mbaŋa me vivako, na mbaŋa i menamenake mbe inawe, iŋa, “Ghino Alepa na Omega, ghino va e Rɨghendake na ne Eleghambakoko.”
Jon i thuweya Jisas
9 Ghino ghaghami Jon, weya Jisas weiŋguyaŋgiya ghemi ra vaidiya vɨrɨ, kaiwae weiŋguyaŋgiya ghemi ra tabo Jisas le ghamba mbaro gharɨgharɨniye na weiŋguyaŋgiya ghemi ra ghataŋaghathɨgha vuyowo weinda la rouda. Va ya vavaghareŋa Loi ghalɨŋae na Jisas Krais le woraŋgiya e ghino, na iyake kaiwae thɨ yakɨnɨŋgo na thɨ vaŋguraweŋgo e raurau Patɨmos na va yakuwe. 10 Ghanda Giya ghambaŋa kururu e tɨne, Nyao Boboma le vurɨgheghe i woŋgo, amba ya loŋweya ghalɨghalɨŋa laghɨye regha e ghereiŋgu ŋgoreiya mema ghalɨŋae. 11 Iŋa ŋgoreiyake, “Bigibigike iya ne u thuweŋgike u rorinjoŋa e peipa vonɨvona tɨne, ko ambane u variye na i wa weŋgiya ekelesiya thiya yaku e ghembaghemba theghepirɨ tɨnenji na thɨ vaona. Ghembaghemba theghepirɨ thiyake: Epesas, Smaina, Pegamam, Tayataira, Sadis, Piladelpiya na Leodisiya.”
12 Amba ya ndevɨ na nuwaŋguiya ya thuwe thela me utuutuko weŋgo, iwaeŋge ya thuweŋgiya kadɨŋeŋe weinji ghambanji gol, lenji ghanaghanagha ghepirɨ. 13 E ghanjilughawoghawo ya thuweya yamoyamo regha ŋgoreiya loloDan 7:13 i njimbo kwama ghayaboyabo molao, i nja ve wo gheghe, na gharevwata gheva thɨ vakatha gol i livaghɨliya. 14 Umbaliye vulivuliye i kakaleva ŋgoreiya ghina ree, na maramarae ŋgoreiya ndɨghe mamiye. 15 Gheghe thɨ ndalandala ŋgoreiya thɨ ŋambwa kopa na thɨ vakatha na i ndalandala, na ghalɨŋae ghaloŋwaloŋwa ŋgoreiya mbwa i voru e thalawovanja laiye. 16 Nɨmae e uneke i laweŋgiya ghɨtara voghɨpirɨ, na gaithɨ ghaghalithɨ lawelaweniye marae vaŋga na vaŋga i raŋgima e ghae. Ghamwae marambwelambwelawae ŋgoreiya raŋgila thiyo varaeniye.
17 Mbaŋa ya thuweya loloko iyako, ya dobu e gheghe ŋgoreiya lolo kaero i mare. Kaero i liraweya nɨmae uneko e riwaŋgu na iŋa, “Tha u mararu! Ghino va e Rɨghendako na Eleghambakoko. 18 Ghino e yawayawaliŋgu, va ya mare, ko iyemaeŋge mbaŋake kaero e yawayawaliŋgu na ya meghabana mbaŋake wolaghɨye. Mare na Thambe ghanjiki ghino ya mbaroŋa. 19 Bigibigike iya mo thuweke, na iya kaero nanjiwe e mbaŋake iyake na iya ne thɨ yomara mbaŋa i menamenako, u rorinjoŋa utuutuninji. 20 Simosimoko iya mo thuweŋgiko — ghɨtara voghɨpirɨ me nanji e nɨmaŋguke e uneŋguke na kadɨŋeŋe weinji ghambanji gol lenji ghanaghanagha theghepirɨ ghanjirumwaru ŋgoreiyake: ghɨtara voghɨpirɨ thiye nyao thovuthovuye ekelesiyama ghepirɨma ghanjiranjimbunjimbu, na kadɨŋeŋe weinji ghambanji gol lenji ghanaghanagha ghepirɨ, thiye ekelesiya ghepirɨma.”